30 சிறுவர்களை தேடும் பணியில் நேட்டோ ராணுவம்

kitcha · kitcha Wed Sep 14, 2011 7:09 pm

பாகிஸ்தானில் பழங்குடி இன மக்கள் வசிக்கும் பகுதியில் உள்ள பஜாவர் என்ற இடத்தில் இருந்து 30 சிறுவர்கள் ரம்ஜான் பண்டிகையான கடந்த மாதம் 31-ந் தேதி கடத்தப்பட்டனர். அவர்களை தலீபான் தீவிரவாதிகள் ஆப்கானிஸ்தானுக்கு கடத்தி சென்று விட்டனர்.

தெக்ரிக் இ தலீபான் பாகிஸ்தான் என்ற அமைப்பின் துணைத்தலைவர் மவுல்வி பக்கீர் முகமது இந்த பிரசினைக்கு விரைவில் தீர்வு காணப்படும் என்று உறுதி அளித்தார்.

உறுதிமொழியின்படி இன்னும் சிறுவர்கள் விடுதலை செய்யப்படவில்லை. இது சிறுவர்களின் பெற்றோர்களுக்கு கவலையை அளித்து உள்ளது. அவர்கள் அனைவரும் மமோன்ட் பழங்குடியினர்.

இந்த பழங்குடி இன மக்கள் பாகிஸ்தான் அரசாங்கத்துக்கு ஆதரவாக செயல்படுவதாக தலீபான்கள் குற்றஞ்சாட்டி உள்ளனர்.

இதைத்தொடர்ந்து ஆப்கானிஸ்தான் எல்லையில் குனார் மாநிலத்தில் உள்ள தலீபான் முகாம்களை நேட்டோ ராணுவ ஹெலிகாப்டர்கள் கண்காணிக்க தொடங்கி உள்ளன.

இந்த கண்காணிப்பின் மூலம் கடத்தப்பட்ட சிறுவர்களை கண்டுபிடிக்க உதவமுடியும் என்று நேட்டோ ராணுவம் தெரிவித்து உள்ளது. சர்வதேச பாதுகாப்பு உதவி படையின் தலைவர் ஜான் ஆலன் சமீபத்தில் பாகிஸ்தான் சென்றார்.

அப்போது அவர் பாகிஸ்தான் தலைவர்களிடம் கூறுகையில், இந்த கண்காணிப்பு பற்றி தெரிவித்தார். இந்த கண்காணிப்பின்போது விமான தாக்குதல் தவிர்க்க முடியாதது என்றும் தெரிவித்தார்.

இதற்கிடையில் சிறுவர்களை விடுவிக்க பழங்குடி இன தலைவர்களின் உதவியை ஆப்கானிஸ்தான் அரசு நாடி உள்ளது.

நக்கீரன்