எனது தீபாவளி கொண்டாட்டம்

First topic message reminder :

பிறக்க ஒரு ஊர், பிழைக்க ஒரு ஊர். தமிழ்நாட்டின் தலைவிதிக்கு நாம் மட்டும் விதிவிலக்கா என்ன? பிழைக்க வந்த இடத்தில் என்ன கொண்டாட்டம் இருக்கப் போகிறது? கால ஓட்டத்தில் காணாமல் போகும் பட்டியலில் இந்த தீபாவளியும் சேர்ந்துக் கொள்ளும் நாள் இதோ…. பட்டாசு என்ற ஒரு வஸ்து மட்டுமே இன்னமும் தீபாவளியை உயிரோடு வைத்திருக்கிறது. இல்லையேல் இந்திய தொலைக்காட்சிகளிலே….. போய் விடும் தீபாவளி. இத்தனை வருடம் கழித்தும் தீபாவளி என்றதும் எனக்கு எங்கள் தெரு, பக்கத்து வீடு காரர்களின் திட்டு இவைதான் நினைவுக்கு வருகிறது. இன்னும் சில நாட்களில் வரவிருக்கும் தீபாவளியை விட அந்த தீபாவளியை நினைத்துக் கொள்வதே மகிழ்ச்சியாயிருக்கிறது.

எல்லாத் தெருவிலும் இரண்டு கோஷ்டிகள் இருக்கும். ரஜினி கமல் என்றோ, அந்த முக்கு இந்த முக்கு என்றோ, பெரிய பசங்க சின்ன பசங்க என்றோ… சரியாக இரண்டு கோஷ்டிகள்தான் இருக்கும். தீபாவளிக்கு பல நாட்கள் முன்பே ஊசிவெடியும், நாட்டு வெடியும் நாச வேலை செய்து கொண்டிருக்கும். தனியாக வரும் அந்த டீம்காரனின் மீது மாடியிலிருந்து வெடியை கொளுத்தி போடுவது, பதிலுக்கு நாம் அந்த பக்கம் போனா மாட்டுசாணத்தின் அடியில் வெடியை வைத்து அவர்கள் நம்மை வடிவேலாக்குவது... தீபாவளியன்று யார் வீட்டுக்கு முன் நிறைய பேப்பர் என்பது வரை நீடிக்கும் அந்தப் போர்… போரடிக்காத போர். இதற்காகவே லட்சுமி வெடியும், யானை வெடியும் நிறைய இருக்கும். பேப்பர் அதிகம் சுற்றப்பட்டிருக்கும் காரணத்தால்.

அப்பா வாங்கி வரும் 100வாலாவை ஒவ்வொன்றாக பிரித்துப் போட, அதில் பாதிக்கு மேல் திரி பிடுங்கி வர, மீதியில் பாதி புஸ்ஸாகிவிட, மிச்சமிருக்கும் 20 வெடிகளை ஒரு மணி நேரமாக வெடிப்பதுண்டு. இப்போதெல்லாம் ஒத்தை வெடியை நாலு வயது சிறுவன் கூட ஒரே நேரத்தில் அஞ்சு வெடியின் திரியை சேர்த்துதான் வெடிக்கிறான். ஒற்றுமையின் பலம் வெடிப்பதில் மட்டுமே தெரிகிறது அவனுக்கு.

தெருவில் எந்த வீட்டு வராந்தா பெரியதாக இருக்கிறது அங்கே கூடும் எங்கள் பட்டாசு மேசை மாநாடு. அனைவரது பட்டாசுகளையும் ஒன்றாக்கி வெடிக்க தொடங்கிய உடனே.. அதுவரை அமைதியாக இருக்கும் கிழவி.. ”டேய் அந்தப் பக்கம் போய் வெடிங்கடா” என்று வெடிச்சத்தத்தை விட அதிகமாக கத்தும். யார் கேட்பது? எவனாவது கையால் வெடிக்கிறேன் என்று கொளுத்திப் போட, அது சரியாய் கிழவியின் அருகில்தான் விழும்.அது ஊசி வெடிதான் என்றாலும் பாம் விழுந்தது போல் அலறும் கிழவி. கைகளில் சிக்கும் பட்டாசை எடுத்துக் கொண்டு அடுத்த வீடு தேடும் படலம் ஆரம்பமாகும். இருக்கும் எல்லா பட்டாசும் டுமீல் ஆனவுடன் தொடங்கும் அடுத்த புராஜெக்ட்.புஸ்ஸாகிப் போன வெடிகளை சேகரித்து, மருந்தை மட்டும் பெரிய பேப்பரில் கொட்டி, ஒரு திரியை வைத்து கொளுத்தினால் ஜகஜ்ஜோதி.

