முத்துச் சிதறல்கள் - பொது அறிவுத் தகவல்கள்

by **சிவா** Thu Sep 15, 2011 3:07 am

First topic message reminder :

மும்முரமாகத் தேடுவதை, `ஒரு கல்லையும் திருப்பாமல் விடாதே' (Leave no stone unturned) என்று ஆங்கிலத்தில் கூறுவார்கள்.

இதன் பின்னணி என்னவென்று தெரியுமா?

கிரேக்கப் புராணக் கதையின் அடிப்படையில் கூறப்படும் வார்த்தைகள் இவை. `ஆரக்கிள் ஆப் டெல்பி'யால் (Oracle of Delphi) கடவுளுடன் பேச முடியும். அதனால் அவன் பேரறிவைப் பெற்றிருந்தான்.

தோற்கடிக்கப்பட்ட ஒரு ராணுவத் தளபதியால் ஒளித்து வைக்கப்பட்ட புதையலை எப்படிக் கண்டுபிடிப்பது என்று ஆரக்கிளிடம் கேட்கப்பட்டபோது, `ஒரே ஒரு வழிதான் உள்ளது. எந்தக் கல்லையும் திருப்பாமல் விடாதே!' என்று அவன் கூறினானாம்.

அந்த அறிவுரைதான் அப்படியே சொற்றொடராக நீடிக்கிறது.

by **சிவா** Wed Nov 21, 2012 3:11 pm

நீச்சல் நன்றாகத் தெரிந்த ஒருவர் நீரில் மூழ்குபவரைக் காப்பாற்றுவதில் பயிற்சியும் பெற்றிருந்து, நீரில் மூழ்கிய ஒருவரை அவர் காப்பாற்றினால் அவரது அச்செயலுக்கு இந்தியக் குடியரசுத் தலைவர் பதக்கம் கிடையாது. ஆனல் தன்னைவிட வயது, உருவம் மற்றும் எடை அதிகமுள்ள நீரில் மூழ்கிக் கொண்டிருக்கும் ஒரு மனிதரை நீச்சல் தெரியாத ஒரு சிறுவனோ, சிறுமியோ காப்பாற்றிவிட்டால் அவர்களுக்குத்தான் சாதனை பதக்கம்.

by **சிவா** Wed Nov 21, 2012 3:13 pm

இந்தியாவின் மக்கள் தொகையில் சீக்கியர்கள் 2.5 சதவிகிதம் பேர்தான். ஆனால், இந்தியாவின் கோதுமை உற்பத்தியில் அறுபது சதவிகிதம் பஞ்சாபில்தான் விளைகிறது. பால் உற்பத்தியில் மூன்றாவது இடத்தில் இருக்கும் பஞ்சாபில் தனி நபர் வருமானம்கூட பிற பகுதிகளில் இருப்பவர்களைவிட ஐம்பது சதவிகிதம் மிகுதி. தொழில் துறையிலும் பஞ்சாப் முன்னிலை வகிக்கிறது.

by **சிவா** Wed Nov 21, 2012 3:13 pm

உலகத்திலேயே மிகவும் கடினமான வேலை பேசுகிற வேலைதானாம். நாம் பேசும்போது குரல் நாண்கள் விநாடிக்கு 150 முறை அசைகின்றன. ஆசிரியர்கள் தங்கள் பணி நேரத்தில் நான்கில் ஒரு பங்கு பேசியே ஆக வேண்டிய கட்டாயம் இருக்கிறது. பேசுவதையே தொழிலாகக் கொண்டவர்களின் எண்ணிக்கை உலக அளவில் 15 கோடியாகும்.

by **சிவா** Wed Nov 21, 2012 3:14 pm

நம்மால் கீழ்த்தாடையை மட்டுமே அசைக்க முடியும். மேல் தாடையை அசைக்க முடியாது. அதைப் போல விபத்து போன்றவற்றால் கீழ்த்தாடையே பெரிதும் பாதிக்கப்படுகிறது. தாடை எலும்புகள் மிக உறுதியானவை. இவற்றால் 279 கிலோவுக்கு மேற்பட்ட எடையுள்ள பொருள்களைக்கூட கடித்துத் தூக்க முடியும்.

by **சிவா** Wed Nov 21, 2012 3:16 pm

பிரேசிலில் பல நிறங்களை உடைய கதம்ப மலர்களையும், மெக்சிகோவினர் மஞ்சள் நிறப் பூக்களை இறந்தவர்களுக்குரியதாகக் கருதி பயன்படுத்துகிறார்கள். பிரான்சில் மஞ்சள் நிறம் நம்பிக்கைத் துரோகத்திற்கு அடையாளம், ரஷ்யாவிலோ மஞ்சள் நிறப் பூ பெண்ணுக்கு அவமரியாதை அளிக்கும் பூவாகக் கருதப்படுகிறது.

