டில்லி அணி கேப்டன் பதவியில் இருந்து விலகினார் சேவாக் : கவுதம் காம்பிர் புதிய கேப்டன்

இந்திய வீரர் சேவக், ஐ.பி.எல்., டில்லி டேர்டெவில்ஸ் அணியின் கேப்டன் பொறுப்பிலிருந்து திடீரென விலகினார். இதனையடுத்து புதிய கேப்டனாக கவுதம் காம்பிர் நியமிக்கப்பட்டுள்ளார்.இந்திய கிரிக்கெட் போர்டால் (பி.சி.சி.ஐ.,) உருவாக்கப்பட்ட இந்தியன் பிரிமியர் லீக் (ஐ.பி.எல்.,) அமைப்பு, ஆண்டுதோரும் "டுவென்டி-20' தொடரை நடத்தி வருகிறது. இந்த அமைப்பில் சென்னை சூப்பர் கிங்ஸ், கோல்கட்டா நைட் ரைடர்ஸ், டில்லி டேர்டெவில்ஸ் உள்ளிட்ட எட்டு அணிகள் இடம் பெற்றுள்ளன. டில்லி டேர்டெவில்ஸ் அணிக்கு இந்திய துவக்க வீரர் சேவக் கேப்டனாக நியமிக்கப்பட்டிருந்தார்.



சமீபத்தில் ஐ.பி.எல்., இரண்டாவது "டுவென்டி-20' தொடர் தென் ஆப்ரிக்காவில் நடந்தது. இத்தொடரின் போது சேவக்கிற்கு தோள்பட்டையில் காயம் ஏற்பட்டது. இதனையடுத்து சமீபத்தில் இங்கிலாந்தில் நடந்த "டுவென்டி-20' உலக கோப்பை, வெஸ்ட் இண்டீசில் நடந்த ஒருநாள் தொடர், இலங்கையில் நடந்த முத்தரப்பு ஒருநாள் தொடரில் பங்கேற்கவில்லை. தவிர, இன்று துவங்கும் சாம்பியன்ஸ் டிராபி தொடருக்கான இந்திய அணியிலும் தேர்வு செய்யப்படவில்லை.தற்போது காயம் குணமடைந்த நிலையில் உள்ளூர் போட்டியில் பங்கேற்றுவரும் சேவக், நேற்று திடீரென டில்லி டேர்டெவில்ஸ் அணியின் கேப்டன் பொறுப்பில் இருந்து விலகுவதாக அறிவித்தார். இதனை ஏற்றுக் கொண்ட டில்லி டேர்டெவில்ஸ் அணி நிர்வாகம், மற்றொரு இந்திய துவக்க வீரர் கவுதம் காம்பிரை புதிய கேப்டனாக நியமனம் செய்துள்ளது. தவிர, தமிழக வீரர் தினேஷ் கார்த்திக் துணைக் கேப்டனாக நியமிக்கப்பட்டுள்ளார்.



இதுகுறித்து டில்லி டேர்டெவில்ஸ் அணியின் உரிமையாளர் சீனிவாஸ் பூமிடாலா கூறுகையில், ""சேவக் எங்கள் அணியின் மிகப்பெரிய பலம். பேட்டிங்கில் முழுகவனம் செலுத்த வேண்டியிருப்பதால், கேப்டன் பதவியிலிருந்து விலகுவதாக தெரிவித்தார். அவருடைய நியாயமான வேண்டுகோளை நாங்கள் முழுமனதுடன் ஏற்றுக்கொள்கிறோம்,'' என்றார்.


நிர்வாகத்துக்கு நன்றி: இதுகுறித்து சேவக் கூறியதாவது: என்னுடைய வேண்டுகோளை ஏற்று கேப்டன் பதலியிலிருந்து விடுவித்த டில்லி டேர்டெவில்ஸ் நிர்வாகத்துக்கு எனது நன்றியை தெரிவித்துக் கொள்கிறேன். தோள்பட்டை காயம் காரணமாக சமீபத்திய தொடர்களில் பங்கேற்க முடியாமல் போனதால், இனிவரும் தொடர்களில் பேட்டிங்கில் சாதிக்க வேண்டிய கட்டாயத்தில் உள்ளேன். எனவே, பேட்டிங்கில் கூடுதல் கவனம் செலுத்துவதற்காக, டில்லி டேர்டெவில்ஸ் அணியின் கேப்டன் பதவியிலிருந்து விலகுகிறேன்.
டில்லி அணி நிர்வாகம் காம்பிரை புதிய கேப்டனாக நியமித்ததை வரவேற்கிறேன். இவர் சமீபத்தில் ஐ.பி.எல்., தொடரில் சில போட்டிகளில் கேப்டனாக செயல்பட்டுள்ளார். இவரிடம் அணியின் கேப்டனாக வரக்கூடிய அனைத்து தகுதிகளும் உள்ளது.இவ்வாறு சேவக் கூறினார்.


புதிய பதவி பெருமிதம்: புதிய கேப்டன் பதவி குறித்து காம்பிர் கூறியதாவது: டில்லி டேர்டெவில்ஸ் அணி நிர்வாகம் என்னை புதிய கேப்டனாக நியமித்ததற்கு பெருமிதம் அடைகிறேன். என்னால் முடிந்தவரை அணியின் வெற்றிக்கு பாடுபடுவேன். சேவக் வழியில் சிறந்த கேப்டனாக செயல்படுவேன் என்ற நம்பிக்கை உள்ளது.முன்னதாக டில்லி ரஞ்சி அணிக்கு கேப்டனாக பொறுப்பேற்று, கோப்பை வென்றுள்ளேன். தவிர, சமீபத்திய ஐ.பி.எல்., தொடரில் சேவக் காயம் காரணமாக பங்கேற்காத போட்டியில் கேப்டனாக செயல்பட்டுள்ளதால், இப்பணியை நிறைவாக செய்வேன் என்ற நம்பிக்கை எழுந்துள்ளது. இந்த அனுபவம் எனக்கு நிறைய பாடம் கற்பித்துள்ளது.


சேவக் என்னுடைய சிறந்த நண்பர் மற்றும் அணியின் அனுபவம் வாய்ந்த சீனியர் வீரர் என்பதால், இனிவரும் போட்டிகளில் அவரிடமிருந்து அணியை வழிநடத்த ஆலோசனைகள் பெறுவேன். அவருடைய ஆலோசனைகள் அணியின் வெற்றிக்கு முக்கிய பங்குவகிக்கும் என நம்புகிறேன். துணைக் கேப்டனாக நியமிக்கப்பட்டுள்ள தமிழக வீரர் தினேஷ் கார்த்திக், தமிழக ரஞ்சி அணியை வழிநடத்தியிருப்பதால், அவருடைய அனுபவம் அணியின் வெற்றிக்கு உதவும்.


இவ்வாறு காம்பிர் கூறினார்.

சேவாக் திறமையானவர்தான் ஆனால் அவருக்கும் விதி படுத்துகிறது