வரலாறு காணாத பக்தர்கள் கூட்டம்: திருப்பதியில் ஒரே நாளில் ரூ.1.87 கோடி உண்டியல் வசூல் ; தரிசனத்துக்கு 16 மணி நேரம் ஆகிறது

திருமலை, அக்.3-

திருப்பதியில் வரலாறு காணாத பக்தர்கள் கூட்டத்தால் உண்டியல் வருமானம் அதிகரித்துள்ளது. நேற்று ஒரே நாளில் மட்டும் ரூ.1.87 கோடி உண்டியல் வசூலாகி உள்ளது.

திருப்பதி ஏழுமலையான் கோவில் பிரமோற்சவம் கடந்த 29-ந்தேதி தொடங்கியது. திருவிழா தொடங்கிய 2 நாட்கள் வழக்கமாக பக்தர்கள் கூட்டமே நிலவியது. 3-ம் திருவிழாவில் இருந்து பக்தர்கள் எண்ணிக்கை அதிகரித்தது.

நேற்று விடுமுறை தினம் என்பதால் வரலாறு காணாத வகையில் பக்தர்கள் கூட்டம் காணப்பட்டது. நேற்று 1 லட்சத்து 27 ஆயிரம் பேர் இலவச தரிசனம் செய்தனர். மேலும் 1 லட்சம் பேர் தரிசனத்துக்காக காத்திருந்தனர். 3 1/2 கிலோ மீட்டர் தூரம் வரை தர்ம தரிசன கியூ காணப்பட்டது. இதனால் ஏழுமலையானை தரிசிக்க 16 மணி நேரம் பிடித்தது.

பிரமோற்சவத்தின் முக்கிய நிகழ்ச்சியான கருடசேவை இன்று இரவு நடக்கிறது. கருட சேவையை காண 5 லட்சம் பக்தர்கள் திரளுவார்கள் என எதிர்பார்க்கப்படுகிறது. அவர்கள் நெரிசல் இன்றி தரிசனம் செய்ய 4 மாட வீதியிலும் கோவில் சார்பில் சிறப்பு ஏற்பாடுகள் செய்யப்பட்டுள்ளது. பாதுகாப்புக்காக 4500 போலீசார் குவிக்கப்பட்டுள்ளனர்.

பக்தர்கள் அமரும் மாடவீதி கேலரிகளில் வெடிகுண்டு சோதனை நடத்தப்பட்டது. பிற்பகலில் இருந்து காலரியில் அமர பக்தர்கள் அனுமதிக்கப்பட்டனர். பக்தர்களுக்கு வசதியாக கருடசேவை ஊர்வலம் 1 மணி நேரத்துக்கு முன்னதாக இரவு 8 மணிக்கு தொடங்க நடவடிக்கை எடுக்கப்பட்டு உள்ளது.

பக்தர்கள் குவிந்ததால் அவர்கள் தங்குவதற்கு அறைகள் கிடைக்கவில்லை. இதனால் பக்தர்கள் அவதிப் பட்டனர். சிலர் தர்ணா போராட்டம் நடத்தினார்கள். அவர்களை தேவஸ்தான அதிகாரிகள் சமரசப்படுத்தினார்கள்.

பக்தர்கள் அதிகரிப்பால் கோவில் உண்டியல் வருமானமும் அதிகரித்துள்ளது. நேற்று ஒருநாள் மட்டும் உண்டியல் மூலம் ரூ.1 கோடியே 87 லட்சம் வசூலாகி உள்ளது. தங்கும் விடுதிகள் மூலம் ரூ.10.55 லட்சமும் தரிசனம் மூலம் ரூ.76 ஆயிரமும், கட்டண சேவை மூலம் ரூ.29 ஆயிரமும், பிரசாத விற்பனை மூலம் ரூ.39.55 லட்சமும் கிடைத்துள்ளது.

நேற்று ஒருநாள் மட்டும் 6737 பேர் சுதர்சன டிக்கெட் மூலம் தரிசனம் செய்தனர். 47 ஆயிரம் பேர் முடிகாணிக்கை செய்துள்ளனர். கருட சேவையை முன்னிட்டு திருமலையில் இருசக்கர வாகனங்களுக்கு இன்று தடை விதிக்கப்பட்டுள்ளது. பக்தர்கள் வருகைக்காக கூடுதலாக 450 பஸ்கள் இயக்கப்படுகிறது.

மாலைமலர்

என்னிடம் இவ்வளவு பணம் இருந்தால், அனாதைகளுக்கு ஆதரவாக இருப்பேன். கோவில்களுக்கு நன்கொடை தரமாட்டேன்.

nadesmani wrote:என்னிடம் இவ்வளவு பணம் இருந்தால், அனாதைகளுக்கு ஆதரவாக இருப்பேன். கோவில்களுக்கு நன்கொடை தரமாட்டேன்.

உயர்ந்த சிந்தனை உங்களுடையது. பாராட்டுக்கள்.... கோவில்களை நம்பி நிறையபேர் வாழ்கின்றனர். அவர்களும் ஏழைகள் தான் நேரடியாகவோ மறைமுகமாகவோ நிறையபேர் பயனடைகின்றனர்.