தலை ஒட்டிப் பிறந்த குழந்தைகளை அறுவை சிகிச்சை மூலம் பிரித்த மருத்துவர்கள்

தலை ஒட்டிப் பிறந்த குழந்தைகளை அறுவை சிகிச்சை மூலம் பிரித்த மருத்துவர்கள்
[ திங்கட்கிழமை, 19 செப்ரெம்பர் 2011, 04:55.56 மு.ப GMT ]
தலை ஓட்டிப் பிறந்த சகோதரிகளை பிரிட்டனைச் சேர்ந்த டாக்டர்கள் அறுவை சிகிச்சை மூலம் வெற்றிகரமாகப் பிரித்தனர்.

பிறந்து 11 மாதங்களேயான இச்சகோதரிகள் லண்டனில் உள்ள குழந்தைகளுக்கான கிரேட் ஆர்மாண்ட் தெரு மருத்துவமனையில் அனுமதிக்கப்பட்டனர்.

ரிடால் மற்றும் ரிடாஜ் கபெüரா என்ற பெயர் கொண்ட இப் பெண் குழந்தைகள் பிறக்கும் பொழுதே தலை ஒட்டிப் பிறந்திருந்தன.

டாக்டர் டேவிட் டன்னவே தலைமையில் இவர்களைப் பிரிப்பதற்கான அறுவை சிகிச்சை நடைபெற்றது என்று டெய்லி மெயில் இதழ் தெரிவிக்கிறது.

இந்தச் சகோதரிகளின் தலைகளின் உச்சிப் பகுதிகள் ஒன்றோடு ஒன்று ஒட்டியிருந்தது. இத்தகைய நிலையில் பிறக்கும் 1 கோடி குழந்தைகளில் ஒரு குழந்தை மட்டுமே பிழைத்திருக்க வாய்ப்புண்டு என்று மருத்துவ உலகம் கூறுகிறது. இந்நிலையில் இந்த அறுவை சிகிச்சை வெற்றிகரமாக நடந்திருப்பது குறிப்பிடத்தக்கது.

இரு குழந்தைகளின் மண்டை ஒடுகளும் ஒன்றுக்கொன்று ஒட்டியிருந்தாலும் இரு குழந்தைகளின் மூளைத் திசுக்கள் ஒட்டவில்லை. இதனால் மூளைக்குச் செல்லும் ரத்த ஓட்டம் தடைப்படாமல் இருந்தது.

இருந்தாலும் ரிடாலின் மூளைக்குத் தேவையான ரத்தத்தின் ஒரு பகுதியை ரிடாஜின் மூளைப் பகுதியே வழங்கி வந்தது. இதனால், இருவரது உடலும் மூளையும் ரிடாஜால் இயக்கப்பட்டது. இது சிகிச்சை தருவதற்கே சவாலான விஷயமாகும்.

அறுவை சிகிச்சையின்போது லேசாக ரத்த அழுத்தம் ஏற்பட்டால் கூட அது கடுமையான நரம்பியல் பிரச்னைகளை உருவாக்கி விடும் அபாயமும் இருந்தது.

எனினும் அறுவை சிகிச்சைக்குப் பிறகு இரட்டைச் சகோதரிகள் நன்கு தேறி வருவதாக டாக்டர்கள் நம்பிக்கை தெரிவித்தனர்.

கிரேட் ஆர்மாண்ட் தெரு மருத்துவமனையில் கடந்த 4 மாதங்களுக்கு முன் இக்குழந்தைகள் அனுமதிக்கப்பட்டிருந்தனர். ஒவ்வொரு கட்டமாக முதலில் 3 அறுவை சிகிச்சைகள் மேற்கொள்ளப்பட்டன. கடந்த மாதம் கடைசியாக நான்காவது அறுவை சிகிச்சை மேற்கொள்ளப்பட்டது.

இக்குழந்தைகள் சிசேரியன் அறுவை சிகிச்சை மூலம் பிறந்தவை. சூடானை சேர்ந்த இவர்களின் பெற்றோர்களும் டாக்டர்கள்தான்.

இரட்டைச் சகோதரிகளின் தந்தையான அப்துல் மஜீத் கபெüரா மகப்பேறு மருத்துவத்தில் நிபுணராவார். தாயான எனாஸýம் இத்துறையில் மருத்துவர் ஆவார்.

இந்த அறுவை சிகிச்சைக்கு பெரும் செலவு பிடிக்கும் என்பதால், பிரிட்டிஷ் குழந்தைகள் அறக்கட்டளை அமைப்பு இதற்கான செலவை ஏற்றுக் கொண்டது.

வெற்றிகரமாக அறுவை சிகிச்சை நடத்திய டாக்டர்களுக்கு தங்கள் நன்றியை குழந்தைகளின் பெற்றோர் தெரிவித்துக் கொண்டனர்.