இந்திய எல்லைக்குள் சீனா ராணுவத்தின், ‘என்டர் த ட்ராகன்’!

Viruvirupu,


சீன ராணுவ ஹெலிகாப்டர் ஒன்று இந்திய-சீன எல்லையைக் கடந்து, இந்தியப் பகுதிக்குள் தரையிறங்கிய விஷயம், இந்திய ராணுவ வட்டாரங்களை அதிர்ச்சியடையச் செய்துள்ளது.

லடாக், இந்தியா: ஒரு சீன ராணுவ ஹெலிகாப்டர், இந்திய எல்லையைக் கடந்து எவ்வித எதிர்ப்பும் இல்லாமல் சாவகாசமாக உள்ளே நுழைந்திருக்கின்றது. எல்லைப் பாதுகாப்பு படையினர் யாரும் அறியாமல் லடாக் வரை பறந்து சென்று, தரையிறங்கியும் உள்ளது.

லடாக், இந்தியாவுக்குள் ஜம்மு-காஷ்மீர் மாநிலத்தில் உள்ளது.

லடாக்கில் சும்மூர் என்ற இடத்தில் தரையிறங்கிய சீன ஹெலிகாப்டரில், சீன ராணுவத்தினரும் இருந்துள்ளனர். தரையிலும் அவர்களுக்கு எந்த எதிர்ப்போ, கேள்வியோ இல்லாத நிலையில் சிறிது நேரம் அங்கே தரித்து நின்றுவிட்டு, அங்கிருந்து சென்றுவிட்டது சீன ஹெலிகாப்டர்.

கடந்த காலத்திலும் சும்மூர் பகுதியின் வான்பரப்பில் சீன ராணுவ ஹெலிகாப்டர்கள் பறப்பதும், பின்னர் அங்கிருந்து அகன்று செல்வதும் அவதானிக்கப்பட்டுள்ளது. வழமையாக மேலே பறந்துவிட்டுச் செல்லும் அவர்கள், இம்முறைதான் தரையிறங்கி விட்டுச் சென்றுள்ளார்கள்.

சும்மூர் உட்பட லாடக் பகுதியை தமது நாட்டுக்குச் சொந்தமானது என்று சீனா பல வருடங்களாகவே உரிமை கொண்டாடுகிறது. இந்தியா அதை மறுத்து வருகின்றது.

சீன ராணுவத்தால் எப்படி இந்தியப் பகுதிகளுக்குள் யாரும் தடுக்காமல் சுலபமாக ஊடுருவ முடிகின்றது?

அது மிகவும் சுலபமானது என்கின்றன ராணுவ வட்டாரங்கள். இப்பகுதியில் உள்ள இந்திய எல்லை நெடுகிலும், பாதுகாப்பு போஸ்ட்கள் இருப்பது நிஜம்தான். ஆனால், இரு பாதுகாப்பு போஸ்ட்களுக்கு இடைப்பட்ட தூரம், சில இடங்களில் 30 கி.மீ. ஆக உள்ளன. இதனால், மிக நீளமான காவலற்ற எல்லைப் பிரதேசம் இங்கு உள்ளது.

அத்துடன், ஹெலிகாப்டர் இந்திய எல்லைக்கு மேலாக பறப்பதைக் கண்டுபிடிக்க தேவையான ராடார் 24 மணி நேரமும் இயக்கப்படுவதில்லை. தினமும் 10 மணி நேரம் மாத்திரமே, ராடார் நிலையத்தில் ஆட்கள் வேலை செய்கிறார்கள். விடுமுறை தினங்களில் முழுமையாக மூடப்பட்டிருக்கும்!

சீனாக்காரர்கள் ஹெலிகாப்டரில் வந்து இறங்குவது பெரிய விஷயமா? அவர்கள் நினைத்தால், ஒரு ட்ராகனையே இந்திய எல்லைக்குள் கொண்டுவந்து மேய்த்துவிட்டு, மாலையில் அழைத்துச் செல்ல முடியும்!

எப்படித்தான் இந்தியா வல்லராசகப்போகுதோ தெரியலடா சாமி?