சச்சின் கருத்துக்கு டிராவிட் மற்றும் மலிங்கா ஆதரவு

சச்சின் கருத்துக்கு டிராவிட் மற்றும் மலிங்கா ஆதரவு
[ வெள்ளிக்கிழமை, 23 செப்ரெம்பர் 2011, 06:24.34 மு.ப GMT ]
ஒருநாள் போட்டிகளில் மாற்றம் செய்ய வேண்டும் என்ற சச்சினின் கருத்துக்கு இந்திய அணியின் சீனியர் வீரர் டிராவிட் ஆதரவு தெரிவித்துள்ளார்.

டிராவிட் ஆதரவு: ஒருநாள் போட்டிகள் தொடர்ந்து பிரபலமாக நீடிக்க பல புதிய மாற்றங்களை அமல்படுத்த வேண்டும் என இந்திய அணியின் மாஸ்டர் துடுப்பாட்டக்காரர் சச்சின், சர்வதேச கிரிக்கட் கவுன்சிலிடம்(ஐ.சி.சி) தெரிவித்து இருந்தார். இதற்கு ஐ.சி.சி சார்பில் உடனடியாக மறுப்பு தெரிவிக்கப்பட்டது.

இதுகுறித்து டிராவிட் கூறியது: ஒருநாள் போட்டிகளை நான்கு இன்னிங்சாக பிரித்து விளையாட வேண்டும் என்ற சச்சினின் கருத்து வரவேற்கத்தக்கது.

இதுபோன்ற முறையில் அவுஸ்திரேலியாவில் ஏற்கனவே போட்டிகள் நடந்துள்ளன. இதிலுள்ள நன்மை, தீமைகள் குறித்தும் ஏற்கனவே தெரியும். இந்நிலையில் சச்சினின் கருத்தை ஐ.சி.சி நிராகரித்தது ஏன் என தெரியவில்லை.

தற்போதுள்ள அம்பயர் தீர்ப்பு மறுபரிசீலனை(டி.ஆர்.எஸ்) முறை குறித்து பல்வேறு கேள்விகள் எழுகின்றன. இது இன்னும் சோதனை முறையில் தான் உள்ளது. இதனால் டி.ஆர்.எஸ் முறையில் உள்ள குறைகள் குறித்து கிரிக்கட் வாரியம் ஐ.சி.சி.யிடம் வலியுறுத்த வேண்டும்.

மலிங்கா ஆதரவு: ஒருநாள் கிரிக்கட் போட்டி விதிகளில் மாற்றம் கொண்டு வரவேண்டுமென்ற சச்சின் டெண்டுல்கரின் கருத்துக்கு இலங்கை வேகப்பந்து வீச்சாளர் மலிங்கா ஆதரவு தெரிவித்துள்ளார்.

மும்பை இண்டியன்ஸ் அணியில் இடம் பெற்றுள்ள மலிங்கா, சாம்பியன்ஸ் லீக் போட்டியில் பங்கேற்க சென்னைக்கு வந்துள்ளார். அவர் கூறியது: ஒருநாள் போட்டியில் ஒவ்வொரு அணிக்கும் 25 ஓவர்கள் என தலா 2 இன்னிங்ஸ்களாக மொத்தம் 4 இன்னிங்ஸ் வைத்து போட்டியை நடத்த வேண்டுமென்ற சச்சினின் கருத்தை நான் ஆதரிக்கிறேன்.

பந்து வீச்சாளர் என்ற முறையில் இப்போதுள்ள விதிப்படி 34வது ஓவரில் பந்தை மாற்றுவதை நான் ஏற்கவில்லை. 4 இன்னிங்ஸ் விளையாடினால் பந்தை பலமுறை மாற்ற வாய்ப்பு கிடைக்கும். இது பந்து வீச்சாளர்களுக்கு சாதகமாகவே இருக்கும் என்றார் மலிங்கா.