எனது தொகுதியினர் முன்பு நான் சிகரெட் பிடித்ததில்லை,: துரைமுருகன் பேச்சு

kitcha · kitcha Sun Sep 25, 2011 9:10 pm

புதுச்சேரியில் முதலியார்பேட்டை தொகுதி தி.மு.க. சார்பில் முப்பெரும் விழா பொதுக்கூட்டம் வானொலி திடலில் நடந்தது. இந்த கூட்டத்திற்கு முன்னாள் எம்.எல்.ஏ. டாக்டர் எம்.ஏ.எஸ். சுப்பிரமணியன் தலைமை தாங்கினார். அமைப்பாளர்ரகோத்தமன் ஆகியோர் முன்னிலை வகித்தனர்.

கூட்டத்தில் முன்னாள் அமைச்சரும், தி.மு.க. துணை பொது செயலாளருமான துரைமுருகன் எம்.எல்.ஏ. கலந்து கொண்டு பேசினார்.

அப்போது அவர், ‘’ இங்கே பேசியவர்கள் புதுவையில் தி.மு.க.வின் தோல்வியைப்பற்றி பேசினர். தமிழகத்தில் நாங்களும்தான் தோற்றோம்.

அதுவும் தோல்வி இதுவும் தோல்வியா? நீங்கள் ஒரு தமிழனிடம் அதுவும் பிற்படுத்தப்பட்ட தமிழனிடம் தோற்று இருக்கின்றீர்கள். குட்டு பட்டாலும் மோதிர கையால் குட்டு பட்டிருக்கின்றீர்கள்.

எம்.எல்.ஏ. இந்த தொகுதிக்கு எவ்வளவோ செய்திருக்கின்றார். ஆனால் மக்கள் மறந்து விட்டார்கள் என்று இங்கே பேசினார்கள் நாங்களும்தான் கொடுத்தோம்.

கலர் டி.வி., கியாஸ் அடுப்பு, சைக்கிள் என்று நிறைய செய்தோம். மக்கள் நாங்கள் செய்வதை கடமை என்று நினைத்து விட்டார்கள். மக்கள் இன்னமும் திருந்தவில்லை. அரசியலுக்காக மட்டும் இந்த இயக்கம் தோன்றவில்லை. அரசியலுக்காக மட்டும் தோன்றிய கட்சிகளெல்லாம் அழிந்து போய்விட்டது.

பல கட்சிகள் தேர்தலுக்கு பிறகு அழிந்து போகும். தோற்ற பிறகும் தி.மு.க. நிலைத்து நிற்கக் கூடிய கட்சி. லட்சியத்தை காப்பாற்ற இளையதலை முறையினருக்கு பெரியோர்கள் வழிவிட வேண்டும். தொகுதியில் மக்கள் நம்மை பிரித்து பார்க்க கூடாது.

நான் எனது தொகுதிக்குள் கூலிங்கிளாஸ் அணிந்ததே இல்லை. காரில் போகும்போது கார்கண்ணாடியை ஏற்றி விட்டு கொண்டும் போவதில்லை. காரில் போகும்போது என் தொகுதி மக்களுக்கு கை காட்டிக் கொண்டே தான் செல்வேன். தொகுதியை கோவிலாக நினைக்க வேண்டும்.

சிகெரட் பிடிக்கும் பழக்கம் எனக்கு முன்பு இருந்தபோது கூட எனது தொகுதியினர் முன்பு நான் சிகரெட் பிடித்ததில்லை. எங்களது ஆட்சியில் அடுப்பு, டி.வி., 1 ரூ அரிசி தொகுதிதோறும் வீடுகட்டி கொடுத்தோம். ஆனால் மக்கள் எங்களை மறந்து விட்டனர்.

அண்ணா சொன்னது போல ஒரே கட்சி ஆட்சி இருந்தால் சர்வாதிகாரம் வந்து விடும். தோசைக்கு இரண்டு பக்கம் இருப்பது போல ஆளும் கட்சி, எதிர்கட்சி என்று இருந்தால்தான் நன்றாக இருக்கும். மக்கள் எங்களுக்கு எதிர்கட்சி அந்தஸ்து கூட இல்லாமல் செய்து விட்டனர்.

தற்போது தலைவர் கலைஞர் தி.மு.க.தனித்து போட்டி என்று கூறியுள்ளார். அதை கண்டவுடன் அனைத்து கட்சிகளுமே தனித்தனியாக நிற்பதாக கூறியுள்ளது.

தனித்தனியாக நிற்பது கஷ்டம் அநேக கட்சிகளுக்கு தேர்தலில் நிற்பதற்கு ஆட்கள் தேவை என்ற நிலைதான் உள்ளது. எங்கள் மீது மாறி மாறி வழக்கு போட்டு ஜெயிலில் தள்ளுகிறார்கள். அடுத்ததாக நாம்தான் வெற்றி வாகை சூடி ஆட்சியமைக்க போகிறோம்’’என்று பேசினார்.

நக்கீரன்

எனது தொகுதியினர் முன்பு நான் சிகரெட் பிடித்ததில்லை,: துரைமுருகன் பேச்சு

எனது தொகுதியினர் முன்பு நான் சிகரெட் பிடித்ததில்லை,: துரைமுருகன் பேச்சு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக