நாளை உன் பிறந்த நாள்-காந்தி!

வணக்கம் காந்தி!
உனக்கான இந்தக் கவிதையைத்
தமிழ் நாட்டிலிருந்து -
ஒரு சின்னப் பையன் எழுதுகிறேன்.
நாளை - உன்னுடைய பிறந்த நாள்.
"HAPPY BIRTHDAY TO YOU! GANDHI!"
உன் தாய்மொழியை நேசித்தவன் நீ.
என் தாய் மொழியால் உன்னை வாழ்த்தக் கூடாதா?-
என்ற உன் கேள்வி என் காதில் விழுகிறது.
மன்னித்துவிடு!
நீ பார்த்த "பாரதம்" எப்போதோ மாறி விட்டது.

"ராம ராஜ்யம்"-உன் கனவாய் இருந்தது.
இன்னமும்-கனவாகவே இருக்கிறது.
இனியும்-கனவாகவே இருக்கும்.

ஆங்கிலேயனைத் துரத்தியதால்-
இந்தியாவிற்குச் "சுதந்திரம்" வந்துவிட்டதாய்...
நீயே கூட நம்பவில்லைதானே?-
அதனால்தானே-சுதந்திர தினத்தன்று
நீ "மௌனம்" அனுஷ்டித்தாய்.

இந்தியனை... இந்தியனே..ஏமாற்றுவான்?...
என்பதும் நீ அறிந்திருந்த ஒன்றுதான்.
என்ன?..
இன்னொரு சுதந்திரப் போர் நடத்த
உனக்கு வயதில்லாமல் போய்விட்டது...
தப்பு!தப்பு!...
எங்கே நீ நிகழ்த்திவிடுவாயோ...?என்பதால்-
உன் நெஞ்சுக்கு...நாங்களேதான்
துப்பாக்கிக் குண்டைப் பரிசாகத் தந்தோம்.

"ஒதுக்கப்பட்டவர்கள்"-இல்லாத சமூகம் உருவாக...
"இறைவனின் குழந்தைகள்" (ஹரிஜன்)..என்றொரு...
சமூகத்தையே தந்தாய்.
ஆனால்-இப்போதும் நாங்கள்...
இறைவனின் குழந்தைகளைத் தொடுவதில்லை..
"இறைவனைத்"தொடுவது பாவம்தானே.

நீ விட்டுச் சென்ற...
"அகிம்சை".."சத்தியாக்ரகம்"...எல்லாம்..
எங்களின்-
"சுய முன்னேற்ற"...வழிகள்.
அரை நாள் உண்ணாவிரதமும்..
ஆறு நாள் மரம் வெட்டிப் போட்டும்...
எங்களை---நாங்கள்
முன்னேற்றிக் கொண்டுவிடுவோம்.

"அகண்ட இந்தியா"-வைக் கனவு கண்டு
கொண்டிருந்த உனக்குக் கிடைத்தது என்னமோ-
பாதி இந்தியா-தான்.
நாங்கள் இப்போது அதையும்-
மொழிகளால் பிரித்துக் கொண்டிருக்கிறோம்.

உன் ஐம்பதாண்டுப் போராட்டத்தில்-
நீ அடைந்தது....
ஆங்கிலேயன் இல்லாத பாதி இந்தியா-தான்.
நீ விரும்பிய "சுதந்திர இந்தியா"-இல்லை.

நீ விரும்பிய "சுதந்திரத்தை"-
இந்தியா தன் தோளில் சூடிக் கொள்ள...
நீ மரணத்தின் உறக்கத்தில் இருந்தது போதும்.
நாளை உன் பிறந்த நாள்-
பிறந்து வா!-இந்தியாவின் எந்த மூலையில் இருந்தாவது.

மகாத்மா காந்திக்கு இனிய பிறந்த நாள் வாழ்த்துக்கள்....

அருமையான இன்றைய உண்மை நிலையை மகாத்மாவுடன் ஒப்பிட்டு கூறியது நன்று......நன்றிகள்

ரொம்பவும் நன்றி! பி.ஜி.இராமன்.

