தர்மசங்கடமான கேள்வியால் பேட்டியை பாதியில் நிறுத்திய முதல்வர்!

**சிவா** · **சிவா** Fri Sep 09, 2011 8:17 pm

திருவனந்தபுரம் : கேரளாவில் காங்கிரஸ் தலைமையிலான கூட்டணி அரசு பதவியேற்று 100 நாட்கள் நிறைவடைந்துள்ளது. இதை கொண்டாடும் வகையில் மாநில முதல்வர் உம்மன்சாண்டி பல்வேறு தொலைகாட்சிகளுக்கு நேரடி பேட்டி கொடுக்க சம்மதித்திருந்தார். நேற்று ஒரு தனியார் தொலைகாட்சியில் உம்மன் சாண்டியின் பேட்டி நேரடியாக ஒளிபரப்பானது. பாலக்காட்டில் ஆதிவாசிகள் நிலத்தை தனியார் நிறுவனத்துக்கு கொடுத்தது ஏன், முந்தைய இடதுசாரி கூட்டணி ஆட்சியின் போது காசர்கோட்டில் நடைபெற்ற துப்பாக்கி சூடு குறித்து விசாரணை நடத்த நியமிக்கப்பட்ட ஜூடிஷியல் கமிஷனை மாற்றியது ஏன் போன்ற பல தர்மசங்கடமான கேள்விகளை நிருபர் கேட்டார்.

இதற்கு பதில் அளிக்காமல் உம்மன்சாண்டி பேட்டியை பாதியில் நிறுத்திவிட்டு எழுந்து சென்று விட்டார். 45 நிமிடம் ஒளிபரப்பாக வேண்டிய பேட்டி 20 நிமிடத்திலேயே முடிந்தது. எந்த சூழ்நிலையிலும் நிதானத்தை இழக்காதவர் என பெயர் வாங்கிய உம்மன் சாண்டி பேட்டியை பாதியில் நிறுத்தியது கேரள அரசியலில் பரபரப்பை ஏற்படுத்தியுள்ளது.

தினகரன்