மின் இணைப்பு கோரி 20 ஆண்டுகளாகக் காத்திருக்கும் விவசாயிகள்!

மின் இணைப்பு கோரி 20 ஆண்டுகளாகக் காத்திருக்கும் விவசாயிகள்!

First Published : 07 Sep 2011 03:17:48 AM IST




தருமபுரி: மின் இணைப்பு கோரி தமிழகம் முழுவதும் சுமார் 6 லட்சம் விவசாயிகள்
கடந்த 20 ஆண்டுகளுக்கும் மேலாக காத்திருக்கின்றனர். நிலுவையில் உள்ள இந்த
இணைப்புகளுக்கு எப்போது மின்சாரம் வழங்கப்படும் என்பதே அவர்களது எதிர்பார்ப்பாக
உள்ளது.
தமிழகத்தில் இப்போதைய நிலவரப்படி 18.02 லட்சம் விவசாய மின் இணைப்புகள் உள்ளன.
மின் தட்டுப்பாடு காரணமாக கடந்த 10 ஆண்டுகளுக்கும் மேலாக விவசாய மின் இணைப்புகள்
வழங்குவதில் தேக்கநிலை ஏற்பட்டது.
இந்த நிலையில், இலவச இணைப்பு கோரி காத்திருக்கும் விவசாயிகள், ரூ.50 ஆயிரம்,
ரூ.25 ஆயிரம், ரூ.10 ஆயிரம் கட்டணம் செலுத்தி மின் இணைப்பு பெறும் சுய நிதித்
திட்டத்தை 7 ஆண்டுகளுக்கு முன் மின்வாரியம் அமல்படுத்தியது.
1987-ம் ஆண்டு முதல் இணைப்பு கோரி காத்திருந்த பலரும் சுயநிதித் திட்டத்துக்கு
மாற்று மனு அளித்தனர். ஆனால், இத் திட்டத்திலும் இணைப்பு வழங்குவதில் வரிசை மூப்பு
உள்ளிட்ட பல்வேறு காரணங்களால் இணைப்புகளை உடனே பெற இயலாத நிலை ஏற்பட்டது.


தமிழகத்தில் ஆண்டுக்கு சராசரியாக 930.70 மி.மீ. மழை பெய்கிறது. மொத்தமுள்ள
வேளாண்மை சாகுபடி பரப்பு 48.92 லட்சம் ஹெக்டேர். இதில், 28.64 லட்சம் ஹெக்டேர்
பரப்புக்கு மட்டுமே நீராதாரம் உள்ளது. இதில் 7.57 லட்சம் ஹெக்டேர் விளை நிலங்கள்
கால்வாய் பாசனமாகவும், 5.04 ஹெக்டேர் பரப்பு ஆறு, குளத்து நீரை நம்பியும், 15.94
லட்சம் ஹெக்டர் பரப்பு கிணற்றுப் பாசனத்தையும் நம்பி உள்ளது. எஞ்சியுள்ள 20.28
லட்சம் ஹெக்டேர் பரப்பு மழையை நம்பியே உள்ளது. இந் நிலையில், மின் இணைப்பு கோரி
காத்திருக்கும் விவசாயிகள் ஆயில் என்ஜின் பயன்படுத்தியே கிணறுகளில் இருந்து நீரைப்
பாய்ச்சுகின்றனர். டீசல் விலையும் தொடர்ந்து உயர்ந்து வருகிறது. இதனால்,
உற்பத்தியான விளைபொருளுக்கு கட்டுப்படியான விலை கிடைக்கும் காலங்களில் மட்டுமே டீசலை
பயன்படுத்தி கிணற்றுப் பாசனத்தை மேற்கொள்கின்றனர்.கடந்த 20 ஆண்டுகளில் மாநிலம்
முழுவதும் இணைப்பு கோரி விவசாயிகளிடம் இருந்து சுமார் 6 லட்சம் மனுக்கள்
பெறப்பட்டுள்ளன.
குறிப்பாக தருமபுரி, கிருஷ்ணகிரி, சேலம், நாமக்கல் மற்றும் தென் மாவட்டங்களில்
கிணற்றுப் பாசனத்தை நம்பியே 70 சதவீத விவசாயிகள் சாகுபடிப் பணிகளை மேற்கொள்கின்றன.
எனவே, இம் மாவட்டங்களில் உள்ள நிலுவை இணைப்புகளையாவது முன்னுரிமை அளித்து வழங்க
வேண்டும் என்று விவசாயிகள் கோருகின்றனர்.

தமிழகத்தில் ஆட்சிப் பொறுப்பேற்ற பிறகு முதல்வர் ஜெயலலிதா, நிலுவையில் உள்ள
விவசாய மின் இணைப்புகளை வழங்க ஆவன செய்வதாக உறுதியளித்துள்ளார். ஆண்டுக்கு 1 லட்சம்
இணைப்புகள் வழங்கப்படும் எனக் கூறியுள்ளார். இதன்படி நிலுவையில் உள்ள 6 லட்சம்
இணைப்புகள் வழங்குவதற்கு 6 ஆண்டுகளாகிவிடும். மேலும்,புதிதாக இணைப்பு கோரி மனுக்கள்
வழங்கப்படும் சூழலும் உள்ளது.
தளவாடப் பொருள்களுக்காக காத்திருப்பு: இது குறித்து தருமபுரி, கிருஷ்ணகிரி
மாவட்டங்களுக்கான மின் பகிர்மான வட்ட மண்டல மேற்பார்வைப் பொறியாளர் ம. மணிவேலு
கூறியது:
இந்த இரு மாவட்டங்களில் 13 ஆயிரம் விவசாய இணைப்புகள் நிலுவையில் இருந்தன.
கடந்த 2 ஆண்டுகளில் பதிவு மூப்பு முன்னுரிமை அடிப்படையில் இணைப்புகள் வழங்கப்பட்டன.
இப்போது எஞ்சியுள்ள{10 ஆயிரம் மின் இணைப்புகளை வழங்க 5 ஆயிரம் கி.மீ. தூரத்துக்கு
மின் ஒயர்கள், 25 ஆயிரத்துக்கும் மேற்பட்ட கம்பங்கள் மற்றும் தளவாடப் பொருள்கள் தேவை.
இவை முழுமையாக வழங்கினால் மட்டுமே நிலுவையில் உள்ள இணைப்புகளுக்கு மின்சாரம் அளிக்க
முடியும். இது குறித்து மின்வாரியத் தலைமைக்கு தெரிவிக்கப்பட்டுள்ளது என்றார்.


முதல்வருக்கு கோரிக்கை: மின்வாரியத்துக்கு முன்னுரிமை அளித்து செம்மைப்படுத்த
நடவடிக்கை எடுத்து வருவதாகக் கூறும் முதல்வர் ஜெயலலிதா, நிலுவையில் உள்ள விவசாய மின்
இணைப்புகளை விரைந்து வழங்க கொள்கை அளவிலான திட்டங்களை அறிவிக்க வேண்டும் என்று
தமிழ்நாடு விவசாயிகள் சங்க மாநிலப் பொதுச் செயலர் ப. சண்முகம் கேட்டுக்கொண்டுள்ளார். தினமணி