தீவிரவாத அமைப்பான உல்பா தலைவர் பரேஷ் பரூவா; வங்காளதேசத்தில் ரூ.100 கோடி முதலீடு

புதுடெல்லி, செப். 23-

தீவிரவாத இயக்கமாக அறிவிக்கப்பட்ட உல்பா அமைப்பின் தலைவர் பரேஷ் பரூவா வங்காளதேசத்தில் ரூ.100 கோடி அளவுக்கு முதலீடு செய்திருப்பதாக ஆதாரபூர்வ தகவல்கள் வெளியாகி உள்ளன. அசாம் மாநிலத்தில் செயல்பட்டு வரும் “உல்பா” அமைப்பு தீவிரவாத இயக்க பட்டியலில் உள்ளது. இந்த இயக்கத்தின் கமாண்டராக பரேஷ் பரூவா உள்ளார். வர்த்தகத்தில் அதிக ஆர்வம் கொண்ட இவர் போலியான பெயர்களில் வங்காளதேசத்தில் பல்வேறு நிறுவனங்களில் முதலீடு செய்துள்ளதாக அங்கிருந்து வெளியாகும் பத்திரிகை ஒன்று ஆதாரபூர்வமான தகவல்களை வெளியிட்டுள்ளது.

அந்த பத்திரிகையில் தெரிவிக்கப்பட்டுள்ள தகவல்களின்படி பரூவாவின் முதலீட்டு மதிப்பு ரூ.100 கோடியாகும். பத்திரிகையில் வெளியாகி உள்ள விவரங்கள் வருமாறு:-

இந்தியாவில் தீவிரவாத இயக்கத்தின் தலைவர் என்று வர்ணிக்கப்படும் பரேஷ் பரூவா, வங்காளதேசத்தில் பல்வேறு துறைகளில் போலியான பெயர்களில் முதலீடுகள் செய்துள்ளார். ரியல் எஸ்டேட், சுகாதார நிறுவனங்கள், ஜவுளி நிறுவனங்கள், கப்பல் நிறுவனங்கள், மின் உற்பத்தி திட்டங்கள் மற்றும் உணவு விடுதிகள் போன்றவற்றில் பரூவா முதலீடுகள் செய்துள்ளார். இந்த முதலீடுகளின் மதிப்பு ரூ.100 கோடி ஆகும். மொத்த முதலீடுகளில் டாக்காவை சேர்ந்த 3 ரியல் எஸ்டேட் நிறுவனங்கள் மட்டும் செய்துள்ள முதலீடுகளின் மதிப்பு ரூ.70 கோடி ஆகும். இந்த முதலீடுகள் பிரபல லண்டன் தொழில் அதிபர் குருஜ்ஜமான் பெயரில் செய்யப்பட்டுள்ளன. இதை தவிர துபாய் தொழில் அதிபர் ஜுமேன் பெயரில் டாக்காவில் உள்ள சம்ரிட்டா மருத்துவமனையில் ரூ.10 கோடி முதலீடு செய்துள்ளார். இது அந்த மருத்துவமனையின் மொத்த பங்கு மதிப்பில் 30 சதவீகிதம் ஆகும்.

இதேபோல் கஸேம் ஜவுளி நிறுவனத்திலும் சவுத்ரி கப்பல் நிறுவனத்திலும் பரூவா 30 சதவிகித பங்குகளை வைத்துள்ளார். புகழ் பெற்ற சீன உணவு விடுதியான “விம்பிரே”யில் ரூ.50 லட்சம் முதலீடு செய்திருக்கிறார். இவ்வாறு அந்த பத்திரி கையில் தெரிவிக்கப்பட்டுள்ளது.

இந்த விவரங்களின் அடிப்படையில் இந்திய உளவு நிறுவனங்கள் விரிவான அறிக்கை ஒன்றை தயாரித்துள்ளன. அதை வங்காளதேச அரசுக்கு அனுப்பி வைத்துள்ளது. உளவு துறையின் மூலம் இந்த தகவல்களை உறுதிபடுத்தி விவரங்களை அளிப்பதாக வங்காளதேச நிர்வாகம் இந்தியாவுக்கு உறுதி அளித்துள்ளது. மாலைமலர்