கந்து வட்டி கொடுமை

சென்னை: ஒரு லட்சம் ரூபாய்க்கு இதுவரை 3.5 லட்ச ரூபாயை வட்டியாக பெற்ற கந்து வட்டி தம்பதியை காவல்துறையினர் கைது செய்துள்ளனர்.
கொளத்தூரில் உள்ள ராஜீவ் காந்தி நகரில் வசித்து வருபவர் ராபர்ட் பெர்னாண்டஸ் (வயது 25). இவர் அதே பகுதியை சேர்ந்த புஷ்பா என்ற பெண்ணிடம் கடந்த 2009-ம் ஆண்டு ரூ.1 லட்சம் கடன் வாங்கியுள்ளார். இந்த பணத்தை கொடுக்கும்போது புஷ்பா ஒரு மாத வட்டியாக ரூ.10 ஆயிரமும், ஆவண கட்டணம் என்று கூறி ரூ.39 ஆயிரமும் போக மீதி ரூ.51 ஆயிரம் மட்டும் ராபர்ட் பெர்னாண்டஸ் வசம் கொடுத்திருக்கிறார்.

கடந்த 2 ஆண்டுகளாக இந்த பணத்துக்கு ராபர்ட் ரூ.3.5 லட்சம் வட்டி கட்டியுள்ளார். கடந்த 2 மாதமாக அவரால் வட்டி செலுத்த முடியவில்லை. இதனால் புஷ்பாவும், அவரது கணவர் தேவராஜும், ராபர்ட்டின் வீட்டுக்கு சென்றனர். வட்டியை செலுத்தாதற்காக 4 காசோலைகளை வாங்கிக் கொண்ட இருவரும் ராபட்டின் மோட்டார் சைக்கிள் ஆர்.சி. புத்தகத்தையும் பறித்துச் சென்று விட்டனர்.

மேலும் குறிப்பிட்ட தவணைக்குள் பணத்தை தராவிட்டால் கொலை செய்து விடுவோம் என்றும் மிரட்டியுள்ளனர். இதுகுறித்து ராபர்ட் காவல்துறை ஆணையர் திரிபாதியிடம் புகார் செய்தார். துணை கமிஷனர் பிரேம்ஆனந்த் சின்கா, உதவி கமிஷனர் கண்ணன் ஆகியோர் விசாரணை நடத்தினர். காவல்துறையினர் நடத்திய விசாரணையில் புஷ்பாவும், தேவராஜும், ராபர்ட்டை கந்துவட்டி கேட்டு கொடுமைப்படுத்தியது தெரியவந்தது.

இதையடுத்து கணவன் மனைவி இருவரும் கைது செய்யப்பட்டனர். கடந்த 3 ஆண்டுகளுக்கு முன்பு இவர்கள் இருவரும் சென்னை மத்திய குற்றப்பிரிவு கந்துவட்டி பிரிவு காவல்துறையினரால் கைது செய்யப்பட்டவர்கள் எனபது குறிப்பிடத்தக்கது.