உயிருக்கு போராடிய முன்னாள் ராணுவ வீரர் : ரோட்டிலேயே சிகிச்சை அளித்தார் கலெக்டர்

சாலையில் மயங்கி விழுந்து, ரத்தக் கசிவுடன் உயிருக்கு போராடிய முன்னாள் ராணுவ வீரரை, கலெக்டர் மற்றும் மாநகர போலீஸ் நுண்ணறிவுப் பிரிவு இன்ஸ்பெக்டர் ஆகியோர் மீட்டு, தனியார் மருத்துவமனையில் சேர்த்தனர்.


சேலம் மாவட்டம், நீலவரப்பட்டியைச் சேர்ந்தவர் சுந்தரசாம்பசிவம்(63); முன்னாள் ராணுவ வீரர். ஆலாந்துறையில் உள்ள ஈசா யோக மையம் செல்ல கோவை வந்த இவர், மாநகரில் செஞ்சிலுவைச் சங்கம் அருகிலுள்ள ஜவான்ஸ் பவனில் தங்கினார். நேற்று காலை அங்கிருந்து வெளியே வந்த இவர், திடீரென நிலைதடுமாறி ரோட்டில் மயங்கி விழுந்தார். நெற்றி மற்றும் மூக்கில் இருந்து ரத்தம் வழிந்தபடி கைகால்கள் இழுத்துக் கொண்டன; இச்சம்பவம் நேற்று காலை 10.15 மணிக்கு நடந்தது. அவ்வழியாகச் சென்ற பலரும் வேடிக்கை பார்த்து சென்றனரே தவிர, உதவி செய்ய முன்வரவில்லை. அப்போது, அவ்வழியாக ஜீப்பில் சென்ற மாநகர போலீஸ் நுண்ணறிவுப் பிரிவு இன்ஸ்பெக்டர் பாலமுருகன், இறங்கிச் சென்று சாலையில் சுருண்ட நிலையில் கிடந்து உயிருக்கு போராடிய முதியவருக்கு முதலுதவி அளிக்க முயற்சித்தார்.நெற்றிப் பகுதியிலும் மூக்கிலும் ரத்தம் வழிந்து கொண்டிருந்தது. அதிர்ச்சியடைந்த அவர், தனியார் மருத்துவமனை ஆம்புலன்சுக்கு போன் செய்தார். இதனால், அங்கு மக்கள் கூட்டம் கூடியது.


அப்போது, அவ்வழியாக காரில் சென்ற கலெக்டர் உமாநாத், காரை நிறுத்தி இறங்கினார். இவர் டாக்டர் என்பதால், உயிருக்கு போராடிய முதியவரின் நாடித் துடிப்பை சோதித்து பார்த்து, ரோட்டிலேயே முதலுதவி சிகிச்சை அளித்தார்.ரத்தம் நின்றதும், சில நிமிடங்களில் முதியவருக்கு நினைவு திரும்பியது. அவரிடம் விசாரித்த போது, பாக்கெட்டில் இருந்த முன்னாள் ராணுவ வீரருக்கான அடையாள அட்டையை எடுத்து காண்பித்தார். அதில், பெயர் மற்றும் ஊர், போன் விவரங்கள் இருந்தன. மொபைல் போனில் அவரது மனைவிக்கு தகவல் தெரிவிக்கப்பட்டது. அதற்குள், தனியார் மருத்துவமனை ஆம்புலன்ஸ் வந்துவிடவே, முன்னாள் ராணுவ வீரரை அதில் ஏற்றி சிகிச்சைக்கு அனுப்பி வைத்தனர்.உயிருக்கு போராடிய முன்னாள் ராணுவ வீருக்கு, ரோட்டிலேயே சிகிச்சை அளித்த கலெக்டர் உமாநாத், போலீஸ் இன்ஸ்பெக்டர் பாலமுருகன் ஆகியோரை, பொதுமக்கள் பாராட்டினர்.

மீனுவும் பாராட்டுகிறேன் ..குட் ஜொப்