திராவிட கட்சிகளுடன் இனி கூட்டணியில்லை - ராமதாஸ்!

by ரபீக் Thu Sep 15, 2011 6:44 pm

திராவிடக் கட்சிகளுடன் இனிமேல் கூட்டணியில்லை. பாமக தலைமையை ஏற்கும் கட்சிகளுடன் கூட்டணி அமைக்கப்படும்" என பாமக நிறுவனர் டாக்டர் ராமதாஸ் கூறியுள்ளார்.

இன்று தைலாபுரத்தில் பாமக நிறுவனர் டாக்டர் ராமதாஸ் செய்தியாளர்களுக்குப் பேட்டியளித்தார். அப்போது அவர் கூறியதாவது:

"ராமநாதபுரம் மாவட்டம் பரமக்குடியில் நடைபெற்ற துப்பாக்கி சூட்டில் 6 பேர் பலியாகி உள்ளனர். இதற்குக் காரணமான காவல்துறை உயர் அதிகாரிகளைப் பணி நீக்கம் செய்து விசாரணை மேற்கொள்ள வேண்டும். பரமக்குடியில் அஞ்சலி செலுத்த வந்த ஜான்பாண்டியனைக் கைது செய்ததே இந்த பிரச்சினைக்குக் காரணமாகும். சாலை மறியலில் ஈடுபட்டவர்களை அமைதியாக அகற்றி இருக்க வேண்டும். காவல்துறையினர் துப்பாக்கி சூடு நடத்தியிருக்கக்கூடாது.

பறவைகளைச் சுடுவதற்கு கூட சட்டப்படி அனுமதி கிடையாது. துப்பாக்கி கையில் வைத்திருக்கிற காவல் துறைக்கு மக்களை சுட்டுப்பொசுக்க யாரும் அதிகாரம் தரவில்லை.

ராஜீவ் கொலை வழக்கில் தூக்கு தண்டனை விதிக்கப்பட்ட முருகன், சாந்தன், பேரரறிவாளன் ஆகியோர் தன்டனையை குறைக்க கோரி சட்டசபையில் தீர்மானம் இயற்றி கவர்னருக்கு அனுப்ப வேண்டும் என கட்சி வித்தியாசம் இன்றி தமிழகத்தில் குரல் கொடுத்து வருகிறார்கள்.

அண்ணா பிறந்தநாளில் திமுக, அதிமுக ஆகிய 2 கட்சிகளும் கைதிகளுக்குத் தண்டனையை குறைப்பதை வழக்கமாக கொண்டுள்ளன. அண்ணா பிறந்த நாளில் அமைச்சரவையைக் கூட்டி 3 பேரின் தூக்கு தண்டனையைக் குறைக்க தீர்மானம் இயற்றி கவர்னருக்கு அனுப்ப வேண்டும்.

இனிவரும் தேர்தல்களில் திராவிட கட்சிகளுடன் கூட்டணி கிடையாது. உள்ளாட்சி தேர்தலில் தனித்து போட்டியிடுவோம். பாமக தலைமையில் சேரும் கட்சிகளைக் கூட்டணியில் சேர்த்துக் கொள்வோம்."

என்று கூறினார்.
இந்நேரம்