ஒரு லட்ச ரூபாய் கொடுத்தால், ஒரு கோடி ரூபாய் : கோடிக்கணக்கில் மோசடி செய்தவர்கள் மீது புகார்

சென்னை: ஒரு லட்ச ரூபாய் கொடுத்தால், ஒரு கோடி ரூபாய் கொடுப்பதாகக் கூறி, பல கோடிகளை சுருட்டியவர்கள் மீது, போலீஸ் கமிஷனரிடம் புகார் தரப்பட்டுள்ளது. வெளிநாட்டு வாழ் இந்தியர்களின் பணம் கோடிக்கணக்கில் இருப்பதாகவும், அதை இந்திய ரூபாய்க்கு மாற்ற வேண்டும். அதனால், குறைந்தபட்ச முதலீடாக ஒரு லட்ச ரூபாய் கொடுத்தால், ஒரு கோடி ரூபாய் கிடைக்கும் என ஆசைக் காட்டி, தன்னை போல் பலரிடம் ஜெயபால் என்பவர், கோடிக்கணக்கான ரூபாய் மோசடி செய்ததாக சூளைமேடு, சுப்பாராவ் நகரில் வசிக்கும் சுரேஷ்பாபு, காஞ்சிபுரம் மாவட்டத்தைச் சேர்ந்த குணசேகரன் உள்ளிட்ட பலர், சென்னை பெருநகர கமிஷனரகத்தில் நேற்று புகார் மனு அளித்தனர்.

சுரேஷ்பாபு அளித்த புகாரில் கூறப்பட்டுள்ளதாவது: மேற்கு தாம்பரம், நாகரத்தினம் நகரில் வசிப்பவர் ஜெயபால். இவருடைய புரோக்கர்களாக அறிமுகமான ரங்கநாதன், மால்துரை, வேதமுத்து, பலராமன், சாம்பசிவம் மற்றும் ஏழுமலை உள்ளிட்டவர்கள், தங்களிடம் வெளிநாட்டு வாழ் இந்தியர்களின் பணம், கோடிக்கணக்கில் இருப்பதாக கூறினர். ஒரு லட்ச ரூபாய் கொடுத்தால், அதற்கு பதிலாக ஒரு கோடி ரூபாய் தருவதாக கூறினர். ஆதாரமாக வங்கியின் பெயரில் போலியாக தயாரிக்கப்பட்ட ஒப்பந்த பத்திரங்களை காட்டினர். இதை நம்பி, என்னைப் போன்ற பல பேர், 30 ஆயிரம் ரூபாய் முதல் ஒரு லட்ச ரூபாய் வரை ஜெயபாலிடம் கொடுத்தோம். மேலும், பணம் கட்டுவதற்கு ஆட்களை சேர்த்து விட்டால், அதற்கும் தனியாக கமிஷன் தரப்படும் என்றனர். இதனால், காஞ்சிபுரம் மாவட்டத்தை சேர்ந்த குணசேகரன் என்பவர், 15 பேரை அறிமுகப்படுத்தி, ஏழு லட்ச ரூபாய் கட்டியுள்ளார். 2006ல் பணத்தை கொடுத்தோம். அதற்கு பதிலாக, 2007 மற்றும் 2008ல் ஒரு கோடி, 10 மற்றும் 20 கோடி ரூபாய் மதிப்பிலான காசோலைகளை கொடுத்தனர். குறிப்பிட்ட வங்கியின், நங்கநல்லூர் கிளையில் காசோலையை கொடுத்த போது, அவர்கள், "இவ்வளவு பணத்தை யாரும் காசோலையில் எழுதி தர மாட்டார்கள், உங்களை யாரோ ஏமாற்றியுள்ளனர், காசோலையை எடுத்துக் கொண்டு, இங்கிருந்து போய் விடுங்கள்' என்றனர். மேலும் வங்கி கணக்கு, பார்வதி என்பவர் பெயரில் இருந்தது தெரிந்தது. நாங்கள் ஏமாற்றப்பட்டதை உணர்ந்தோம். இதுகுறித்து, ஜெயபால் மற்றும் புரோக்கர்களிடம் கேட்க சென்றால், மொபைல் இணைப்பு அனைத்தும் துண்டிக்கப்பட்டு இருந்தது. சம்பந்தப்பட்டவர்களை கண்டுபிடித்து, எங்கள் பணத்தை பெற்றுத் தர வேண்டும். இவ்வாறு புகாரில் கூறப்பட்டுள்ளது. புகாரை பெற்ற கமிஷனரக அதிகாரிகள், சம்பந்தப்பட்ட புகாரை தாம்பரம் போலீசாருக்கு அனுப்பி வைத்துள்ளனர்.

தினமலர்