பரமக்குடியில் இயல்பு நிலை திரும்புகிறது. பாதுகாப்புக்கு 5 ஆயிரம் போலீசார் குவிப்பு

கலவரம்- போலீஸ் துப்பாக்கி சூட்டில் 6 பேர் பலியான பரமக்குடியில், பதற்ற நிலை தணிந்து இயல்பு நிலை திரும்புகிறது. பாதுகாப்புக்காக அங்கு 5 ஆயிரம் போலீசார் குவிக்கப்பட்டு உள்ளனர்.

பரமக்குடி கலவரம்

கலவரம் மற்றும் துப்பாக்கி சூடு சம்பவத்தை தொடர்ந்து பரமக்குடியில் நேற்று 2-வது நாளாக கடைகள் அடைக்கப்பட்டு இருந்தன. பஸ் போக்குவரத்து இல்லாததால் பஸ் நிலையம் வெறிச்சோடி காணப்பட்டது. நேற்று பள்ளி, கல்லூரிகளுக்கு விடுமுறை விடப்பட்டது.

கலவர கும்பல் தாக்கி சேதப்படுத்திய ரெயில்வே கேட், மின்கம்பிகளை பணியாளர்கள் சரி செய்து வருகின்றனர், சேதமடைந்து கருகிய வாகனங்களை அப்புறப்படுத்தும் பணி நடந்தது. கலவரம் நடந்த பகுதியில் கற்கள், செருப்பு, பாட்டில் உள்ளிட்ட பொருட்கள் சிதறிக்கிடந்தன.

வீடுவீடாக சோதனை

நேற்றுமாலை பரமக்குடி-முதுகுளத்தூர் சாலை மற்றும் பொன்னையாபுரம் உள்ளிட்ட குடியிருப்பு பகுதிகளில் போலீசார் வீடுவீடாக சென்று சோதனை நடத்தி கலவரக்காரர்களை தேடினர். அப்போது அந்தபகுதியை சேர்ந்த பெண்கள் போலீசாருக்கு எதிர்ப்பு தெரிவித்தனர். தொடர்ந்து போலீசார் பாதுகாப்பு பணியில் ஈடுபட்டு பிரச்சினைக்குரிய நபர்களை பிடித்து கைது செய்துவருகின்றனர்.

5 ஆயிரம் போலீசார்

மேற்கொண்டு வன்முறை நிகழாமல் தடுப்பதற்காக பரமக்குடியில் 5 ஆயிரம் போலீசார் குவிக்கப்பட்டு உள்ளனர். பதற்றமான பகுதிகளில் கூடுதல் போலீசார் குவிக்கப்பட்டு பரமக்குடி போலீஸ் பாதுகாப்பு வளையத்துக்குள் கொண்டு வரப்பட்டு உள்ளது. கலவரத்தையொட்டி 1000 பேர் மீது வழக்குப்பதிவு செய்யப்பட்டு உள்ளது. 50-க்கு மேற்பட்டவர்கள் கைது செய்யப்பட்டனர்.

போலீசாரின் நடவடிக்கையை தொடர்ந்து பரமக்குடியில் படிப்படியாக பதற்றம் தணிந்து இயல்பு வாழ்க்கை திரும்புகிறது. கலவரத்தின்போது பரமக்குடி அருகே சேதப்படுத்தப்பட்ட ரெயில்வே சிக்னல்கள் சரிசெய்யப்பட்டு, நேற்று முன் தினம் இரவு 10.30 மணி முதல் ரெயில்கள் இயக்கப்பட்டன.

உடல்கள் ஒப்படைப்பு

இந்த நிலையில், துப்பாக்கி சூட்டில் பலியான 6 பேரில், ராமநாதபுரம் அரசு மருத்துவமனையில் வைக்கப்பட்டு இருந்த பன்னீர்செல்வம், ஜெயபால் மற்றும் பரமக்குடி அரசு மருத்துவமனையில் பள்ளவராயனேந்தலை சேர்ந்த கணேசன் ஆகியோரது உடல்கள் பிரேத பரிசோதனை முடிந்து உறவினர்களிடம் ஒப்படைக்கப்பட்டன.

மதுரை அரசு ஆஸ்பத்திரியில் வைக்கப்பட்டு இருந்த 3 உடல்களில், ஒருவர் அடையாளம் தெரியாமல் இருந்தது. அவர், காட்டு பரமக்குடியை சேர்ந்த முத்துக்குமார் (வயது 25) என்று நேற்று அடையாளம் காணப்பட்டது. நேற்று 3 பேருடைய உடல்களும் எக்ஸ்ரே எடுக்கப்பட்டு பிரேத பரிசோதனை நடத்தப்பட்டது. பின்னர் உறவினர்களிடம் உடல்கள் ஒப்படைக்கப்பட்டன.

பலியான வெள்ளைச்சாமிக்கு வலது கையிலும், முத்துக்குமாருக்கு வயிற்றுப்பகுதியிலும், தீர்ப்புக்கனிக்கு 2 கால்களிலும் குண்டு பாய்ந்து இருப்பதாக டாக்டர்கள் தெரிவித்தனர்.

ஆஸ்பத்திரியில் பரபரப்பு

முத்துக்குமாரின் உடலை அடையாளம் காட்டுவதற்காக அவருடைய உறவினர்கள் கும்பலாக சென்றபோது போலீசார் தடுத்ததால், அவர்கள் கோஷம் எழுப்பி ஆர்ப்பாட்டம் நடத்தினார்கள். அதேபோல் மேலும் பலர், காணாமல் போன தங்கள் உறவினர்களைத் தேடி ஆஸ்பத்திரிக்கு வந்தவண்ணம் இருந்தனர்.

அத்துடன், மதுரை துவரிமானில் நடந்த விபத்தில் பலியான 7 பேரின் உடல்களை பெறுவதற்காகவும் ஏராளமான பேர் அங்கு கூடி இருந்தனர். இதனால் ஆஸ்பத்திரியில் பரபரப்பும் பதற்றமும் காணப்பட்டது. பலத்த போலீஸ் பாதுகாப்பும் போடப்பட்டு இருந்தது.

பலியானவர்களின் உடல்கள் கொண்டு செல்லப்பட்ட கிராமங்களிலும் பதற்ற நிலை காரணமாக போலீஸ் ரோந்து தீவிரப்படுத்தப்பட்டு இருந்தது.

தினதந்தி