அழகர் கோயில் தோசை

**krishnaamma** · **krishnaamma** Mon Nov 08, 2010 6:16 pm

தேவையான பொருள்கள்:

பச்சரிசி - 3 கப்
கருப்பு உளுத்தம்பருப்பு – 2 கப் (தோலுடன்)
மிளகு – 2 டீஸ்பூன்
சுக்குப் பொடி - 1/4 டீஸ்பூன்
கறிவேப்பிலை - சிறிதளவு
நெய், உப்பு – தேவையான அளவு

செய்முறை:

அரிசியை ஊறவைத்து நீரை வடித்து வறட்டு மாவாக, மிக்ஸியில் கரகரப்பாக அரைத்துக் கொள்ளவும். (கோயிலில் இதை உரலில் போட்டு இடிப்பதற்காக ஆட்களை நியமித்திருப்பார்கள்.)

உளுந்தை இரண்டு மூன்று முறை களைந்து கொள்ளவும். பாதி அளவு தோலை மட்டும் நீக்கிவிட்டு, மீதியை அதிலேயே சேர்த்து தண்ணீர் விட்டு கெட்டியான விழுதாக அரைத்துக் கொள்ளவும்.

தேவையான உப்பு, அரிசி மாவோடு கலந்து 6 மணி நேரம் அப்படியே வைக்கவும். (கோயிலில் காலையில் அரைத்து இரவில் செய்வார்கள்.) இந்தக் கலவை, தோசை மாவு மாதிரி இல்லாமல் வடை மாவு பதத்தில் கெட்டியாக இருக்க வேண்டும்.மறுநாள் மாவில் சுக்குப் பொடி, ஒன்றிரண்டாக உடைத்த மிளகு, நறுக்கிய கறிவேப்பிலை சேர்த்துக் கலந்து கொள்ளவும்.

அடுப்பில் தோசைக்கல் சூடானதும், மாவை சற்று கனமான தோசைகளாக (இரண்டு அங்குல உயரம்) வார்த்து, சுற்றிலும் நெய் விட்டு அடுப்பை சிம்’மில் வைக்கவும்.நன்கு சிவந்து மொறுமொறுப்பாக ஆனதும், மறுபக்கம் திருப்பிப் போட்டு, மீண்டும் நெய் விட்டு, சிவக்க மொறுமொறுப்பாக எடுக்கவும்.

குறிப்பு : அடுப்பு சிம்மில் மட்டுமே இருக்க வேண்டியது முக்கியம்.

வீட்டில், கொஞ்சம் மென்மையான தோசை வேண்டும் என்று நினனப்பவர்கள், பாதிக்குப் பாதி புழுங்கல் அரிசி சேர்த்துக் கொள்ளலாம். வாசனைக்குப் பெருங்காயமும். இவை இரண்டும் கோயிலில் தவிர்ப்பவை.

அழகர் கோவிலில் ஒரே ஒரு தோசைதான் செய்வார்களாம். அதையே 'விண்டு விண்டு' சுண்டலுடன் கலந்து வினியோகம் செய்வார்களாம் புன்னகை

**சிவா** · **சிவா** Mon Nov 08, 2010 7:04 pm

இரண்டு அங்குல உயரத்தில் உள்ளது தோசையா அல்லது ஊத்தப்பமா?

**krishnaamma** · **krishnaamma** Mon Nov 08, 2010 8:48 pm

திருப்பதி இல் எப்பவாவது தோசை பிரசாதம் சாப்பிட்டு இருக்கிங்களா ? கொஞ்சம் "மென்னை பிடிக்கும் ", கிட்ட தட்ட அது போல் தான் இருக்கும். பிரெஷ் ஆக இருந்தால் கொஞ்சம் கர கரப்பாக இருக்கும். மற்றபடி ஊத்தப்பம போல் 'மெத்' என இருக்காது புன்னகை

**சிவா** · **சிவா** Mon Nov 08, 2010 9:20 pm

krishnaamma wrote:திருப்பதி இல் எப்பவாவது தோசை பிரசாதம் சாப்பிட்டு இருக்கிங்களா ? கொஞ்சம் "மென்னை பிடிக்கும் ", கிட்ட தட்ட அது போல் தான் இருக்கும். பிரெஷ் ஆக இருந்தால் கொஞ்சம் கர கரப்பாக இருக்கும். மற்றபடி ஊத்தப்பம போல் 'மெத்' என இருக்காது

விளக்கத்திற்கு நன்றி தோழி!