லட்சியத்திற்கு அவசியம் குறிக்கோளும், தனித்தன்மையும்

jesudoss · jesudoss Sun Sep 18, 2011 1:13 am

சென்னை: "வாழ்வில் லட்சியத்தை அடைய, சிறந்த குறிக்கோளுடனும், தனித்தன்மையான பண்புகளையும், மாணவர்கள் பெற்றிருப்பது அவசியம்,'' என, முன்னாள் ஜனாதிபதி அப்துல்கலாம் பேசினார். டாக்டர் எம்.ஜி.ஆர்., கல்வி மற்றும் ஆராய்ச்சி நிறுவன நிகர்நிலை பல்கலைக்கழகத்தின், 20ம் ஆண்டு பட்டமளிப்பு விழா, சென்னை மதுரவாயலை அடுத்த வேலப்பன்சாவடியில் உள்ள, ஏ.சி.எஸ்., மருத்துவக் கல்லூரியில் நடந்தது. எம்.டெக், எம்.டி.எஸ், எம்.சி.ஏ., எம்.பி.ஏ., பி.டி.எஸ், பி.எஸ்.சி உள்ளிட்ட, இளநிலை மற்றும் முதுநிலை பட்ட படிப்புகளில் தேர்ச்சி பெற்ற 3,109 மாணவ, மாணவியருக்கு பட்டங்கள் வழங்கப்பட்டன.
முதல் மூன்று இடங்களை பெற்ற இளநிலை பட்டதாரி மாணவ, மாணவியருக்கு தங்க பதக்கங்களையும், பட்டங்களையும் முன்னாள் ஜனாதிபதி அப்துல்கலாம் வழங்கினார். பின், மாணவர்கள் மத்தியில், அப்துல்கலாம் பேசியதாவது: படிப்பு முடிந்து விட்டது என இல்லாமல், இனிமேல் தான் குறிக்கோளுடன் வாழ வேண்டும். கடின உழைப்புடன் விடா முயற்சியும் இணையும் பட்சத்தில் உங்களது வெற்றி எளிதாகும். சிறந்த தனித்தன்மையான பண்புகளை பெற்று, நீங்கள் தான் அதிலிருந்து வித்தியாசப்பட்டு நிற்க வேண்டும். தாமஸ் ஆல்வா எடிசன், கிரகாம்பெல், ரைட் பிரதர்ஸ், ராமானுஜம் உள்ளிட்ட, அனைத்து அறிஞர்களும், தங்களுக்கான சிறந்த குறிக்கோளையும், அதை அடைய தனித்தன்மையான பண்புகளை வளர்த்துக் கொண்டதுமே காரணமாய் அமைந்தது. சிறந்த குறிக்கோளுடனும், தனித்தன்மையான பண்புகளை நீங்கள் பெற வேண்டும். அதன் மூலமே நீங்கள் விரும்பிய லட்சியத்தை அடைய முடியும். உழைப்பு, ஒற்றுமை, எந்தவொரு விஷயத்தையும் சிறப்பாக செய்தல், குறிக்கோளுக்காக பாடுபடுதல், நாட்டிற்காக நல்லது செய்யும் எண்ணம் உள்ளிட்ட விஷயங்களை நீங்கள் வாழ்வில் தொடர்ந்து பின்பற்ற வேண்டும். குறிப்பாக, பறக்க வேண்டும் என்கிற உணர்வு வாழ்க்கையின் லட்சியத்தை அடைய வழி வகுக்கும். நான் ஒரு போதும் பூமியில் தவழ மாட்டேன். ஆகாய உச்சியே எனது லட்சியம் என, உயர்ந்த குறிக்கோளுடன் நீங்கள் வாழ வேண்டும். இப்போது சொல்கிறேன், என்னால் முடியும்; நம்மால் முடியும்; இந்தியாவால் முடியும். இவ்வாறு அப்துல்கலாம் பேசினார்.
விழாவில், பல்கலைக்கழகத்தின் தலைவர் அருண்குமார், துணைவேந்தர் அரவிந்தன், அறக்கட்டளை இயக்குனர் ரவிகுமார், ஆலோசகர் மனோகரன், பதிவாளர் பழனிவேலு உள்ளிட்ட பலர் பங்கேற்று பேசினர்.

ranhasan · ranhasan Sun Sep 18, 2011 1:50 am

//என்னால் முடியும்; நம்மால் முடியும்; இந்தியாவால் முடியும்.// நல்ல நம்பிக்கை வரிகள்... சூப்பருங்க

லட்சியத்திற்கு அவசியம் குறிக்கோளும், தனித்தன்மையும்

லட்சியத்திற்கு அவசியம் குறிக்கோளும், தனித்தன்மையும்

Re: லட்சியத்திற்கு அவசியம் குறிக்கோளும், தனித்தன்மையும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக