பிணை

ப.மதியழகன் · ப.மதியழகன் Sun Oct 09, 2011 6:08 pm

எமக்காக சிந்த ஒரு துளி
கண்ணீர் உண்டா உம்மிடத்தில்
எமக்காக சிந்திக்க ஒரு நொடி
அவகாசம் உண்டா உம்மிடத்தில்
எமக்காக குரலெழுப்ப
நெஞ்சுரம் உண்டா உம்மிடத்தில்
எமக்குத் தேவை
உமது வருத்தமல்ல வாழ்வு
எமது வசிப்பிடங்கள்
சிதைந்து போய் கிடக்கின்றன
விரோதிகளிடம்
பிணைப் பொருளாக
வதைபடுகிறோம் நாங்கள்
பதுங்கு குழியில்
காதுகளை செவிடாக்கும்
குண்டுச் சத்தத்திற்கு
பழகியவர்கள் நாங்கள்
மரணத்தின் வாசனையை
முகர்ந்து பார்தததுண்டா
நீங்கள்
பசியெடுக்கவில்லை
உதிரத்தின் வாடையால்
உதரம் குமட்டிக் கொண்டு வருகிறது
வாழ்க்கைக்கு அர்த்தம்
தேடியலைபவரா நீங்கள்
அப்படியே ஒருமுறை
இலங்கைத் தீவுக்கு
வருகை தாருங்கள்.

kitcha · kitcha Sun Oct 09, 2011 6:14 pm

வேடிக்கை பார்க்கும் மனிதர்களுக்காக, வலி நிறைந்த மனதுடன் வேதனையுடன் சொல்லப்பட்ட கவிதை.
புரட்சி என்று வந்தாலே விடிவு என்பது உண்டு.

**கோவிந்தராஜ்** · 20/02/2011

வாழ்க்கைக்கு அர்த்தம்
தேடியலைபவரா நீங்கள்
அப்படியே ஒருமுறை
இலங்கைத் தீவுக்கு
வருகை தாருங்கள்.

மிகவும் அர்த்தம் செறிந்த வரிகள் !
மகிழ்கின்றேன்.(கவிதை நயத்திற்காக , தவறாக எண்ணிவிடாதீர்கள் ).