by **சிவா** Wed Nov 21, 2012 3:17 pm

கண்ணாடியில் தனது உருவத்தைப் பார்த்து அது தன்னுடைய உருவமென்று அடையாளம் கண்டுகொள்ளும் அறிவு மனிதர்களுக்கும், மனிதக் குரங்குகளுக்கும் டால்பின் மீன்களுக்கும் மட்டுமே உண்டு.

by **சிவா** Wed Nov 21, 2012 4:42 pm

"மெர்சடிஸ்' பெயர் காரணம்

வியன்னாவில் வசித்து வந்த ஆஸ்திரிய தொழிலதிபரான எமில் ஜெலிநெக், கார் தயாரிப்பில் மிகவும் ஈடுபாடு உடையவராக இருந்தார். 1889-ம் ஆண்டில் பிறந்த இவரது மகளின் பெயர் மெர்சடிஸ். எதிர்காலத்தில் மக்களின் வாழ்க்கையில் கார் இன்றியமையாத வாகனமாக உருவாகும் என்று கருதிய இவர் 1889-ம் ஆண்டில் நடைபெற்ற "டூர் டு நைஸ்' கார் ரேஸில் கலந்து கொண்டபோது தன்னுடைய 23 எச்பி திறன் கொண்ட டெய்ம்லர் காருக்கு மெர்சடிஸ் என்ற பெயரை வைத்ததோடு போட்டியில் முதல் பரிசும் பெற்றார்.

டெய்ம்லரை வடிவமைத்த வில்ஹெம் மேபெக் புதிய வடிவில் கார்களை உருவாக்கத் திட்டமிட்டார். அந்தப் புதிய கார்கள் மார்கெட்டில் நல்ல வரவேற்பைப் பெறுமென்று கருதி ஜெலிநெக், 36 கார்களுக்கு ஆர்டர் கொடுத்ததோடு உலக நாடுகளில் விற்பனை செய்யும் உரிமையையும் பெற்றார். அந்த கார்களுக்கு "மெர்சடிஸ்' என்ற பெயரை வைத்து பிரபலப்படுத்தினார்.

by **சிவா** Wed Nov 21, 2012 4:47 pm

காட்பரீஸ்

1831-ஆம் ஆண்டு தன்னுடைய பல்பொருள் அங்காடியில் ஜான் காட்பரீ கசப்புடன் கூடிய சாக்லெட் மற்றும் கோகோவை விற்பனை செய்யத் தொடங்கினார். அப்போதெல்லாம் இனிப்பான சாக்லெட் என்ன என்பது தெரியாது. 1847-ஆம் ஆண்டு காட்பரி தன் சகோதரர் பெஞ்சமினுடன் சேர்ந்து "காட்பரீஸ் பிரதர்ஸ் ஆஃப் பர்மிங்ஹாம்' என்ற நிறுவனத்தை தொடங்கி முதன் முதலாக சுவைக்கக் கூடிய இனிப்பு சாக்லெட்டை தயாரிக்கத் தொடங்கினார். ஆரம்பத்தில் இது விலை உயர்ந்த ஆடம்பர பொருளாகவே கருதப்பட்டது. 1853-ஆம் ஆண்டு விக்டோரியா மகாராணிக்காக சாக்லெட் தயாரிக்க அரசாங்கம் ஆர்டர் கொடுத்தது. ஓராண்டுக்கு பின்னர் பெஞ்சமின் நிறுவனத்திலிருந்து விலக, காட்பரீயும் அடுத்த ஆண்டில் ஓய்வு பெற்றார். பின்னர் காட்பரீயின் மகன்கள் ரிச்சர்ட் மற்றும் ஜார்ஜ் காட்பரீஸ் நிர்வாக பொறுப்பை ஏற்றனர்.

by **ராஜா** Wed Nov 21, 2012 5:18 pm

சிவா wrote:கண்ணாடியில் தனது உருவத்தைப் பார்த்து அது தன்னுடைய உருவமென்று அடையாளம் கண்டுகொள்ளும் அறிவு மனிதர்களுக்கும், மனிதக் குரங்குகளுக்கும் டால்பின் மீன்களுக்கும் மட்டுமே உண்டு.

அடடே ஆச்சரியமான தகவல் நன்றி