பிசிசிஐ தொழில்நுட்பக் குழு தலைவராக கங்குலிக்கு வாய்ப்பு

by **பிரசன்னா** Tue Sep 20, 2011 12:41 pm

பிசிசிஐ தொழில்நுட்பக் குழு தலைவராக கங்குலிக்கு வாய்ப்பு

இந்திய கிரிக்கெட் கட்டுப்பாட்டு வாரிய (பிசிசிஐ) தொழில்நுட்பக் குழு தலைவராக செüரவ் கங்குலிக்கு வாய்ப்பு வழங்கப்பட்டுள்ளது.
பிசிசிஐ ஆண்டு பொதுக்குழுக்கூட்டம் மும்பையில் திங்கள்கிழமை நடைபெற்றது. இக்கூட்டத்துக்குப்பின் பிசிசிஐ புதிய தலைவர் என்.ஸ்ரீனிவாசன் செய்தியாளர்களிடம் கூறியது:
இப்போது தொழில்நுட்பக் குழுவின் தலைவராக உள்ள காவஸ்கர், தன்னை அப்பொறுப்பில் இருந்து விடுவிக்குமாறு பிசிசிஐ-க்கு கடிதம் எழுதியுள்ளார். அவர் 7 ஆண்டுகளாக அப்பதவியில் இருந்துள்ளார்.
எனவே இப்பதவிக்கு புதிய நபரைத் தேர்வு செய்ய முடிவு செய்துள்ளோம். கங்குலி இப்பதவியில் நியமிக்கலாம் என்று பிசிசிஐ ஆண்டு பொதுக்குழு கூட்டத்தில் முடிவு செய்யப்பட்டுள்ளது. இது தொடர்பாக அவருக்கு தகவல் தெரிவிக்கவில்லை. விரைவில் முறைப்படி தகவல் தெரிவிக்கப்படும், கங்குலி இப்பொறுப்பை ஏற்பார் என்று நம்புகிறோம் என்றார்.
டிஆர்எஸ் முறைக்கு மீண்டும் எதிர்ப்பு: கிரிக்கெட் போட்டியில் கள நடுவரின் முடிவை மறுபரிசீலனை செய்யும் டிஆர்எஸ் முறைக்கு பிசிசிஐ மீண்டும் எதிர்ப்புத் தெரிவித்துள்ளது. இது குறித்து ஸ்ரீனிவாசன் கூறியது: இப்போது உள்ள நிலையிலேயே டிஆர்எஸ் முறையைப் பயன்படுத்துவது ஏற்றுக் கொள்ள முடியாதது. இந்த விஷயத்தை சர்வதேச கிரிக்கெட் கவுன்சில் (ஐசிசி) கூட்டத்தில் எழுப்புவோம். ஏற்கெனவே "பால் டிராக்கிங்' முறைக்கு எதிர்ப்புத் தெரிவித்திருந்தோம்.
"ஹாட் ஸ்பாட்' தொழில்நுட்பமும் துல்லியமானது இல்லை என்பது இங்கிலாந்து - இந்தியா கிரிக்கெட் தொடரின் போது வெளிப்பட்டது என்றார்.
தோல்வியை ஆராய மாட்டோம்: தொடர்ந்து இங்கிலாந்து தொடரில் இந்திய அணி ஒரு வெற்றி கூடப் பெறாமல் நாடு திரும்பியுள்ளது குறித்துப் பேசிய அவர், இங்கிலாந்துக்கு எதிரான தொடரில் இந்திய அணி தோல்வியடைந்தது குறித்து ஆராய குழு அமைக்கும் திட்டம் ஏதுமில்லை.
முழுத் திறனுடைய அணியை இங்கிலாந்துக்கு அனுப்பவில்லை. தொடக்க முதலே வீரர்கள் காயமடைய தொடங்கினர். அணியில் பெரும்பாலான வீரர்கள் காயத்தால் போட்டியில் இருந்து வெளியேறியதால், இது மோசமான தொடராக அமைந்துவிட்டது.
தங்களால் முடிந்த அனைத்தையும் நமது வீரர்கள் சாதித்துள்ளனர். உலகக் கோப்பையை வென்றது, டெஸ்ட் தரவரிசையில் முதலிடம் பெற்றது ஆகியவை சமீபத்திய சாதனைகள்தான். மீண்டும் முதலிடத்தைப் பிடிக்கும் நாள் வரும். இங்கிலாந்துக்கு எதிராக நமது வீரர்கள் சிறப்பாக ஆடவில்லைதான். எனினும் அணியின் மீது நம்பிக்கையுள்ளது. அவர்கள் மீண்டும் வெற்றிப்பாதைக்குத் திரும்புவார்கள் என்றார்.
இந்திய அணி அதிகபோட்டிகளில் விளையாடுவதால்தான் வீரர்கள் காயமடைகின்றனர், தொடர்ந்து தோல்வியும் ஏற்படுகிறது என்ற குற்றச்சாட்டை ஸ்ரீனிவாசன் மறுத்தார்.
ஐசிசி விழாவில் பங்கேற்காதது ஏன்? கடந்த வாரம் இங்கிலாந்தில் நடைபெற்ற ஐசிசி விருது வழங்கும் விழாவில் இந்திய அணி வீரர்கள் எவரும் பங்கேற்கவில்லை. இது கடும் விமர்சனத்துக்கு உள்ளானது. இது தொடர்பாகவும் ஸ்ரீனிவாசன் விளக்கமளித்தார். விழாவில் பங்கேற்குமாறு இந்திய அணிக்கு ஐசிசி முறைப்படி அழைப்பு ஏதும் விடுக்கவில்லை எனவேதான் இந்த நிகழ்ச்சியில் இந்திய வீரர்கள் பங்கேற்கவில்லை என்றார்.

நன்றி
தினமணி