வாழைக்காயில் சமையல் செய்யும் விதங்கள்

by **சிவா** Mon Oct 03, 2011 8:00 pm

என்ன சத்து உள்ளது : கொழுப்புச் சத்து, விட்டமின்-இ

யாருக்கு நல்லது : வயிற்றுப்புண், ரத்த மூலம் உள்ளவர்களுக்கு பிஞ்சாக சாப்பிட நோய் கட்டுப்படும்.

யாரு சாப்பிடக்கூடாது : வாய்வு, இதய மூட்டு வலி உள்ளவர்கள்.

பலன் : உடலுக்கு உரம் அளிக்கும், மலச்சிக்கலை உடைக்கும்.

பொதுவாக வாழைக்காய் வாய்வு என்பவர்களுக்கு, அத்துடன் இஞ்சி (அ) பெருங்காயம் சேர்ப்பதால் வாய்வு உண்டாகாது.

வாழைக்காய் கார கறி

தேவையான பொருட்கள்

வாழைக்காய் 2, துருவிய தேங்காய் 2 மேசைக்கரண்டி

தாளிக்க

சமையல் எண்ணை - 2 தேக்கரண்டி, கடுகு, உளுத்தம் பருப்பு, தனி மிளகாய்த் தூள், பெருங்காயப் பொடி, கறிவேப்பிலை.

செய்முறை

வாழைக்காயை தோல் சீவி சிறுசிறு துண்டகளாக நறுக்கி, உப்பு, மஞ்சள் தூள் சேர்த்து வேகவைத்து, கடாயில் எண்ணை விட்டு, கடுகு, உளுத்தம் பருப்பு தாளித்து, துருவிய தேங்காய், பெருங்காயப் பொடி, காரப்பொடி கறிவேப்பிலை போட்டு பிறகு வெந்த காய்களைப் போட்டு நன்கு கிளறி எடுக்க வேண்டும்.

பின்குறிப்பு

காய் வேகும்போது சிறிது புளி சேர்த்தால் கருக்காமல் நிறமாக இருக்கும். ருசியும் கூடும். இந்தக் கறி சாம்பார், மோர்குழம்பு, ரசம் எல்லாவற்றிற்கும் தொட்டுக் கொள்ள நன்றாக இருக்கும்.

by **சிவா** Mon Oct 03, 2011 8:01 pm

வாழைக்காய் (தேங்காய் சேர்த்த) பொடிமாஸ்

தேவையான பொருட்கள்

வாழைக்காய் 2, துருவிய தேங்காய் 1/2 கப், இஞ்சி, பச்சை மிளகாய், கறிவேப்பிலை.

தாளிக்க

தேங்காய் எண்ணை, கடுகு, உளுத்தம் பருப்பு, பெருங்காயப் பொடி.

செய்முறை

வாழைக்காயை முழுசாக வேகவைத்து, தோலை உரித்து கொப்பரை துருவியில் கொண்டு அதில் பெருங்காயப் பொடி, உப்பு சேர்த்து வைத்துக் கொள்ள வேண்டும். கடாயில் தேங்காய் எண்ணை விட்டு கடுகு, உளுத்தம் பருப்பு தாளித்து நறுக்கிய இஞ்சி, பச்சை மிளகாய் சேர்த்த பிறகு வாழைக்காயை (துருவி, உப்பு, பெருங்காயப் பொடி) சேர்த்த கடைசியில் தேங்காய் துருவியதைச் சேர்த்து கிளறி எடுக்க வேண்டும்.

பின்குறிப்பு

நல்ல முற்றின வாழைக்காய் இதற்கு சிறந்தது. காய் குழைந்து விடாமல், பக்குமாக வேக விட வேண்டும். தேங்காய் அதிகமாக சேர்த்தாலும், நன்றாகவே இருக்கும்.

