வேலிக்கு ஓணான் சாட்சி

மன்மோகன் சிங் அரசு நம்பிக்கை வாக்கெடுப்பில் வெற்றி பெற்றபோது, அரசுக்கு ஆதரவாக வாக்களிக்கப் பணம் கொடுத்த ஊழல் வழக்கில் குற்றம் சாற்றப்பட்டு, கைது செய்யப்பட்டுள்ள சமாஜ்வாடிக் கட்சியின் முன்னாள் மூத்த தலைவர் அமர் சிங், குற்றமற்றவாராக விரைவில் விடுதலையாவார் என்று காங்கிரஸ் கட்சியின் மூத்த தலைவர் திக் விஜய் சிங் கூறியுள்ளார்.

அமர் சிங் மீது திக் விஜய் சிங்கிற்கு இப்படி ஒரு கரிசனம் பிறக்க காரணம் இல்லாமல் இல்லை. 2008ஆம் ஆண்டில் மன்மோகன் சிங் அரசு அமெரிக்காவுடன் செய்து கொண்ட அணு சக்தி ஒத்துழைப்பு ஒப்பந்தம் காரணமாக அதுவரை காங்கிரஸ் தலைமையிலான ஐக்கிய முற்போக்குக் கூட்டணி அரசுக்கு அளித்து வந்த ஆதரவை இடதுசாரி கட்சிகள் விலக்கிக் கொண்டன. இதனால், அரசு பெரும்பான்மை இழந்தது.

அரசைக் கவிழ்க்க இதுவே சரியான தருணம் என்று திட்டமிட்ட பாரதிய ஜனதாவும், அதன் கூட்டணிக் கட்சிகளும், இடதுசாரி கட்சிகளும் மன்மோகன் அரசுக்கு எதிராக நம்பிக்கை இல்லா தீர்மானம் கொண்டு வர முடிவெடுத்தன. இதனை உணர்ந்த பிரதமர் மன்மோகன் சிங், தனது அரசின் பெரும்பான்மையை நிரூபிக்க தானே நம்பிக்கைத் தீர்மானம் ஒன்றை முன்மொழிந்தார். அதன் மீது விவாதமும் நடந்தது.

மன்மோகன் சிங் தலைமையிலான அரசுக்கு மக்களவையில் பெரும்பான்மை இல்லை. ஆயினும் துணிவாக நம்பிக்கைத் தீர்மானம் கொண்டு வந்ததற்குக் காரணம், சமாஜ்வாடி, மாயாவதியின் பகுஜன் சமாஜ் ஆகிய கட்சிகள் ‘திடீரென’ அரசுக்கு ஆதரவு தெரிவிப்பதாக அறிவித்தன. இந்த கட்சிகள் சரியாகக் கவனிக்கப்பட்டதன் விளைவு, நம்பிக்கைத் தீர்மானத்தில் மன்மோகன் சிங் அரசு வெற்றி பெற்றது. அருதிப் பெரும்பான்மையை நிரூபிக்கத் தேவையான 273 வாக்குகளுக்கும் அதிகமான வாக்குகளை பெற்றார்.

இந்த ‘வெற்றி’க்கு வித்திட்ட வேலைகளைச் செய்தவர் - அதாவது பணம் கொடுத்து கட்சிகளையும், உறுப்பினர்களையும் அரசுக்கு ஆதரவாக திருப்பியதில் - அமர் சிங்கின் பங்கு முக்கியமானது ஆகும்.

அதனால்தான் அமர் சிங் இந்த வழக்கில் இருந்து குற்றமற்றவர் என்று நிரூபித்து வெளியில் வருவார் என்று நம்பிக்கையுடன் தனது உள்ளக்கிடக்கையை வெளிப்படுத்தியுள்ளார் திக் விஜய் சிங். அரசுக்கு ஏற்படும் சவால்களை சமாளிக்கும் ‘திறன்’ கொண்ட தலைவர்களில் முக்கியமானவர்களாகத் திகழும் அமர் சிங்கிற்கும், திக் விஜய் சிங்கிற்கும் கட்சிகளையும், கொள்கைகளையும் தாண்டிய ஒரு உறவு இருப்பதில் ஆச்சரியம் ஏதுமில்லையல்லவா? இவர்களை இணக்கும் ‘ஜனநாயகத் தன்மை’ இதுதானே.

நன்றி : தமிழ் வெப்துனியா