நல்லவன்

First topic message reminder :

ஆணியில் தொங்கிக்கொண்டிருந்த கணவனின் சட்டையைத் துவைப்பதற்காக எடுத்த ரோஸ்மேரிக்கு, பைக்குள் ஏதோ இருப்பது தெரிந்தது. எடுத்துப்பார்த்தவள் அதிர்ந்தாள்.

இரண்டு சினிமா டிக்கெட்!

ஆபீசில் வேலை என்று போனில் சொல்லிவிட்டு, நேற்று லேட்டாக வந்ததன் காரணம் இப்போது புரிந்தது ரோஸ்மேரிக்கு.

கொஞ்சநாளாகவே தனது கணவனின் போக்கில் தெரிந்த மாற்றங்களைக் கவனித்துக் கொண்டுதான் இருந்தாள் ரோஸ்மேரி. உயிருக்கு உயிராகக்காதலித்து கரம்பற்றிய கணவன், இத்தனை சீக்கிரத்தில் தனக்கு துரோகம் செய்வான் என்பதை நினைத்துப் பார்க்கக் கூட முடியாதவளாய் நிலை குலைந்து நின்றாள்.

மோகம் முப்பது நாள் என்பது சரிதானோ?

ஆபீஸ் முடிந்து வீட்டுக்குவந்த ராகவன், கொடியில் உலர்ந்து கொண்டிருந்த சட்டையைப் பார்த்தான். பைக்குள் வைத்திருந்த சினிமா டிக்கெட் அவன் நினைவுக்கு வந்து நெஞ்சைக் குடைந்தது.

"ரோஸ்...''

"பேசாதீங்க... உடம்பு பத்திக்கிட்டு எரியுது. எத்தனை நாளா இந்தக்கள்ள உறவு நடக்குது? யார் அவ? இப்பவே எனக்கு தெரிஞ்சாகணும்...'' முகத்தில் எள்ளும் கொள்ளும் வெடிக்க, பத்ரகாளியாக நின்று கொண்டிருந்த மனைவியை நிதானமாக நிமிர்ந்து பார்த்தான் ராகவன்.

"ரோஸ்... என்ன நடந்ததுன்னு தெரிஞ்சுக்காம ஏதேதோ கற்பனை பண்ணிப்பேசாதே... நேற்று பைக் தவணை கட்ட டவுனுக்குப் போனபோது உன் தங்கை மலர்க்கொடியையும் பக்கத்து ஊர் நாட்டாமையின் பையன் காத்தவராயனையும் ஜோடியாக தியேட்டர் வாசலில் பார்த்தேன். அவர்கள் என்னைக் கவனிக்கவில்லை. பைக்கை ஓரமாக நிறுத்திவிட்டு அவர்கள் எதிரில் போய் நின்றேன். பார்த்ததும் அதிர்ந்தார்கள். அந்தப்பையன் காத்தவராயன் நைசாக கூட்டத்தில் கலந்து எஸ்கேப் ஆகி விட்டான். உன் தங்கையைக் கண்டித்து புத்திமதி சொல்லி, பஸ் ஏற்றி உங்க ஊருக்கு அனுப்பி வைத்தேன். நான்போனதும் அவர்கள் மறுபடியும் தியேட்டருக்கு படம் பார்க்கப் போய்விடக் கூடாது என்பதற்காக உன் தங்கை கையில் வைத்திருந்த 2 சினிமா டிக்கெட்டுகளையும் வாங்கி வைத்துக் கொண்டேன்.

விசாரித்தவரை பையன் நல்லவனாத்தான் தெரியறான்.உன் வீட்டில் சொல்லி, அவர்களைச் சேர்த்து வைக்கச் சொல். அதுதான் நமது குடும்பத்துக்கு கவுரவம், புரிந்ததா? இதற்கு மேலும் என்மீது உனக்கு சந்தேகம் இருந்தால், அந்த சினிமா டிக்கெட்டை நன்றாகப் பார். அது உபயோகிக்கப்படாத முழு டிக்கெட்...''

ராகவன் சொல்லி முடிக்க, அப்பழுக்கற்ற கணவனை சந்தேகித்து விட்டதற்காக விக்கித்துப் போனாள் ரோஸ்மேரி.

- ஓடைமறிச்சான்

சில ஆண்கள் சில நேரத்தில் இப்படி பொய் சொல்லித்தான் பெண்களை ஏமாத்துராங்க...