வாச்சாத்தி பாலியல் வழக்கு: வனத்துறை அதிகாரிகள் 12 பேருக்கு 10 ஆண்டு சிறை

தர்மபுரி மாவட்டம் அரூர் அருகே உள்ள வாச்சாத்தி மலைக்கிராமத்தில் கடந்த 1992-ம் ஆண்டில் வனத்துறை, காவல் துறை, வருவாய்த்துறை ஆகிய துறைகளைச் சேர்ந்த கூட்டுக் குழுவினர் சந்தன மரம் கடத்தல் புகார் தொடர்பாக சோதனை நடத்தினார்கள்.

அப்போது மலைவாழ் மக்கள் சமூகத்தைச் சேர்ந்த 18 பெண்கள் கற்பழிக்கப்பட்டதாக புகார் எழுந்தது. இந்தப்புகார் குறித்து சி.பி.ஐ. போலீசார் விசாரணை நடத்தினார்கள். சுமார் 19 ஆண்டுகளாக பல்வேறு கோர்ட்டுகளில் நடந்த இந்த வழக்கின் இறுதிக்கட்ட விசாரணை தர்மபுரி மாவட்ட செசன்சு கோர்ட்டில்கடந்த ஜுலை மாதம் முதல் நடந்தது. கடந்த 26-ந்தேதி தீர்ப்பு வழங்கப்படும் என்று அறிவிக்கப்பட்டது.

அன்று குற்றம் சாட்டப்பட்ட 216 பேரில் வனத்துறையைச் சேர்ந்த அங்கமுத்து. ராஜானந்தம், ராமதாஸ் ஆகிய 3 பேர் மட்டும் ஆஜர் ஆகவில்லை. இதனால் தீர்ப்பை 29ந்தேதிக்கு நீதிபதி குமரகுரு தள்ளிவைத்தார். கோர்ட்டில் ஆஜர் ஆகாத 3 பேருக்கும் பிடிவாரண்டு பிறப்பிக்கப்பட்டது. அவர்கள் நேற்று முன்தினம் ஆஜரானார்கள்.

இதைத் தொடர்ந்து பிடிவாரண்டு ரத்து செய்யப்பட்டது. அவர்களும் இன்று (29-ந்தேதி) ஆஜராக வேண்டும் என்று நீதிபதி குமரகுரு உத்தரவிட்டார். இன்று காலை தீர்ப்பு வழங்கப்படும் என்று நீதிபதி குமரகுரு அறிவித்ததைத் தொடர்ந்து இன்று காலை தர்மபுரி கோர்ட்டில் பலத்த பாதுகாப்பு போடப்பட்டு இருந்தது. துணை போலீஸ் சூப்பிரண்டு சந்தான பாண்டியன் தலைமையில் நூற்றுக்கும் மேற்பட்ட போலீசாரும், பெண்அதிரடிப்படை போலீசாரும் குவிக்கப்பட்டு இருந்தனர்.

இன்று காலை 10 மணிக்கு நீதிபதி குமரகுரு வந்தார். பின்னர் குற்றம் சாட்டப்பட்டு இருந்த 216 பேரும் கோர்ட்டில ஆஜர் ஆனார்கள. அவர்களது பெயர் வரிசையாக வாசிக்கப்பட்டது. ஒவ்வொருவராக கோர்ட்டு கூண்டில் ஏறியதும், அவர்கள் குற்றவளிகள் என்று நீதிபதி அறிவித்தார். அவர்கள் மீது என்னென்ன பிரிவுகளில் குற்றம் நிரூபிக்கப்பட்டு உள்ளது என்றும் நீதிபதி அறிவித்தார்.

சிலர் மீது இந்திய தண்டனை சட்டம் 146,147,323,355,347 ஆகிய பிரிவுகளிலும், சிலர் மீது பட்டியலில் கண்ட சாதியினர் மற்றும் பழங்குடியினர் வன்கொடுமை தடுப்பு சட்டம் 1989 பிரிவு 3-ல் சப்கிளாஸ் (2), (3), 3(1),(10), 3(1), (5)ஆகிய சட்டங்களில் குற்றச்சாட்டுகள் நிரூபிக்கப்பட்டு உள்ளது என்று நீதிபதி அறிவித்தார். பகல் 1.30 மணி வரை 216 பேரும் குற்றவாளிகள் என்று நீதிபதி அறிவித்தார்.

குற்றவாளி என்று தீர்ப்பளிக்கப்பட்ட 216 பேரில் 4 பேர் ஐஎப்எஸ் அதிகாரிகள் ஆவார்கள். இதில் ஒருவர் மண்டல வன பாதுகாவலர் ஹரிகிருஷ்ணன் ஆவார். தாசில்தார், டி.எஸ்.பி. உள்பட அதிகாரிகளும் குற்றவாளிகள் என்று தீர்ப்பளிக்கப்பட்டுள்ளது. யார்- யாருக்கு என்ன தண்டனை என்ற விவரத்தை நீதிபதி இன்று பிற்பகலில் அறிவிக்கப்படும் எனக்கூறினார்.

அதன்படி பிற்பகல் தண்டனை அறிவிக்கப்பட்டது. அறிவிக்கப்பட்ட தண்டனை விவரம் வருமாறு:-

கற்பழிப்பு வழக்கில் குற்றம் சாட்டப்பட்ட 17 பேரில் 12 பேருக்கு பத்து மற்றும் ஏழு என பதினேழு ஆண்டுகள் ஏக ‌காலத்தில் பத்தாண்டு சி‌றைத்தண்‌டனையும், 5 பேருக்கு ஏழு ஆண்டு சிறையும் ரூ 2 ஆயிரம் அபராதமும் விதிக்கப்பட்டது. அருணாச்சலம், ஆறுமுகம், ராஜகோபால், ராஜா, கோவிந்தன், ரத்தினவேலு, வேடியப்பன், சிதம்பரம், பெருமாள், அழகிரி, காளியப்பன் மற்றும் ஜானகிராமன் ஆகிய 12 பேருக்கு பத்தாண்டு மற்றும் ஏழாண்டுகள் சிறை தண்டனையும், ரூ. 3 ஆயிரம் அபராதமும், ஏனைய பெரிய நாயகம், பச்சையப்பன், பெருமாள், பழனி மற்றும் மாலையன் ஆகிய 5 பேருக்கு 7 ஆண்டுகள் சிறை தண்டனையும், ரூ. 2 ஆயிரம் அபராதமும் விதிக்கப்பட்டது.

தண்டனை விதிக்கப்பட்ட 17 பேரும் உடனடியாக ரிமாண்ட் செயயப்பட்டு ஜெயிலுக்கு அனுப்பி வைக்கப்பட்டனர்.

மாலைமலர்

இதெற்கெல்லாம் தண்டனைகள் இன்னும் அதிகப்படுத்த வேண்டும்... 1000, 2000 அபராதம் போட்டுகிட்டு...

மிக நீண்ட காலமாக நடைபெற்ற இவ்வழக்கு இப்ப தான் முடிவுக்கு வந்திருக்கிறது. ஊடகங்கள் இதை இதுநாள் வரை மறைத்து வைத்திருந்தது.