ஆவடி : 1500 கல்லூரி மாணவிகள் மறியல்

by **இளமாறன்** Fri Sep 16, 2011 12:16 am

ஆவடி : 1500 கல்லூரி மாணவிகள் மறியல்

சென்னை ஆவடி, பருத்திப்பட்டில் தனியார் பெண்கள் கலைக் கல்லூரி உள்ளது. இங்கு அம்பத்தூர், திருவேற்காடு பூந்தமல்லி, ஆவடி உள்ளிட்ட சுற்றுப் புற பகுதிகளை சேர்ந்த 2 ஆயிரத்து 500க்கும் மேற்பட்ட மாணவிகள் படித்து வருகின்றனர்.

பருத்திப்பட்டு பஸ் நிறுத்தத்தில் இறங்கி கல்லூரிக்கு சுமார் 1 கி.மீ. தூரம் மாணவிகள் நடந்து செல்வது வழக்கம். இச்சாலையில் தனியார் கம்பெனி மற்றும் செங்கல் சூளைகள் உள்ளதால் அதிக அளவில் கணரக வாகனங்கள் சென்றது. இதனால் சாலைகள் பெயர்ந்து குண்டும் குழியுமாக நடந்து செல்ல முடியாத நிலையில் இருந்தன.

பல ஆண்டுகளாக இதே நிலை நீடித்து வந்தது. இச்சாலையை செப்பனிடக்கோரி ஆவடி, திருவேற்காடு நகராட்சியில் உள்ள சம்பந்தப்பட்ட அதிகாரிகளிடம் கல்லூரி நிர்வாகம் கூறியும் எந்த நடவடிக்கையும் எடுக்க வில்லை.

இந்த நிலையில் இன்று காலை கல்லூரிக்கு வந்த மாணவிகள் 1500க்கும் மேற்பட்டோர் வகுப்புகளை புறக்கணித்து ஆவடி-பூந்த மல்லி சாலையில் அமர்ந்து மறியலில் ஈடுபட்டனர்.

மேலும் அருகில் கிடந்த மரத்துண்டுகளை ரோட்டின் குறுக்கே போட்டு தடை ஏற்படுத்தினர். பழுதான சாலையை உடனே சீரமைக்க நட வடிக்கை எடுக்க வேண்டும் என்று அவர்கள் கோஷம் எழுப்பினர்.

மாணவிகளின் போராட்டத்தால் அவ்வழியே கடும் போக்குவரத்து நெரிசல் ஏற்பட்டது. சுமார் 10 கி.மீ. தூரம் வரை வாகனங்கள் ஸ்தம்பித்து நின்றன. இதனால் பள்ளிக்கு சென்ற மாணவ-மாணவிகளும் வேலைக்கு சென்றோரும் பொது மக்களும் குறித்த நேரத்தில் செல்ல முடியாமல் அவதிப்பட்டனர்.

தகவல் அறிந்ததும் ஆவடி உதவி கமிஷனர் ஜான்ஜோசப், இன்ஸ்பெக்டர் சிவக்குமார், போக்குவரத்து இன்ஸ்பெக்டர் முகமது அக்கர் அலி உள்ளிட்ட ஏராளமான போலீசார் விரைந்து வந்து மாணவிகளிடம் சமரச பேச்சு நடத்தினர். அவர்கள் சமரசத்தை எற்காமல் சம்பந்தப்பட்ட அதிகாரிகள் உடனே வந்து சாலையை சீரமைக்க உறுதி தர வேண்டும் என்று கூறி போலீசாரிடம் வாக்கு வாதத்தில் ஈடுபட்டனர்.

போலீசாருக்கும், மாணவிகளுக்கு இடையே தள்ளுமுள்ளு உருவானது. சில மாணவிகளை பிடித்து போலீஸ் வாகனத்தில் ஏற்றினர்.இதையடுத்து கல்லூரி நிர்வாகத்தினர் போலீசாரிடம் பேசி அவர்களை விடுவித்தனர். சுமார் 2 மணி நேரம் போராட்டத்திற்கு பின்னர் மாணவிகள் சமாதானம் அடைந்து போராட்டத்தை கைவிட்டனர்.
நக்கீரன்