"இருபத்தியெட்டைக்" காட்ட எதற்கு இதெல்லாம்?....

**rameshnaga** · **rameshnaga** Sat Oct 01, 2011 2:38 am

என் படிப்பின் இரசாயனம் எரியத் துவங்கியது...
நான் இயற்பியலில்-
"ஒரு பொருள் திரவத்தில் தங்கு தடையின்றி...."
என்று ஆரம்பிக்கும் ...
"ஆர்க்கிமிடீஸ்"-ஐப் படிக்கத் துவங்கிய பின்தான்.
"எல்லா வினைக்கும் எதிர் வினையுண்டு"-என்ற
நியூட்டனின் விதி எனக்கு எதிர் வினையாகிவிட
எனக்கு மட்டும் பத்தாம் வகுப்பில்...
மூன்று முறை தேர்வு நடத்தினார்கள்.
எப்படியோ தடுமாறி-
மூன்றாம் வகுப்பை முடிக்காத மந்திரியின்
காலில் விழுந்துதான்...
அரசு அலுவலகத்தில் "அட்டெண்டர் " ஆனேன்.
என் மேல் அதிகாரிக்கு என்னை விட அதிகம் தெரியும்.
"சூரியனில் கரும் புயல்" பற்றி என்னிடம் பெருமையாய்ப் பேசுவார்.
"எம்.எஸ்சி "-ஐ ஏழு வருஷம் எழுதினவர் அவர்.
என்ன?..என் நாற்காலியை விட அவர் நாற்காலி கொஞ்சம் பெரிசு.
தனி அறை என்று இருப்பதால் அவரின் வெற்றிலை..சீவல்
திருடு போகாது..அவ்வளவுதான்.
எவனாவது "வேலை" ஆக வேண்டியவன் வரும்போது...
அவர் அறைக்கு அழைத்துச் செல்வேன்.
வந்தவன் திரும்பும்போது...
அவனின் "முப்பத்தி இரண்டும்" தெரியும்.
எனக்கு "முப்பது"...அதிகாரிக்கு..."இருபத்தி எட்டு"..
நாங்கள் இருவரும்..."அரசு அலுவலர்கள்"..ஆயிற்றே.
இப்படி-"முப்பதையும்... இருபத்தி எட்டையும்"..காட்ட...
எதற்கு..."ஆர்க்கிமிடீசையும்...நியூட்டனையும்..."
என் கழுத்தில் தொங்கவிட்டார்களெனத் தெரியவில்லை.
இந்தக் கோபத்தில் வீட்டிற்குப் போனால்...
என் பிள்ளையும் படித்துக் கொண்டிருக்கிறான்....
"ஒரு பொருள் திரவத்தில் தங்கு தடையின்றி மூழ்கி....."-என.

நான் என்ன செய்ய முடியும் அவன் விதியை?
வேண்டுமானால் கடவுளிடம் பிரார்த்திக்கலாம்...
என்னைப் போல் "முப்பதைக்" காட்டாமல்...
"இருபதை" மட்டும் காட்ட அருள் பாலிக்கும்படி.