பவானி சாகர் அணை!

வீரப்பன் இருக்கும் வரை பாவனி சாகர் ஆபத்தான இடம். இப்போது பார்க்கப் பார்க்க சலிக்காத அம்சமான இடம். ஈரோட்டிலிருந்து கோபிசெட்டிபாளையம் வருவதற்குள்ளாகவே நம் கண்ணும் மனசும் நிறைந்துவிடுகிறது. அத்தனை பசுமை. தாக்கநாயக்கன்பாளையம் இறங்கு, பங்களாபுதூர் இறங்குனு கண்டக்டர் சொல்லச் சொல்ல நாமம் இறங்கிவிடலாம் என்ற எண்ணம் வருகிறது.

சினிமாக்காரர்களால் சின்ன கோடம்பாக்கம் என்று அழைக்கப்பட்ட கோபியைத் தாண்டி சத்தியமங்கலம் வழியாக பவானிசாகர் வரையிலும் பசுமைப் பயணம். ஒரு லிட்டர் எண்ணெயில் ஆயில்பாத் எடுத்தமாதிரியான கண் குளிர்ச்சி. கர்நாடகாவிலிருந்து வரும் பவானி ஆறும் மேற்குத் தொடர்ச்சி மலையிலிருந்து வரும் மெய்யாறும் சேர்ந்துதான் கண்ணுக்கெட்டிய தூரம் வரை பவானி சாகர் அணை தண்ணீராகக் காட்சி தருகிறது.


அணையைச் சுற்றிலும் மலை. இந்த மலையெல்லாம் வீரப்பனோட ஏரியா. பண்ணாரியில ஆரம்பிச்சு திம்மல் கோபிநத்தம் சாம்ராஜ்நகர்னு எந்த இடத்துல வேணாலும் வீரப்பன் வருவார் போவார்! காட்டு யானைகள் தண்ணீர் குடிப்பதற்காக சில இடத்துல வனத்துறையினர் அணை வரை பாதை அமைத்திருக்கிறார்கள். வீரப்பன் ஏரியாக்காரர் ஒருவர் சொல்லச் சொல்ல சுற்றுலாப் பயணிகள் ஆர்வமாகக் கேட்கிறார்கள்.

அணையின் ஒரு பக்கம் நொய்யாற்றின் அழகையும் அதைச் சுற்றியுள்ள பசுமையையும் மறுபக்கம் மலையையும் அதைச் சூழ்ந்துள்ள தண்ணீரையம் பார்த்துக் கொண்டே நடந்தால் சின்னத்தம்பியில் வரும் மலைக் கோயில் படிகளை வரிசை வரிசையாகக் கட்டி, சிறு குன்றுபோல் அமைத்து அதில் விநாயகர் கோயில் இருப்பது பார்ப்பதற்கம் கொள்ளை அழகு.
இந்த விநாயகரை பிரபுவும் குஷ்புவும் கும்பிட்டுவிட்டுப் போனார்கள். சின்னத்தம்பி மாபெரும் வெற்றி. நீங்களும் கும்பிட்டுவிட்டுப் போங்க. வாழ்க்கை நல்லா சுகமா இருக்கும். படிக்கட்டில் உட்கார்ந்து கொண்டு ஒருவர் சொல்லிக் கொண்டிருக்க வந்தவர்கள் பயபக்தியுடன் விநாயகரை வேண்டுகிறார்கள். அணையை முழுமையாகக் கண்டு ரசித்த திருப்தியுடன் கீழே இறங்கினால் வகை வகையான மீன்கள் சுடச் சுட பொரித்துத் தருகிறார்கள்.

தமிழக மீன் வளர்ச்சிக் கழகம் கிலோ 70 ரூபாய்க்கு விற்கிறார்கள். பொரித்து தரும் கூலி 70 ரூபாய். அதற்கென அருகிலேயே தனியாக ஆள் இருக்கிறார்கள். மீன் சாப்பாட்டை ஒரு கை பார்த்துவிட்டு அணையின் கீழே சென்றால் 15 ஏ“கரில் பசுமையான அழகான பூங்கா. குட்டீஸ்கள் விளையாட புல்வெளி குடும்பத்துடன் விளையாட பல்வேறு விளையாட்டு சாதனங்கள். சலிக்க சலிக்க விளையாடிவிட்டு அணையின் அருகிலேயே நிற்கம் டவுன் பஸ்சில் ஏறி 3 ரூபாய் டிக்கெட் வாங்கினால் கொடிவேறி.


தடுப்பணையிலிருந்து வழிந்து வரும் தண்ணீரில் ஆசை தீர ஆனந்தக் குளியல் போட்டுவிட்டு விருப்பமிருந்தால் 10 கி.மீ தூரமுள்ள புகழ்பெற்ற பண்ணாரி மாரியம்மன் கோயிலுக்குச் சென்று மனதை அமைதியாக்கிவிட்டு ஈரோடு பஸ் ஏறினால் அட இன்னும் இவ்வளவு பணம் மிச்சமிருக்கிறதே என்று சந்தோஷப்படுவீர்கள்.












குமுதம்

நல்ல தகவல்..இப்பவே கிளம்பிரா மீனு ,பெரிய செலவே இல்லாம இதெல்லாம் பார்க்கலாம் என்றால் யார்தான் போக மாட்டார்கள் ..