தேன்கனிக்கோட்டையில் குடிகார தந்தையிடம் இருந்து 1 1/2 வயது ஆண்குழந்தையை கடத்தியது யார்?

தர்மபுரி மாவட்டம் பென்னாகரம் அருகே உள்ள பெத்தம்பட்டி கிராமத்தை சேர்ந்தவர் சுப்பிரமணி (33) கட்டிட மேஸ்திரி. இவரது மனைவி முனிரத்னா (22). இவர் கிருஷ்ணகிரி மாவட்டம் தளி அருகே உள்ள பேல்பட்டி ஊராட்சி நந்திபுரத்தை சேர்ந்தவர். சுப்பிரமணிக்கும், முனிரத்தினாவிற்கும் திருமணமாகி சுமார் 8 ஆண்டுகள் ஆகிறது. இவர்களுக்கு ராகுல் (1 1/2) என்ற ஆண்குழந்தை உள்ளது.

சுப்பிரமணியும், அவரது மனைவி முனிரத்னா மற்றும் குழந்தை ராகுலுடன் பெங்களூரில் வேலை செய்து வருகிறார்கள்.சுப்பிரம ணிக்கு குடிப்பழக்கம் இருந்ததால் கணவன்-மனைவி இடையே அடிக்கடி தகராறு ஏற்பட்டு வந்தது.

இந்நிலையில் கடந்த 10-ந் தேதி மீண்டும் கணவன்-மனைவி இடையே தகராறு ஏற்பட்டது. இதில் ஆத்திரம் அடைந்த சுப்பிரமணி தனது குழந்தை ராகுலை தூக்கி கொண்டு தேன்கனிக்கோட்டை வழியாக தன் அக்கா வீட்டிற்கு செல்வதற்கு வந்தார்.

அப்போது கையில் இருந்த பணத்திற்கு மது வாங்கி குடித்தார். மது போதை தலைக்கு ஏறியதும் சுப்பிரமணி தன் குழந்தையை கட்டி அணைத்தபடி தேன்கனிக்கோட்டை பேரூராட்சி அலுவலகம் அருகே உள்ள கட்டிடத்தில் உள்ள கடை முன்பு மயக்கத்தில் படுத்து விட்டார். மாலை நேரம் ஆக, ஆக குழந்தை பசிக்கு அழ ஆரம்பித்தது.

இதையடுத்து அங்கு கூட்டம் கூடியது. அப்போது கூட்டத்தில் நின்று கொண்டு இருந்தவர்களில் ஒருவர் குழந்தைக்கு பால் வாங்கி தருவதாக கூறி தூக்கி சென்றார். ஆனால் நீண்ட நேரமாகியும் அவர் குழந்தையை கொண்டு வரவில்லை.

போதை தெளிந்து சுப்பிரமணி குழந்தையைப்பற்றி கண்டு கொள்ளாமல் மணியம்பாடி கிராமத்தில் உள்ள அவரது அக்காள் வீட்டிற்கு சென்று விட்டார். அந்த நேரத்தில் முனிரத்னா மணியம்பாடிக்கு போன் செய்து உங்கள் தம்பி குழந்தையுடன் வந்தாரா? என்று கேட்டார். அதற்கு அவர் குழந்தை இல்லை, அவன் மட்டும் தான் போதையில் வந்தான் என்று கூறியிருக்கிறார்.

இதைக்கேட்டதும் முனிரத்னா அதிர்ச்சி அடைந்தார். பின்னர் இதுகுறித்து முனிரத்னா கணவரிடம் கேட்டார். அதற்கு அவர் குழந்தையை கட்டிப்பிடித்து தூங்கினேன். எனக்கு ஒன்றும் தெரியாது என்றார். தொடர்ந்து தேன்கனிக்கோட்டை போலீசில் புகார் செய்தார். உடனடியாக போலீசார் சம்பவ இடத்திற்கு சென்று விசாரணை நடத்தினர். அப்போது அழுத குழந்தைக்கு பால் வாங்கி தருவதாக ஒருவர் தூக்கி சென்றது தெரியவந்தது.

எனவே அவர் தான் குழந்தையை கடத்தி சென்று இருக்கலாம் என்று போலீசார் கருதுகிறார்கள். ஏற்கனவே கிருஷ்ணகிரி மாவட்டத்தில் குழந்தை கடத்தல் கும்பலை சேர்ந்தவர்கள் அதிகளவில் உள்ளனர்.

இந்நிலையில் குழந்தை ராகுலையும் அவர்கள் கடத்தி சென்று விற்று இருக்கலாம் என தெரிகிறது. எனவே அவர்களை பிடிக்க போலீசார் ஒருபுறம், குழந்தையின் உறவினர்கள் ஒருபுறமும் தேடிவருகிறார்கள்.




மாலைமலர்

தேன் கனி கோட்டை போன்ற ஊர்களில் படிப்பு அறிவு இல்லவாதவர்கள் அதிகம்... யாராவது இவர்களுக்கு விழிப்புணர்வு பரப்புரை செயலாம் ...அதுவே நல்லது