ரமேஷ் சார் காந்தி ஏற்க்கனவே எங்காவது பிறந்திருப்பார் நிச்சயமாக ஆனால் இன்னும் அவருக்கு ஒரு ரயில் சம்பவம் நிகழவில்லை என்று நினைக்கிறேன் அது நடக்கும் பொழுது நிச்சயமாக காந்தியாக மாறுவார் கவலைவேண்டாம்

அருமயான பிறந்தநாள் வாழ்த்து

ரொம்பவும் நன்றி! பாலாகார்த்திக்.

சத்திய சோதனை தந்த காந்தி இன்று நடக்கும் நித்திய சோதனையை அனுபவிக்காமல் நிம்மதியாக உறங்கட்டுமே ரமேஷ்.
இந்தியா பாதிநாடாக ஆனதில் அவருக்கும் ப்ங்குண்டு என்பார்கள்.

அழகான வாழ்த்துக்கவிதை ரமேஷ். நானும் வாழ்த்துகிறேன்.

இந்தக் கவிதைக்கு இது நான்காவது முறையாக இடும் பின்னூட்டம்.
ஒவ்வொரு பதிவுக்கும் முக்கால் மணி நேரம் எடுத்து மூன்று நாட்களாகப் பதிவிட்டேன். இன்று தான் ஓஎஸ் மாற்றி பதிவுகளைத் தொடங்கியுள்ளேன்.

ரொம்பவும் நன்றி! ஆதிரா.

rameshnaga wrote:ரொம்பவும் நன்றி! ஆதிரா.

உங்க வலைப்பூ வந்தேன். ஆனால் பின்னூட்டம் இட மின்னஞ்சல் முகவரியெல்லாம் தரவேண்டியிருந்ததால் நேரமின்மை, என் கணிப்பொறி பதிவுக்கு எடுத்துக்கொண்ட நேரம் இரண்டாலும் பின்னூட்டம் இடாமல் திரும்பி விட்டேன். மிக அழகாக வடிவமைத்துள்ளீர்கள்.

Aathira wrote:

rameshnaga wrote:ரொம்பவும் நன்றி! ஆதிரா.

உங்க வலைப்பூ வந்தேன். ஆனால் பின்னூட்டம் இட மின்னஞ்சல் முகவரியெல்லாம் தரவேண்டியிருந்ததால் நேரமின்மை, என் கணிப்பொறி பதிவுக்கு எடுத்துக்கொண்ட நேரம் இரண்டாலும் பின்னூட்டம் இடாமல் திரும்பி விட்டேன். மிக அழகாக வடிவமைத்துள்ளீர்கள்.

அன்புள்ள ஆதிரா..
எனக்குக் கணிப்பொறி குறித்து எதுவும் தெரியாது. வேறு, வேறு தளங்களிலும்..எனது பெயரில்..(ரமேஷ்நாகா)
வேறு சிலர் இருப்பதாக அறிந்தபோது..எனது கவிதைக்கான safety..குறித்தான அச்சத்தை..நான் ஈகரையில் வெளியிட்டிருந்தேன்..எனது பதிவைப் பார்த்த திரு.சிவா சார்..எனக்காக அந்த வலைப்பூவை உருவாக்கித்
தந்தார். அதன் வடிவமைப்பு...மற்ற பிற technical..விஷயங்களின் பெருமை..எல்லாமே திரு.சிவா சாரையே
சேரும். அதில் எனக்கு ஒரு பங்கும் கிடையாது. அந்த வலைப்பூவிற்கு எனது கவிதைகளை ஏற்றித்
தந்து கொண்டிருப்பவரும் திரு சிவா சார்தான். அதனால் அது குறித்தான அத்தனை பாராட்டும் அவரையே சாரும். எனது கவிதைகளைப் படிப்பதற்காக வலைப்பூவிற்கு வருகை தந்த உங்களுக்கு என் மனமார்ந்த நன்றி.