20 ஓவர் கிரிக்கெட்: சாம்பியன்ஸ் லீக் நாளை தொடக்கம்

by **இளமாறன்** Sun Sep 18, 2011 8:53 pm

ஐதராபாத், செப். 18-

சாம்பியன்ஸ் “லீக்” 20 ஓவர் கிரிக்கெட் போட்டி 2008-ம் ஆண்டு அறிமுகம் செய்யப்பட்டது. மும்பையில் தீவிரவாதிகள் நடத்திய தாக்குதல் சம்பவத்தை தொடர்ந்து அந்த போட்டி ரத்து செய்யப்பட்டது.

முதலாவது சாம்பியன் “லீக்” 20 ஓவர் போட்டியில் நியூ சவுத் வேல்ஸ் (ஆஸ்திரேலியா) அணி சாம்பியன் பட்டம் பெற்றது. 2010-ம் ஆண்டு தென் ஆப்பிரிக்காவில் நடந்த 2-வது சாம்பியன்ஸ் “லீக்” போட்டியில் சென்னை சூப்பர் கிங்ஸ் வெற்றி பெற்றது.

3-வது சாம்பியன் “லீக்” 20 ஓவர் போட்டி ஐதராபாத்தில் நாளை (19-ந்தேதி) தொடங்குகிறது. அக்டோபர் 9-ந்தேதி வரை இந்தப்போட்டி நடக்கிறது. ஐதராபாத், பெங்களூர், சென்னை, கொல்கத்தா ஆகிய நகரங்களில் இந்தப்போட்டி நடக்கிறது.

சமீபத்தில் நடந்த ஐ.பி.எல். போட்டியில் சாம்பியன் பட்டம் பெற்ற சென்னை சூப்பர் கிங்ஸ், 2-வது இடத்தை பெங்களூர் ராயல் சேலஞ்சர்ஸ், 3-வது இடத்தை பிடித்த மும்பை இந்தியன்ஸ் ஆகிய அணிகள் நேரடியாக தகுதி பெற்றன. இதேபோல நியூ சவுத் வேல்ஸ், சவுத் ஆஸ்திரேலியன் ரெட் பேக்ஸ் (ஆஸ்திரேலியா), கேப் கோப்ராஸ், வாரியர்ஸ் (தென்ஆப்பிரிக்கா) ஆகிய 4 அணிகளும் நேரடியாக தகுதி பெற்றன.

7 அணிகள் நேரடியாக தகுதி பெற்றன. மீதியுள்ள 3 அணிகள் தகுதி சுற்றின் மூலம் தேர்வு செய்யப்படும்.தகுதி சுற்று ஆட்டம் நாளை முதல் 21-ந்தேதி வரை நடக்கிறது. இதில் ஐ.பி.எல். போட்டியில் 4-வது இடத்தை பிடித்த கொல்கத்தா நைட்ரைடர்ஸ், ஆக்லாந்து (நியூசிலாந்து) சோம்செட் (இங்கிலாந்து), டிரினிடாட் டொபாக்கோ (வெஸ்ட் இண்டீஸ்) லீசெஸ்டர் சையா பாக்கஸ் (இங்கிலாந்து), ருகுனு லெவன் (இலங்கை) ஆகிய 6 அணிகள் விளையாடும்.

இதில் இருந்து 3 அணிகள் முதன்மை சுற்றுக்கு தகுதி பெறும். தகுதி சுற்று ஆட்டங்கள் அனைத்தும் ஐதராபாத்தில் நடைபெறும்.நாளை நடைபெறும் தகுதி சுற்று ஆட்டங்களில் ருகுனு லெவன்- டிரின்டாட் டொபாக்கோ (மாலை 4 மணி), கொல்கத்தா நைட் ரைடர்ஸ்-ஆக்லாந்து ஏசஸ் (இரவு 8 மணி) மோதுகின்றன.

முதன்மை சுற்று ஆட்டங்கள் 23-ந்தேதி தொடங்குகிறது. இதில் விளையாடும் 10 அணிகள் 2 பிரிவாக பிரிக்கப்பட்டுள்ளன. “ஏ” பிரிவில் சென்னை சூப்பர் கிங்ஸ்-கேப்கோப்ராஸ், நியூ சவுத்வேல்ஸ், மும்பை இந்தியன்ஸ் இடம் பெற்றுள்ளன. இன்னொரு அணி தகுதி சுற்று முடிவில் தெரியும். “பி” பிரிவில் பெங்களூர் ராயல் சேலஞ்சர்ஸ், வாரியர்ஸ், சவுத் ஆஸ்திரேலியன் ரெட்பேக்ஸ் ஆகிய அணிகள் இடம் பெற்றுள்ளன.மற்ற 2 அணி தகுதி சுற்று முடிவில் தெரியும்.

ஒவ்வொரு அணியும் மற்ற அணியுடன் தலா ஒரு முறை மோதும் “லீக்” முடிவில் இரண்டு பிரிவிலும் முதல் 2 இடங்களை பிடிக்கும் அணிகள் அரை இறுதிக்கு தகுதி பெறும். முதல் அரை இறுதி 7-ந்தேதி பெங்களூரிலும், 2-வது அரை இறுதி 8-ந்தேதி சென்னையிலும் நடக்கிறது.இறுதிப்போட்டி அக்டோபர் 9-ந்தேதி சேப்பாக்கம் மைதானத்தில் நடக்கிறது.

மும்பை இந்தியன்ஸ் அணி கேப்டனான சச்சின் தெண்டுல்கர் சாம்பியன் “லீக்” போட்டியில் ஆடுவது சந்தேகமே. அவர் காயம் காரணமாக இங்கிலாந்துக்கு எதிரான ஒருநாள் தொடரில் விளையாடவில்லை என்பது குறிப்பிடத்தக்கது.

சாம்பியன்ஸ் “லீக்” 20 ஓவர் கிரிக்கெட் போட்டியில் சென்னை சேப்பாக்கம் மைதானத்தில் 10 ஆட்டங்கள் நடக்கிறது. ஒரு அரை இறுதியும், இறுதிப்போட்டியும், 8 “லீக்” ஆட்டமும் நடக்கிறது. வருகிற 28-ந்தேதி முதல் ஆட்டம் நடக்கிறது. மாலை 4 மணிக்கு நியூசவுத் வேல்ஸ்-தகுதி சுற்று அணி விளையாடும் இரவு 8 மணிக்கு சென்னை சூப்பர் கிங்ஸ்-கேப் கோபராஸ் மோதுகின்றன.

மாலைமலர்