மூடப்படும் அபாயத்தில் எண்ணூர் அனல்மின் நிலையம்

நாற்பதாண்டுகள் பழமையான, எண்ணூர் அனல்மின் நிலையம் மூடப்படும் கட்டத்தை நெருங்கியுள்ளது. 450 மெகாவாட் மின் நிலையத்தில், தினமும் சராசரியாக 30 மெகாவாட் மட்டுமே உற்பத்தியாவதால், மின் துறையினர் அதிர்ச்சியடைந்துள்ளனர்.

எண்ணூர் அனல்மின் நிலையம், கடந்த 40 ஆண்டுகளுக்கு முன் துவங்கப்பட்டது. ஐந்து யூனிட்கள் கொண்ட இந்த நிலையத்தில், முதல் யூனிட் 1971லும், இரண்டாவது யூனிட் 1972லும் தலா 60 யூனிட் தயாரிப்பு திறனுடன் துவங்கியது. தலா 110 மெகாவாட் திறனுள்ள மூன்று யூனிட்கள் முறையே, 1972, 73, 75ம் ஆண்டுகளில் துவங்கப்பட்டன.நிலக்கரி மூலம் மின் உற்பத்தி செய்யும் இந்த நிலையம், தற்போது ஆயுட்காலம் முடிந்த நிலையில் தட்டுத்தடுமாறி இயக்கப்படுகிறது. இதிலுள்ள ஐந்து யூனிட்களில், இரண்டாவது யூனிட்டில் மட்டும் நாள்தோறும் சராசரியாக 30 மெகாவாட் உற்பத்தியாகிறது. மற்ற நான்கு யூனிட்கள் அறிவிக்கப்படாமல் மூடப்பட்டுள்ளன.இதனால், விரைவில் இந்த மின் நிலையமே மூடப்படும் அபாயத்தை எட்டியுள்ளது. தமிழகத்தில் மின் தட்டுப்பாடு அதிகரித்துள்ள நிலையில், இருக்கும் மின் நிலையமே மூடப்படும் நிலைக்கு வந்திருப்பது, மின் துறையினரை அதிர்ச்சியடையச் செய்துள்ளது.

இதுகுறித்து, மின்துறை அதிகாரி ஒருவர் கூறும்போது, ""எண்ணூர் மின் நிலையம் அமைக்கப்பட்டு, 40 ஆண்டுகளாகிவிட்டது. ஒரு மின் நிலையத்தின் ஆயுட்காலமாக, 30 ஆண்டுகள் தான் என, நிர்ணயிக்கப்படுகிறது. பல மின் நிலையங்கள், 30 ஆண்டுகள் கூட சரியாக இயங்குவதில்லை.""ஆனால், எண்ணூர் நிலையத்தை பொறுத்தவரை, 40 ஆண்டுகள் வரை ஓடிக் கொண்டிருப்பதே பாராட்டுக்குரியது. மின் நிலையக் கருவிகள் பல வகைகளில் தேய்மானமாகிவிட்டன. அதனால், நிலக்கரிக்கு பதில், எண்ணெய் பயன்படுத்தி மின் உற்பத்தி செய்யப்படுகிறது. இனி, அவற்றை இயக்கி, அதிக மின் உற்பத்தி மேற்கொள்வது ஆபத்தானது மட்டுமின்றி, அதிக பொருட்செலவையும் ஏற்படுத்தும்,'' என்றார்.

மின் துறையின் மற்றொரு உயரதிகாரி கூறும்போது, ""எண்ணூர் அனல்மின் நிலையம், 2002, 03ம் ஆண்டுகளில், ஆறு விருதுகள் பெற்றுள்ளது. நீண்ட காலமாக விபத்துகளின்றி திறம்பட இயங்கி வருகிறது. ஆயுட்காலம் முடிந்த நிலையில், இந்த நிலையத்தில், வருங்காலத்தில் மின் உற்பத்தியைத் தொடர முடியாது.""அதனால் தான், அதே பகுதியில் புதிய மின் உற்பத்தி நிலையம் கட்ட முடிவெடுத்துள்ளோம். எண்ணூர் மின் நிலையத்திற்கு அருகில், 83 ஏக்கர் நிலப்பரப்பில், 600 மெகாவாட்டில், 3,000 கோடி ரூபாய் மதிப்பில் புதிய அனல் மின் நிலையம் அமைக்கப்படும். இதன் பணிகள், இன்னும் இரு மாதங்களில் துவங்கும்,'' என்றார்.

தமிழகத்தில் தினமும், 650 மெகாவாட்டுக்கும் அதிகமாக மின்சாரம் விலைக்கு வாங்கப்படும் நிலையில், எண்ணூர் மின் நிலையத்தின் இயந்திரங்களை புதுப்பிக்க, ஏன் முயற்சி எடுக்கப்படவில்லை? என்ற கேள்வி எழுகிறது. புதிய மின் நிலையம் அமைத்தாலும், அதில் உற்பத்தியை துவங்க குறைந்தபட்சம் ஐந்தாண்டுகளாகிவிடும்.

தினமலர்