விமானத்தில் இருந்தது, அமெரிக்காவை தாக்க வந்த தீவிரவாதிகளா? நடுவானில் 2 விமானங்களை விமானப்படை மடக்கியது

அமெரிக்காவில் தாக்குதல் நடத்துவதற்காக வந்த தீவிரவாதிகள் விமானத்தில் பயணம் செய்கிறார்கள் என்று எழுந்த சந்தேகத்தை தொடர்ந்து, அந்த தீவிரவாதிகள் பயணம் செய்த 2 விமானங்களையும் நடுவானில் விமானப்படை மடக்கியது. அவை தரை இறங்கும்வரை விமானப்படை விமானங்கள் அவற்றை கண்காணித்தபடியே இருந்தன.

10-வது ஆண்டு நினைவு தினம்

அல்கொய்தா தீவிரவாதிகள் கடந்த 2001-ம் ஆண்டு விமானத்தை கடத்தி நிïயார்க் நகரில் உள்ள உலக வர்த்தக மைய கட்டிடத்தை தகர்த்தனர். இதில் ஆயிரக்கணக்கானவர்கள் பலியானார்கள். இந்த சம்பவம் நடந்த 10-வது ஆண்டு நினைவு தினம் நேற்று முன்தினம் நடந்தது.

இந்த தினத்தின்போது அல்கொய்தா ஆதரவு தீவிரவாதிகள் நிïயார்க் நகரின் மீது தாக்குதல் நடத்தலாம் என்று உளவுத்துறைக்கு தகவல் கிடைத்தது. இதனால் அமெரிக்க அரசாங்கம் பாதுகாப்பு நடவடிக்கைகளை முடுக்கி விட்டது.

சந்தேகத்துக்கு இடமான நடவடிக்கை

இந்த நிலையில் நிïயார்க் நகருக்கும், டெட்ராய்ட் நகருக்கும் 2 விமானங்கள் பயணம் செய்தன. இந்த விமானங்களில் சந்தேகத்துக்கு இடமான செயல்பாடுகள் நடப்பதாக விமானிகள் அபாய எச்சரிக்கையை அனுப்பினார்கள். இதை தொடர்ந்து விமானப்படை விமானங்கள் நடுவானில் பறந்த அந்த விமானங்களை மடக்கின.

விமானங்களில் பயணம் செய்த பயணிகள் குளியல் அறையில் நீண்ட நேரம் கழிப்பது சந்தேகத்தை ஏற்படுத்தி இருப்பதாகவும், அங்கிருந்தபடி அவர்கள் தாக்குதல் நடத்த சதித்திட்டம் தீட்டி இருக்கலாம் என்று சந்தேகிப்பதாகவும் விமானிகள் தகவல் கொடுத்தனர்.

3 பேர் கைது

அந்த 2 விமானங்களில் ஒன்று, நிïயார்க் நகரிலும், இன்னொன்று டெட்ராய்ட் நகரிலும் தரை இறங்கும்வரை அந்த விமானங்களை விமானப்படை விமானங்கள் பின்தொடர்ந்தும், வழிகாட்டியபடியேயும் சென்றன.

டென்வர் விமானத்தில் இருந்து புறப்பட்டு டெட்ராய்ட் நகரில் தரை இறங்கிய விமானத்தில் இருந்து 3பேர் கையில் விலங்கிடப்பட்டு அழைத்து வரப்பட்டனர். அவர்கள் மீது வழக்கு ஏதும் பதிவு செய்யப்படவில்லை.

இதேபோன்ற சந்தேகம் நிïயார்க் விமானத்தில் பயணம் செய்த பயணிகள் அதிக நேரம் குளியல் அறையில் இருந்தபோது ஏற்பட்டது.

தினதந்தி