இந்திய அணிக்கு பேட்டிங் கைகொடுக்கும்

கோவைசிவா · கோவைசிவா Mon Sep 21, 2009 2:49 pm

""சாம்பியன்ஸ் டிராபி தொடரில் இந்திய அணிக்கு பேட்டிங் தான் கைகொடுக்கும்,'' என, அஜித் வடேகர் தெரிவித்துள்ளார்.
சாம்பியன்ஸ் டிராபி தொடரில் பங்கேற்க இந்திய அணி, தென் ஆப்ரிக்கா சென்றுள்ளது. வரும் செப். 26ல் தனது முதல் ஆட்டத்தில் பாகிஸ்தானை சந்திக்க உள்ளது. இத்தொடரில் இந்திய அணியின் வெற்றிக்கு பேட்டிங் தான் கைகொடுக்கும் என முன்னாள் கேப்டன் அஜித் வடேகர் கூறியுள்ளார். இதுகுறித்து அவர் அளித்த பேட்டி:
எந்த அணிக்கு பேட்டிங், பவுலிங் மற்றும் பீல்டிங் என மூன்றும் சிறப்பாக அமைகிறதோ அந்த அணி வெற்றி பெறும். ஆனால் இந்தியாவைப் பொறுத்த வரையில் சச்சின், டிராவிட், யுவராஜ் மற்றும் கேப்டன் தோனி எல்லோரும் பேட்டிங்கில் அசத்தல் பார்மில் உள்ளனர். இது சமீபத்திய முத்தரப்பு தொடரில் வெளிப்பட்டது. என்னைப் பொறுத்தவரையில் இந்த தொடரில் சாதிப்பதற்கு இந்திய அணிக்கு பேட்டிங் தான் கைகொடுக்கும் என நினைக்கிறேன். சேவக் இல்லாத நிலையில் சச்சின்-காம்பிர் ஜோடி வெற்றிகரமான துவக்கம் தரும்.
பீல்டிங் கவலை:
அணியின் மிகப்பெரிய கவலை பீல்டிங் தான். சர்வதேச தரமில்லாத நமது பீல்டிங், முத்தரப்பு தொடர் பைனலில் நன்கு வெளிப்பட்டது. ஒருநாள் போட்டிகளில் அணியின் வெற்றிக்கு சிறந்த பீல்டிங் அவசியம். கேப்டன் தோனியும் இதனை வெளிப்படுத்தியது வரவேற்கத்தக்கது. இது அணியில் நல்ல விளைவுகளை ஏற்படுத்தும். தவிர, காம்பிர் அணிக்கு திரும்பியுள்ளதால் பீல்டிங் முன்னேற்றம் ஏற்படும் என நம்புகிறேன். இரண்டாவதாக ஜாகிர் கான் இல்லாமல் பவுலிங் பிரிவும் தடுமாறுகிறது. இந்த இரண்டையும் சமாளிக்க பேட்டிங்கில் அதிக ரன்களை குவிக்க வேண்டும். அது தான் போட்டிக்கு பாதுகாப்பானது.
நம்பிக்கை அளிக்கிறது:
புதிய பந்து கூட்டணியில் எதிர்பார்த்த வேகம் இல்லை. ஆனால் சிறப்பாக செயல்படுகிறார்கள். ஜாகிர் கான் இல்லாத நிலையில் இஷாந்த் தான் பொறுப்பாக செயல்பட வேண்டும். இருப்பினும் இதற்கு முந்தைய தென் ஆப்ரிக்க தொடரில் சாதித்துள்ள ஆர்.பி.சிங், ஆஷிஸ் நெஹ்ரா ஆகியோர் அணிக்கு உதவுவார்கள். சுழலில் ஹர்பஜன் செயல்பாடு பிடித்துள்ளது. அவருடன் இணைந்து அமித் மிஸ்ராவும் இந்த தொடரில் முக்கிய பங்கு வகிப்பார்.
இவ்வாறு வடேகர் தெரிவித்தார்.