ஊழல் புகார்களை விசாரிக்க 71 விரைவு நீதிமன்றங்கள்

by **இளமாறன்** Fri Sep 16, 2011 12:37 am

ஊழல் புகார்களை விசாரிக்க 71 விரைவு நீதிமன்றங்கள்

First Published : 15 Sep 2011 03:28:06 AM IST

புது தில்லி, செப். 14: அரசுப் பதவி வகிப்போர் மீதான ஊழல் புகார்களை விசாரிக்க 71 விரைவு சிபிஐ நீதிமன்றங்கள் அமைக்கப்படுவதாக அரசு அறிவித்துள்ளது.

ஊழல் புகார் தொடர்பாக விசாரணை நடத்த அனுமதியளிப்பது தொடர்பாக 3 மாதங்களுக்குள் முடிவெடுக்க வேண்டும் என்கிற கட்டுப்பாட்டைக் கொண்டு வருவது, அரசு சார்பாக கொள்முதல் செய்வதற்கான புதிய கொள்கையை வகுப்பது உள்ளிட்ட பல்வேறு அறிவிப்புகளையும் அரசு வெளியிட்டுள்ளது.

ஊழல் ஒழிப்புக்கான அமைச்சர் குழுவின் பரிந்துரைகளின் அடிப்படையில் இந்த முடிவுகள் எடுக்கப்பட்டிருப்பதாக தில்லியில் செய்தியாளர்களிடம் புதன்கிழமை பேசிய மத்திய சட்ட அமைச்சர் சல்மான் குர்ஷித், பணியாளர் துறை இணையமைச்சர் வி. நாராயணசாமி ஆகியோர் தெரிவித்தனர்.

அமைச்சர் குழுவின் பெரும்பாலான பரிந்துரைகளை அரசு ஏற்றுக் கொண்டிருப்பதாகவும், இவை அனைத்தும் அரசு உத்தரவுகள் மூலமாக விரைவில் அமல்படுத்தப்படும் என்றும் அவர்கள் கூறினர்.

அண்ணா ஹசாரேவின் போராட்டம் காரணமாகவே இந்த அறிவிப்புகளை அரசு வெளியிட்டிருக்கிறதா என்று செய்தியாளர்கள் கேள்வி எழுப்பினர்.

அதற்குப் பதிலளித்த நாராயணசாமி, "ஊழல் ஒழிப்புக்கான அமைச்சர் குழு இந்த ஆண்டு ஜனவரி 6-ம் தேதியே அமைக்கப்பட்டு விட்டது. அதற்கு பல மாதங்களுக்குப் பிறகே ஹசாரே உண்ணாவிரதம் இருந்தார். ஊழலை ஒழிப்பதில் அரசு அக்கறையுடன் செயலாற்றிக் கொண்டிருக்கிறது. இந்த விஷயத்தில் அண்ணா ஹசாரேவும் அரசுக்கு சில ஆலோசனைகளை வழங்கியிருக்கிறார். அவற்றையும் அரசு பரிசீலித்தது. அதற்காக அவர் கூறுவதையெல்லாம் அரசு ஏற்றுக் கொள்ளப் போகிறது என்று அர்த்தமில்லை' என்றார்.

அரசின் ஊழல் ஒழிப்பு நடவடிக்கையின் ஒரு பகுதியாக, அமைச்சர்களுக்கு வழங்கப்பட்டிருக்கும் விருப்புரிமை அதிகாரத்தை ரத்து செய்வதென அரசு முடிவு செய்திருப்பதாகவும் நாராயணசாமி தெரிவித்தார்.

அவர் மேலும் கூறியது:

நிலங்கள், தொலைபேசி, பெட்ரோல் பங்க் போன்றவற்றை ஒதுக்கீடு செய்வதில் அமைச்சர்களுக்கு இருக்கும் விருப்புரிமை அதிகாரம் ரத்து செய்யப்பட வேண்டும் என அமைச்சர் குழு பரிந்துரை செய்திருந்தது.

ஒரு அரசு ஊழியர் அல்லது பொது அதிகாரத்தில் இருப்பவர்கள் மீது ஊழல் புகார்கள் தொடர்பாக விசாரிக்க அனுமதி கோரி விண்ணப்பிக்கப்பட்டால், அது தொடர்பாக அனுமதியளிக்க வேண்டிய அதிகாரத்தில் உள்ளவர் 3 மாதங்களில் முடிவெடுக்க வேண்டும். விசாரணைக்கு அனுமதி மறுக்கப்படும்பட்சத்தில், அதற்கான காரணங்களை விளக்கி தனக்கு அடுத்த நிலையில் உள்ள மேலதிகாரிக்கு சம்பந்தப்பட்ட அதிகாரி 7 நாள்களுக்குள் தகவல் தெரிவிக்க வேண்டும்.

சிபிஐ சார்பில் தொடரப்பட்ட சுமார் 10 ஆயிரம் வழக்குகள் நிலுவையில் உள்ளன. இவற்றின் விசாரணையை விரைவுபடுத்துவதற்காக 71 சிறப்பு சிபிஐ நீதிமன்றங்களை அமைக்க முடிவெடுக்கப்பட்டது. இவற்றில் 44 நீதிமன்றங்கள் ஏற்கெனவே செயல்படத் தொடங்கிவிட்டன. 10 ஆண்டுகளுக்கும் மேலாக நிலுவையில் இருக்கும் வழக்குகள் தொடர்பாக ஆய்வு செய்வதற்காக உச்ச நீதிமன்றத் தலைமை நீதிபதி தலைமையிலான குழு அமைக்கப்படும். இந்தக் குழுவில் ஓய்வு பெற்ற தலைமை ஊழல் கண்காணிப்பு அதிகாரி, சிபிஐ இயக்குநர், நேர்மையான சமூக ஆர்வலர் ஒருவர் உள்ளிட்டோர் இடம்பெறுவர் என்றார் நாராயணசாமி.

தினமணி