பிளாஸ்டிக் பயன்படுத்தாத மலைகிராம மக்கள்

by நியாஸ் அஷ்ரஃப் Fri Sep 09, 2011 4:37 pm

தாளவாடி மலைகிராம மக்கள் பிளாஸ்டிக் பொருட்களை பயன்படுத்தாமல் நகர்புறங்களுக்கு ரோல் மாடலாக விளங்குவது வியப்பை ஏற்படுத்தியுள்ளது.

பொதுவாக ஒவ்வொரு கிராமங்களும் நகர்புறங்களை போல் வளர வேண்டும். அவர்கள் பின்பற்றுவதை நாம் பின்பற்றி நகருக்கு இணையாக விளங்க வேண்டும் என்று நினைப்பது சாதாரணம். இதற்கு மாறாக நகர்புறங்களுக்கு ரோல்மாடலாக ஒரு கிராமம் விளங்குவது உண்மையிலேயே வியப்பை ஏற்படுத்தியுள்ளது.

ஈரோடு மாவட்டம் தாளவாடி மலைகிராமத்தில் தமிழ்நாட்டின் கடைக்கோடியில் அமைந்திருக்கும் அந்த கிராமத்திற்கு பெயர்தான் தொட்டமுதுகரை. இது தாளவாடி யூனியனுக்கு உட்பட்ட கிராமம் ஆகும். இங்கு பத்துக்கும் மேற்பட்ட மகளிர் சுயஉதவி குழுக்கள் இயங்கி வருகிறது. இந்த கிராம மக்கள் தங்கள் கிராமம் மற்ற கிராமங்களைவிட அனைத்து வகையிலும் சிறப்பு பெறவேண்டும் என்பதில் ஆர்வம் கொண்டவர்கள்.

இதற்காக அவர்கள் மேற்கொண்ட திட்டம்தான் பிளாஸ்டிக் பொருட்களை கிராமத்தில் யாரும் பயன்படுத்த கூடாது என்ற முக்கிய முடிவாகும். பல்வேறு வகைகளில் உயர்ந்துள்ள மாநகராட்சி, நகாரட்சி பகுதிகளிலேயே பிளாஸ்டிக்கை பயன்படுத்த கூடாது என்ற வாசகம் வார்த்தையாக மட்டும் உள்ள நிலையில் இந்த மலைகிராம மக்கள் மட்டும் இந்த திட்டத்தை தீவிரமாக கடைபிடித்து வருவது இவர்களின் நாட்டுபற்றை நமக்கு எடுத்துகாட்டுகிறது.

இந்த கிராம மக்கள் கடைகளுக்கு சென்றால் துணி பை எடுத்து செல்கிறார்கள். கடைகளில் பிளாஸ்டிக் பைகளில் பொருட்களை போட்டுகொடுத்தால் இந்த கிராம மக்கள் அதை வாங்குவதில்லை. தாங்கள் கொண்டுசென்ற துணி பையில்தான் பொருட்களை வாங்கி வருகின்றனர். அதேபோல் கிராமத்தில் எங்குபார்த்தாலும் சுத்தமாக காட்சியளிக்கிறது.

நாட்டின் கடைகோடியில் உள்ள தொட்டமுதுகரை கிராம மக்களிடம் ஏற்பட்டுள்ள இந்த விழிப்புணர்வை ரோல் மாடலாக எடுத்துக்கொண்டு நகர்புறத்தில் உள்ள மக்கள் மற்றும் அதிகாரிகள் செயல்பட்டால் நாட்டின் முக்கிய செல்வமாக கருதப்படும் சுற்று‌ச்சூழலை காப்பது எளிதாகும்.

நன்றி : வெப்துனியா