இன்னும் கொஞ்சம் பெரிய பசங்க வேறு வேலையில் பிசியாக இருப்பார்கள். தீபாவளிக்கு இரண்டு நாள் முன்பு ஒரு குண்டு பல்பு வெளிச்சத்தில் நடந்துக் கொண்டிருக்கும் பேனர் தயாரிப்பு. ரஜினியின் படம் ஒரு வழியாக அடையாளம் காணும் அளவுக்கு வந்ததும், கீழே பெயர்கள் எழுதும் படலம் தொடங்கும். ரஜினியின் படத்திகு வெகு அருகில் இருக்க வேண்டும் என்பதே அனைவரது ஏக்கமும். “இந்த திரைப்படத்தை காண வந்த கண்களுக்கு நன்றி- KILLER BOYS” என்று முடித்து, கண்களை வரைவதற்குள் விடிந்து விடும். அந்த முக்கில் கையில் லட்டுடன் அபிராமியை தேடும் கமலை வரைய மனமில்லாமல் சோர்ந்து போயிருப்பார்கள். அதிலே பாதி வெற்றி பெற்றுவிட்டு, காலை ஆறு மணிக்கு ஆட்டம் பாம் அலறும் இந்த முக்கில்.

இன்னும் புதிய டிரெஸ், எதிர்த்த வீட்டுக்கு தீபாவளிக்காக வந்திருந்த சிட்டு, நாலு வீட்டுக்காரர்களும் சேர்ந்து செய்யும் முறுக்கு, ஜாமுன், பாதுஷா என பல மேட்டர் இருக்கு அந்த தீபாவளியைப் பற்றி அசை போட. ம்ம். இந்த தீபாவளிக்கு காலையில் அலுவலகமும் மாலையில் இந்திய தொலைகாட்சியும் மட்டும்தான் இருக்கு. மத்ததெல்லாம் டமால்………….

மொத்தத்தில் இந்த தீபாவளி எனக்கு வெறும் புஸ்ஸாகி போனது

ரொம்ப மகிழ்ச்சி ரொம்ப ரொம்ப மகிழ்ச்சி

விடுங்க அண்ணா அடுத்த வருடம்தான் உங்களுக்கு தலை தீபாவளி ஆச்சே அப்போ என்ஜாய் பண்ணுங்க

ரேவதி wrote:விடுங்க அண்ணா அடுத்த வருடம்தான் உங்களுக்கு தலை தீபாவளி ஆச்சே அப்போ என்ஜாய் பண்ணுங்க

அதெப்படி வருஷத்துக்கு முன்னூறு முறை லீவ் தருவதற்க்கு அது என்ன எங்க அங்கிள் கம்பெனியா என்ன ஒரு முறைதான் தருவாங்கோ அடுத்தவருடமும் தீபாவளி இங்கேதான் தனியாக

உண்மைதான் பாலா .இன்னிக்கு நம்மளை போல வெளிநாட்டில் இருக்கும்
நபர்களுக்கு எல்லாம் தீபாவளி எல்லா நாளை போல அதுவும் ஒரு நாள்.
நாம் அனுபவித்த தீபாவளி சந்தோசங்களை எல்லாம் நமது அடுத்த தலைமுறைகளுக்கு என்ன என்றே தெரியாமல் இருப்பதில் எனக்கு மிகுந்த வருத்தம் தான்

balakarthik wrote:

ரேவதி wrote:விடுங்க அண்ணா அடுத்த வருடம்தான் உங்களுக்கு தலை தீபாவளி ஆச்சே அப்போ என்ஜாய் பண்ணுங்க

அதெப்படி வருஷத்துக்கு முன்னூறு முறை லீவ் தருவதற்க்கு அது என்ன எங்க அங்கிள் கம்பெனியா என்ன ஒரு முறைதான் தருவாங்கோ அடுத்தவருடமும் தீபாவளி இங்கேதான் தனியாக

என்ன அண்ணா அப்போ அண்ணியை அங்க கூட்டிட்டு போயிடுங்க

உதயசுதா wrote:உண்மைதான் பாலா .இன்னிக்கு நம்மளை போல வெளிநாட்டில் இருக்கும்
நபர்களுக்கு எல்லாம் தீபாவளி எல்லா நாளை போல அதுவும் ஒரு நாள்.
நாம் அனுபவித்த தீபாவளி சந்தோசங்களை எல்லாம் நமது அடுத்த தலைமுறைகளுக்கு என்ன என்றே தெரியாமல் இருப்பதில் எனக்கு மிகுந்த வருத்தம் தான்

தேபாவளி மட்டுமல்ல அக்கா அனேகமா எல்லா பண்டிகைகளும் அப்படித்தான் ஆகிபோச்சு லீவ் கிடைக்குற நாளுல ஏதாவது பண்டிகை இருந்தாத்தான் அது பண்டிகை இல்லேனா அதுவும் இல்லை