கர்ப்பிணி மனைவியிடம் சில்மிஷம் தட்டிக்கேட்ட கணவனை கொன்று வீசியது கும்பல்:

by மீனு Mon Sep 21, 2009 2:28 pm

கர்ப்பிணி மனைவியிடம் சில்மிஷம் தட்டிக்கேட்ட கணவனை கொன்று வீசியது கும்பல்: மகாராஷ்டிராவில் ஓடும் ரயிலில் பயங்கரம்

ரயிலில் தனது கர்ப்பிணி மனைவியை மானபங்கம் செய்ததை தட்டிக் கேட்ட கணவரை 8 பேர் கொண்ட கும்பல் கத்தியால் குத்தி ஓடும் ரயிலில் இருந்து வெளியே தூக்கிப் போட்டு கொன்றது. இந்த கொடூர சம்பவத்தை மற்ற பயணிகள் தடுக்காமல் வேடிக்கை பார்த்தனர்.

குஜராத் மாநிலம் வதோதராவை சேர்ந்தவர் தினேஷ் (21). இவருடைய மனைவி மாலா (20). தம்பி ஷியாம் பப்பு. இவருடைய மனைவி தேஜல். இவர்கள் கடந்த 2 மாதமாக புனேயில் தங்கி நகைக்கடை ஒன்றில் வேலை செய்து வந்தனர். நவராத்திரி பண்டிகையை கொண்டாடுவதற்காக இவர்கள் அனைவரும் புனேயில் இருந்து வதோதரா செல்லும் வெராவல் எக்ஸ்பிரஸ் ரயிலில் நேற்று பயணம் செய்தனர். கூட்டம் அதிகமாக இருந்ததால் இருக்கை கிடைக்காமல் தரையில் அமர்ந்தனர். அப்போது, 5 மாத கர்ப்பிணியான மாலாவின் அருகே அமர்ந்திருந்த 3 இளைஞர்கள் அவரிடம் சில்மிஷம் செய்தனர். தினேஷ் இதை கண்டித்தார். இதனால், இரு தரப்புக்கும் வாக்குவாதம் நடந்தது.

இந்த நிலையில், லோனாவாலா ரயில் நிலையத்துக்கு இரவு 9.30 மணிக்கு ரயில் வந்தது. அப்போது, 3 பேரில் ஒருவன் தனது செல்போனில் யாரையோ தொடர்பு கொண்டு ஆவேசமாக பேசினான்.

இதனால் பயந்து போன தினேஷ், ரயில் நிலையத்தில் இறங்கி ரயில்வே போலீசிடம் புகார் செய்தார். ஆனால், போலீசார் அதை கண்டு கொள்ளவில்லை.

இதனால், ரயில் கிளம்பியதும் தினேஷ் தனது குடும்பத்துடன் வேறு இடத்துக்கு சென்று அமர்ந்தார். கர்ஜத் ரயில் நிலையத்தில் ரயில் நின்றபோது 5 பேர் வாள் மற்றும் இரும்பு தடிகளுடன் பெட்டியில் ஏறி, மாலாவிடம் சில்மிஷம் செய்த 3 பேருடன் சேர்ந்து கொண்டனர். அவர்கள் தினேஷ் குடும்பத்தை தேடினர். இதை பார்த்ததும் தினேஷ§ம், பப்புவும் கழிவறையில் புகுந்து தாழிட்டு கொண்டனர்.

ஆனால், அந்த கும்பல் கதவை உடைத்து இருவரையும் வெளியே இழுத்து போட்டு கொடூரமாக தாக்கியது. அப்போது, அந்த கும்பலை சேர்ந்த ஒருவன் தினேஷை வாளால் குத்தினான். மற்ற கூட்டாளிகள் ஓடும் ரயிலில் இருந்து அவரை தூக்கி வெளியே வீசினர். அப்போது அடுத்த பாதையில் வந்த ரயில் மோதி தினேஷ் உடல் சிதறி பலியானார்.

பத்லாப்பூர் அருகே நேரல்-வாங்கனி ரயில் நிலையங்களுக்கு இடையே இந்த பயங்கர சம்பவம் நடந்தது. தினேஷை கொன்றதோடு நிற்காத அந்த கும்பல், தினேஷ் குடும்பத்தினர் வைத்திருந்த ரூ.2,850, 2 செல்போன்களை பறித்து கொண்டது. கல்யாண் ரயில் நிலையத்தை நெருங்கியபோது ரயிலின் வேகம் குறைக்கப்பட்டது. அந்த சந்தர்ப்பத்தை பயன்படுத்தி கொண்டு கும்பல் குதித்து தப்பியது.

இந்த கொடூர கொலை சம்பவத்தை மற்ற பயணிகள் பீதியில் தட்டிக் கேட்காமல் வேடிக்கை மட்டுமே பார்த்தனர். இந்த சம்பவம் பற்றி கல்யாண் ரயில் நிலைய போலீசாரிடம் மாலாவும், பப்புவும் புகார் செய்தனர். தினேஷின் சடலத்தை மீட்ட போலீசார், பிரேத பரிசோதனைக்கு பிறகு மாலாவிடம் ஒப்படைத்தனர். இந்த கொடூர கொலையை செய்த கும்பலை போலீசார் தேடி வருகின்றனர்.