இந்த வகைக்கறி சாம்பார், ரசம் போன்றவற்றிற்கே தொட்டுக் கொள்ளலாம். (மோர்க்குழம்பிற்கு அவ்வளவாக நன்றாக இருக்காது).

by **சிவா** Mon Oct 03, 2011 8:02 pm

வாழைக்காய் பொடி (பிசைந்து சாப்பிட)

தேவையான பொருட்கள்

வாழைக்காய் 1

வறுத்து பொடிக்க

துவரம் பருப்பு - 2 மேசைக்கரண்டி
உளுத்தம் பருப்பு - 2 தேக்கரண்டி
சிவப்பு மிளகாய் - 4 (அ) 5
பெருங்காயம் சுண்டைக்காய் அளவு,
உப்பு தேவையான அளவு.

செய்முறை

வாழைக்காயை சற்று மெல்லிய சதுர துண்டுகளாக நறுக்கிக் கொள்ள வேண்டும். வறுக்க வேண்டியவைகளை சிறிது எண்ணைவிட்டு வறுத்து எடுத்துக் கொண்டு, பிறகு அதே கடாயில் சிறிது எண்ணை விட்டு, நறுக்கிய வாழைக்காய்களைச் சிறிது மிதமான தீயில் வதக்கிக் கொள்ள வேண்டும். (துண்டுகளை கையால் அமுக்கினால் அமுங்க வேண்டும்)

வறுத்தவைகளை முதலில் உப்பு சேர்த்து கரகரப்பாக மிக்ஸியில் பொடித்துக் கொண்டு கடைசியில் வதக்கின வாழைக்காய்களைச் சேர்த்து ஒரு சுற்று சுற்றி எடுத்து வைத்து விடவும்.

பின்குறிப்பு

நன்கு முற்றின காய்களே இவ்வகை பொடிக்கு ஏற்றது.

இந்தப் பொடியை சாதத்தில் பிசைந்தும் சாப்பிடலாம். தொட்டுக்கொள்ள, கூட்டு, பச்சடி நன்றாக இருக்கும்.

by **சிவா** Mon Oct 03, 2011 8:03 pm

வாழைக்காய் புளியிட்ட பொரிச்ச குழம்பு

தேவையான பொருட்கள்

வாழைக்காய் - 1
துவரம் பருப்பு - 1/4 கப், (வேக வைத்தது)
கடலை பருப்பு - 1 தேக்கரண்டி
புளி, உப்பு, தேவையான அளவு
சாம்பார் பொடி - 1 ஸ்பூன்
துருவிய தேங்காய் - 1 மேசைக் கரண்டி,

தாளிக்க

கடுகு, வெந்தயம், பெருங்காயம், வற்றல் மிளகாய் - 1, கறிவேப்பிலை, துருவிய தேங்காய்.

செய்முறை

வாழைக்காயை சிறு துண்டுகளாக நறுக்கி, கடலைப்பருப்புடன் சிறிது வேக வைத்துக் கொண்டு, பிறகு புளி கரைத்து விட்டு, உப்பு, மஞ்சள் பொடி, சாம்பார் பொடி, சேர்த்து கொதிக்க விட வேண்டும். கடைசியில் வெந்த பருப்பை மசித்து சேர்த்து, கடுகு, வெந்தயம், கிள்ளு மிளகாய் பெருங்காயம் உளுத்தம் பருப்புடன் தேங்காய் சேர்த்து வறுத்து குழம்பில் சேர்த்து கருவேப்பிலைத் தூவி இறக்கி விடவும்.

பின்குறிப்பு

தேங்காய் எண்ணையில் வறுத்து தாளித்தால் மணமாக இருக்கும். சாம்பாருக்கு சேர்ப்பதை விட பாதி வெந்த பருப்பு சேர்த்தால் போதும்.

இந்தக் குழம்பிற்கு தேங்காய் சேர்த்தால் எந்த காயும் தொட்டுக்கொள்ள நன்றாக இருக்கும்.

சங்கரி வெங்கட்