அமெரிக்காவில் பொலிஸ்காரரை படுகொலை செய்த நபருக்கு 22 வருடங்களின் பின் மரணதண்டனை நிறைவேற்றம் _

by kING Fri Sep 23, 2011 2:22 pm

அமெரிக்க ஜோர்ஜிய மாநிலத்தில் பொலிஸ் உத்தியோகத்தர் ஒருவரை படுகொலை செய்த குற்றச்சாட்டில் ரோய் டேவிஸ் என்ற 42 வயது நபருக்கு புதன்கிழமை இரவு மரண தண்டனை நிறைவேற்றப்பட்டது.

1989 ஆம் ஆண்டு பொலிஸ் உத்தியோகத்தரான மார்க் மக்பாயில் என்பவரை சுட்டுக் கொன்றமைக்காகவே அவருக்கு மரணதண்டணை நிறைவேற்றப்பட்டது.

ஏற்கெனவே நிர்ணயிக்கப்பட்டதற்கு இணங்க இரவு 7.00 மணிக்கு அவரது மரணதண்டனையை நிறைவேற்ற ஜோர்ஜிய அதிகாரிகள் தயாரான வேளை, இறுதி நேரத்தில் அமெரிக்க உச்ச நீதிமன்றத்தில் தாக்கல் செய்யப்பட்ட கருணை மனுவால் அவரது மரண தண்டனை நிறைவேற்றம் 3 மணி நேரம் காலதாமதமாகியது.

ஜோர்ஜிய உச்ச நீதிமன்றம் புதன்கிழமை மாலை 5.00 மணிக்கு ரோய் டேவிஸின் இறுதி மேன்முறையீட்டை நிராகரித்த நிலையில், அவரது சட்டத்தரணிகள் அமெரிக்க உச்ச நீதிமன்றத்துக்கு கடைசி நிமிடத்தில் மேற்படி கருணை மனு கோரிக்கையை அனுப்பியிருந்தனர். இந்நிலையில் இந்த கருணை மனுவை பரிசீலிக்கும் வரை அம்மரணதண்டனை நிறை வேற்றத்தை நிறுத்த அமெரிக்க உச்ச நீதிமன்றம் ஜோர்ஜிய அதிகாரிகளை கோரியது.

அமெரிக்க உச்ச நீதிமன்றத்தின் தீர்ப்புக்கு காத்திராது மரணதண்டனையை நிறைவேற்றும் உரிமை ஜோர்ஜிய அதிகாரிகளுக்கு இருந்த போதும், அவர்கள் உச்ச நீதிமன்றத்தின் தீர்ப்பிற்குக் காத்திருந்தனர்.

எனினும், இரவு 10.18 மணிக்கு அமெரிக்க உச்ச நீதிமன்றம் டேவிஸின் கருணை மனு கோரிக்கையை நிராகரித்துள்ளமை தொடர்பில் அறிவிக்கப்பட்டது. ரோய் டேவிஸின் மரணதண்டனை நிறைவேற்றத்தை முன்னிட்டு ஜோர்ஜியாவின் ஜக்ஸன் சிறைச்சாலைக்கு வெளியே என்றுமில்லாதவாறு பாதுகாப்பு பலப்படுத்தப்பட்டிருந்தது.

ஏற்கெனவே, அன்றைய தினம் அந்த சிறைச்சாலைக்கு வெளியே ரோய் டேவிஸின் ஆதரவாளர்கள் ஆர்ப்பாட்டத்தில் ஈடுபட்டனர். 1989 ஆம் ஆண்டு இடம்பெற்ற படுகொலை தொடர்பில் 1991 ஆம் ஆண்டே ரோய் டேவிஸ் மீது குற்றச்சாட்டு சுமத்தப்பட்டது. மரணதண்டனை விதிக்கப்படும் இறுதிக் கட்டம் வரை தான் குற்றமற்ற ஒருவர் என ரோய் டேவிஸ் வாதிட்டார்.

""என்னிடம் துப்பாக்கி இருக்கவில்லை. எனது உயிரை எடுக்க விரும்புபவர்களை கடவுள் மன்னிப்பாராக'' என அவர் கூறினார். இதனையடுத்து ரோய் டேவிஸுக்கு விஷ ஊசி ஏற்றி மரணதண்டனை நிறைவேற்றப்பட்டது. விஷ ஊசி ஏற்றி 15 நிமிடங்கள் கழித்து (அமெரிக்க நேரப்படி இரவு 11.08 மணி) ரோய் டேவிஸ் இறந்துவிட்டதாக அறிவிக்கப்பட்டது. _