சாதிப்பார்களா நட்சத்திர வீரர்கள்?

சாம்பியன்ஸ் டிராபி கிரிக்கெட் தொடர் நாளை தென்ஆப்ரிக்காவில் துவங்குகிறது. கடந்த சில ஆண்டுகளாக சர்வதேச போட்டிகளில் பங்கேற்காத ஷேன் பாண்ட், முகமது ஆசிப் போன்ற நட்சத்திர வீரர்கள் இத்தொடரில் சாதிக்க காத்திருக்கின்றனர்.
சர்வதேச கிரிக்கெட் கவுன்சில் (ஐ.சி.சி.,) சார்பில் இரண்டு ஆண்டுகளுக்கு ஒருமுறை சாம்பியன்ஸ் டிராபி (மினி உலக கோப்பை, 50 ஓவர்) தொடர் நடத்தப்படுகிறது. ஆறாவது சாம்பியன்ஸ் டிராபி தொடர், தென் ஆப்ரிக்காவில் நாளை துவங்குகிறது. இதில் இந்தியா, ஆஸ்திரேலியா உள்ளிட்ட சர்வதேச ரேங்கிங்கில் "டாப்-8' இடத்தில் உள்ள அணிகள் மட்டும் பங்கேற்கின்றன. நாளைய முதல் போட்டியில் தென் ஆப்ரிக்க அணி, இலங்கையை எதிர்த்து விளையாடுகிறது.
மிக நீண்ட இடைவேளைக்கு பின், முக்கிய தொடரில் பங்கேற்க உள்ள இந்தியாவின் ராகுல் டிராவிட், ஆஷிஸ் நெஹ்ரா, நியூசிலாந்தின் ஷேன் பாண்ட் மற்றும் பாகிஸ்தான் வீரர் முகமது ஆசிப் மீது அதிக எதிர்பார்ப்பு ஏற்பட்டுள்ளது.
"பெருஞ்சுவர்' டிராவிட்:
இரண்டு ஆண்டுகளுக்கு முன்பு (2007) தோனி தலைமையிலான அணி தென் ஆப்ரிக்காவில் "டுவென்டி-20' தொடரை வென்றது. அதன் பின் ஒருநாள் அணியில் இளைஞர்களுக்கு வாய்ப்பு அளிக்கப்பட, டிராவிட் புறக்கணிக்கப்பட்டார். அவரே எதிர்பாராத விதமாக நீண்ட இடைவெளிக்கு பின் இலங்கையில் நடந்த முத்தரப்பு தொடர், சாம்பியன்ஸ் டிராபி தொடருக்கு தேர்வு செய்யப்பட்டார். முத்தரப்பு தொடரில் தனது திறமையை நிரூபித்த டிராவிட், தென் ஆப்ரிக்காவிலும் அசத்தலாம்.
இதுகுறித்து அவர் கூறுகையில்,"" என்னை நிரூபிக்க வேண்டிய அவசியம் இல்லை. என்ன காரணத்திற்காக அணிக்கு தேர்வு செய்தார்களோ அதில் சிறப்பாக செயல்படுவேன்,'' என்றார்.
ஆஷிஸ் அபாரம்:
காயத்தினால் அணியில் இருந்து விலகி நான்கு ஆண்டுகளுக்கு பின்பு, கடந்த ஜூன் மாதம் வெஸ்ட் இண்டீஸ் அணிக்கு எதிரான ஒருநாள் தொடருக்கு ஆஷிஸ் நெஹ்ரா தேர்வு செய்யப்பட்டார். அங்கு சிறப்பாக செயல்பட்டார். காயம் அடைந்த ஜாகிர் கானுக்கு பதில் தற்போது அணியில் <உள்ளார். இதுகுறித்து அவர் கூறுகையில்,"" 30 வயதான நிலையில் மீண்டும் அணியில் இடம் பிடிக்க முடியுமா என்ற கவலை இருந்தது. ஆனால் சிறப்பாக செயல்பட்டால், எந்நிலையிலும் அணியில் இடம் பிடிக்கலாம் என்பது உறுதியாகியுள்ளது. புதிய மற்றும் பழைய பந்துகளில் அசத்துவதற்கு முயற்சிப்பேன். "பவர் பிளே' மற்றும் கடைசி நேரங்களிலும் பொறுப்பாக செயல்படுவேன்,'' என்றார்.
மீண்ட பாண்ட்:
காயங்கள் மற்றும் தடைசெய்யப்பட்ட ஐ.சி.எல்., தொடரில் இணைந்து விளையாடியது போன்ற காரணங்களால் இரண்டு ஆண்டுகளாக சர்வதேச கிரிக்கெட்டை விட்டு விலகியிருந்தார் நியூசிலாந்தின் ஷேன் பாண்ட். தற்போது இலங்கைத் தொடரில் மீண்டு வந்த பாண்ட், அணிக்கு நம்பிக்கை கொடுத்தார். சாம்பியன்ஸ் டிராபி தொடர் குறித்து பாண்ட் கூறுகையில்,"" சாம்பியன்ஸ் டிராபி தொடரில் சிறப்பாக செயல்பட்டு, "நம்பர்-1' இடத்தை பெற முயற்சிப்பேன்,'' என்றார்.
"போதை' ஆசிப்:
தடைசெய்யப்பட்ட ஊக்கமருந்து பயன்படுத்தியதால் கடந்த ஓராண்டு தடைவிதிக்கப்பட்டு இருந்தார் பாகிஸ்தான் வேகப்பந்து வீச்சாளர் முகமது ஆசிப். தற்போது அணியில் சேர்க்கப்பட்டது குறித்து அவர் கூறுகையில்,"" சிறந்த பவுலராக பிரகாசித்த போது, திடீரென வீழ்ச்சி ஏற்பட்டது. இப்போது மறுபிறப்பு எடுத்தது போல் உள்ளது. தென் ஆப்ரிக்கா எனக்கு ராசியான இடம். அணி கோப்பையுடன் திரும்ப உதவுவேன்,'' என்றார்.