அர்ஜுனனுக்காக போரிட்ட அரன்

பஞ்சபாண்டவர்களில் ஒருவனான அர்ஜுனன் வில்வித்தையில் சிறந்தவன். பகவான் கிருஷ்ணனே அவனுக்கு சாரதியாக இருந்து வழிநடத்தி மகாபாரத போரில் வெற்றியை தேடித் தந்தார். இது எல்லோருக்கும் தெரிந்த ஒன்று. ஆனால் சிவபெருமான், அர்ஜுனனுக்காக போரிட்டு அதன் காரணமாக முகத்தில் தழும்பு பெற்றதாகவும் ஒரு புராணக்கதை உண்டு. அர்ஜுனனுக்காக போரிட்டபோது ஏற்பட்ட தழும்பு, திருவாண்டார் தலத்திலுள்ள சிவலிங்கத்தில் காணப்படுகிறது.

மிகப் பழமையான இந்தக் கோயிலை பராந்தக சோழன் கட்டியுள்ளான். ஞானசம்பந்தர் பாடியபடி வடுகீஸ்வரர் என்ற பெயருடன் இறைவன் அழைக்கப்படுகிறார். அதேபோல் திரிபுரசுந்தரி என்ற நாமத்துடன் அருள்கிறாள் அம்பிகை. வடுவகிர்கன்னி என்றும் அம்பாளுக்கு இன்னொரு பெயர் உண்டு. சமயக் குரவர்களான அப்பர், சுந்தரர், மாணிக்கவாசகர், திருஞானசம்பந்தர் ஆகியோரும் இத்தல நாதனை பாடியுள்ளனர். வடலூர் ராமலிங்க சுவாமிகளும் இங்கு வந்துள்ளார். நடுநாட்டுத் தலங்களான 22ல் இது 16வது தலம். முற்காலத்தில் இங்கு நீர்ச் சுனைகள் இருந்தனவாம். குறிப்பாக ஐந்து ஆறுகள் பாய்ந்ததாகவும் கூறுகிறார்கள். அதன் காரணமாகவே இறைவனுக்கு பஞ்சநதீஸ்வரர் என்ற பெயரும் உண்டு.

தலவிருட்சம் வன்னி. சுவாமி விமானமும் காஞ்சிபுரம் கைலாசநாதர் கோயில் விமானமும் ஒரே காலத்தில் நிர்மாணிக்கப்பட்டவை. வலம்புரி விநாயகர் வன்னி மரத்தின் அடியிலும், சுப்ரமண்யர் வில்வ மரத்தின் அடியிலும் வீற்றிருந்து அருள்பாலிக்கிறார்கள். தட்சிணாமூர்த்தி, சப்தகன்னிகள், கணபதி, லிங்கோத்பவர், பிரம்மா, ஞான தட்சிணாமூர்த்தி, அர்த்தநாரீஸ்வரர், ரிஷபாரூடர், துர்க்கா பரமேஸ்வரி, வள்ளி&தெய்வானை சமேத சுப்ரமண்யர், சூரியன், சந்திரன், பைரவர், நவகிரக மூர்த்திகள், துவார பச்சிம கணபதி, துவாரக பச்சிம சுப்ரமண்யர் மூர்த்தங்கள் பிராகாரத்தை அழகு செய்கின்றனர்.

சிவசண்டிகேஸ்வர பைரவர், நந்தியம்பெருமான் இருவரும் வெளிபீடத்தில் அருள்பாலிக்கிறார்கள். கொடிமரம் இல்லை. ஆனால் முன்பு இருந்ததற்கான ஆதாரபீடம் மட்டும் தற்போது உள்ளது. சுவாமி சந்நதி முன்பு கணபதி, துவார பாலகர்கள் வீற்றிருக்கிறார்கள். மகிஷாசுரமர்த்தினி போர்க்கோலத்தில் காட்சியளிக்கிறாள். கோயிலில் உள்ள பல கருங்கல் சிற்பங்கள் மிகவும் கலைநயத்துடன் அமைக்கப்பட்டுள்ளன. சோழர்கால கட்டடக்கலைக்கு எடுத்துக்காட்டாக இந்தக்கோயில் திகழ்கிறது.

பாவங்களை போக்கும் புண்ணியத் தலமாக இக்கோயில் விளங்குகிறது. உள்ளம் உருக இறைவனை வழிபட்டால் எந்தப் பிரச்னையும் தீர்ந்து விடும். கல்வி, செல்வம் பெருகும். நோய்நொடிகள் நீங்கும். பிரெஞ்சுக்காரர்கள் காலத்தில் கோயிலை புதுப்பித்து விநாயகர், முருகன் சந்நதிகளைக் கட்டினர். கோயிலைப் பராமரிக்கும் பணியை தொல்பொருள் ஆய்வுத்துறை மேற்கொண்டிருக்கிறது. 1991ம் ஆண்டு திருக்குடமுழுக்கு விழா நடந்தது. புதுவை அரசின் இந்து சமய அறநிலையத்துறை கோயில் நிர்வாகத்தை மேற்கொண்டிருக்கிறது. கோயிலில் பல கல்வெட்டுகள் உள்ளன. இவற்றை மேலும் ஆய்வு செய்தால் பல அரிய தகவல்கள் கிடைக்கலாம் என்கிறார்கள்.

சிறப்பு வாய்ந்த இந்தக் கோயில் புதுவை&விழுப்புரம் தேசிய நெடுஞ்சாலையில் திருவாண்டார்கோவில் என்ற ஊரில் உள்ளது. பேருந்து வசதி உண்டு. விழுப்புரம், புதுச்சேரி போன்ற ஊர்களிலிருந்தும் வாடகை வாகனங்களைப் பயன்படுத்தி கோயிலுக்குச் செல்லலாம்.

தினகரன்