கடலூர் மத்திய சிறையில் ஆயுள் கைதி அடித்துக்கொலை

கடலூர் : கடலூர் மத்திய சிறையில் நேற்று முன்தினம் நள்ளிரவு தூங்கி கொண்டிருந்த ஆயுள் தண்டனை கைதியை, மற்றொரு கைதி அடித்து கொன்ற சம்பவம் பரபரப்பை ஏற்படுத்தியுள்ளது. கடலூர் மத்திய சிறையில் 830 தண்டனை கைதிகளும், 420 விசாரணை கைதிகளும் உள்ளனர். ஆயுள் தண்டனை கைதிகள் 8வது பிளாக்கில் அடைக்கப்பட்டுள்ளனர். அந்த பிளாக்கில் நேற்று முன்தினம் நள்ளிரவு 12 மணிக்கு திடீரென்று அலறல் சத்தம் கேட்டது. சிறை வார்டன்கள் சம்பவ இடத்துக்கு விரைந்தனர். அங்குள்ள ஒரு அறையில் கைதி ஒருவர் ரத்த வெள்ளத்தில் கீழே கிடந்தார். அவர் மேல் அமர்ந்தபடி மற்றொரு கைதி சாப்பாட்டு தட்டால் அடித்தபடி இருந்தார்.

ஆவேச தாக்குதல் நடத்திய கைதியை சிறை வார்டன்கள் போராடி அப்புறப்படுத்தினர். அதன் பின்னர் ரத்த வெள்ளத்தில் கிடந்த கைதியை மீட்டனர். தலையில் படுகாயம் அடைந்து உயிருக்கு போராடிய அவரை உடனடியாக கடலூர் அரசு மருத்துவமனைக்கு கொண்டு சென்றார். ஆனால் செல்லும் வழியிலேயே அவர் உயிரிழந்தார். இது தொடர்பாக சிறை கண்காணிப்பாளர் சண்முகசுந்தரம், கடலூர் முதுநகர் காவல்நிலையத்தில் புகார் அளித்தார். போலீசார் கொலை வழக்கு பதிவு செய்து தீவிர விசாரணை நடத்தி வருகின்றனர். இச்சம்பவம் சிறைக்குள் பதற்றத்தை ஏற்படுத் தியது.

விசாரணையில், இறந்த கைதி, விழுப்புரம் ராஜாகோவில் தெருவை சேர்ந்த கந்தவேல்(34). இவர் பண்ருட்டியில் நடந்த கொலை வழக்கில் ஆயுள் தண்டனை பெற்று கடந்த 9-4-2005 முதல் சிறை தண்டனை அனுபவித்து வந்தார். அவரை தாக்கியவர் சென்னை செயின்ட் தாமஸ் மவுண்டை சேர்ந்த ஐயனார்(31). இவரும் திருவெண்ணைநல்லூரில் நடந்த கொலை வழக்கில் ஆயுள் தண்டனை பெற்று கடந்த 16-3-2007 முதல் சிறை தண்டனை அனுபவித்து வருகிறார் என்பது தெரியவந்தது.

சிறை அதிகாரிகள் கூறுகையில், ‘’ஆயுள் தண்டனை கைதிகள் கந்தவேலும், ஐயனாரும் மனஅழுத்த நோய்க்கு கீழ்பாக்கம் மருத்துவமனையில் சிகிச்சை பெற்றவர்கள். இந்நிலையில் தூங்கிக் கொண்டிருந்த கந்தவேலை, ஐயனார் தாக்கியதில் அவர் உயிரிழந்துள்ளார். ஏன் தாக்கினார் என்பதற்கான விசாரணைக்கு ஐயனார் பதில் எதுவும் கூறவில்லை. தொடர்ந்து மவுனம் சாதித்து வருகிறார்’’ என்றார்.

தினகரன்