முதல் வெற்றி பெறுமா இந்தியா? இன்று இங்கிலாந்துடன் 2வது மோதல்

by **சிவா** Tue Sep 06, 2011 3:53 pm

சவுத்தாம்டன்: இந்தியா, இங்கிலாந்து அணிகள் மோதும் இரண்டாவது ஒருநாள் போட்டி இன்று சவுத்தாம்டனில் நடக்கவுள்ளது. காயம் காரணமாக சச்சின், சேவக், காம்பிர் உள்ளிட்ட முன்னணி வீரர்கள் நீக்கப்பட்டது, இந்திய அணிக்கு மிகப் பெரும் பின்னடைவு. இளம் நட்சத்திரங்கள் கைகொடுத்தால், முதல் வெற்றியை பதிவு செய்யலாம்.

இங்கிலாந்து சென்றுள்ள இந்திய அணி டெஸ்ட், "டுவென்டி-20' போட்டியில் தோல்வி அடைந்தது. தற்போது ஐந்து போட்டிகள் கொண்ட ஒருநாள் தொடரில் விளையாடி வருகிறது. முதல் போட்டி மழை காரணமாக பாதியில் கைவிடப்பட்டது. இன்று சவுத்தாம்டன், ரோஸ்பவுல் மைதானத்தில் இரண்டாவது போட்டி நடக்கிறது.

பார்த்திவ் நம்பிக்கை:

கடந்த போட்டியில் துவக்க வீரராக களமிறங்கி 95 ரன்கள் எடுத்த பார்த்திவ், மீண்டும் மிரட்டலாம். இவருக்கு ரகானே நல்ல ஒத்துழைப்பு அளிக்கலாம். அம்பயர் கருணை காட்டினால், அனுபவ டிராவிட் ரன் குவிக்கலாம். "மிடில் ஆர்டரில்' கோஹ்லி, ரெய்னா, தோனி ஆகியோர் அதிரடி ஆட்டத்தை வெளிப்படுத்தினால் நல்லது.

பிரவீண் நம்பிக்கை:

வேகப்பந்து வீச்சை பொறுத்தவரை பிரவீண்குமார், முனாப் நம்பிக்கை அளிக்கின்றனர். இவர்களுடன் வினய் குமாரும் இணைந்து விக்கெட் வேட்டை நடத்தலாம். ரவிந்திர ஜடேஜா, அஷ்வின், அமித் மிஸ்ரா சுழலில் அசத்தலாம்.

குக் எழுச்சி:

இங்கிலாந்தை பொறுத்தவரை கடந்த போட்டியில், ஏமாற்றம் தந்த குக், கீஸ்வெட்டர் இன்று எழுச்சி காணலாம். "மிடில் ஆர்டரில்' டிராட், இயான் பெல், மார்கன், பென் ஸ்டோக்ஸ், சமித் படேல் ஆகியோர் ரன் குவிப்பில் ஈடுபடலாம்.

ஸ்டூவர்ட் பிராட், பிரஸ்னன், ஆண்டர்சன், டெர்ன்பக் உள்ளிட்டோர் இருப்பதால், இங்கிலாந்து அணியின் பவுலிங் பலமாகவே உள்ளது. சுழலில் சுவான் சாதிக்கலாம்.

தற்போதைய இங்கிலாந்து தொடரில், முதல் வெற்றி பெற இந்திய அணி முயற்சிக்கும் என்பதால், அனல் பறக்கும் ஆட்டத்தை எதிர்பார்க்கலாம்.

மழை வரும்

இன்று போட்டி நடக்கவுள்ள சவுத்தாம்டன் நகரில், வெப்பநிலை அதிகபட்சம் 19, குறைந்தபட்சம் 12 டிகிரி செல்சியஸ் இருக்கும். வானம் மேகமூட்டத்துடன் காணப்படும். மழை வருவதற்கு 80 சதவீதம் வாய்ப்புள்ளது.

---

சச்சின் நீக்கம்: பத்ரிநாத் வாய்ப்பு

இங்கிலாந்து தொடரில் காயம் காரணமாக இந்திய வீரர்கள் விலகுவது தொடர் கதையாகிறது. காயத்தால் அவதிப்பட்டு வந்த சச்சின், எஞ்சியுள்ள போட்டிகளில் இருந்து நீக்கப்பட்டார். இவருக்கு பதிலாக மாற்று வீரராக தமிழக வீரர் பத்ரிநாத் தேர்வு செய்யப்பட்டுள்ளார். இத்தொடருக்காக தேர்வு செய்யப்பட்டு, காயம் அடைந்த முன்னணி இந்திய வீரர்கள்...

1. ஜாகிர் கான் கணுக்கால் காயத்துக்கு ஆப்பரேஷன்
2. யுவராஜ் சிங் இடது கை சுட்டு விரலில் எலும்பு முறிவு
3. ஹர்பஜன் சிங் வயிற்றுப்பிடிப்பால் ஓய்வு
4. சேவக் வலது தோள்பட்டை காயத்துக்கு ஆப்பரேஷன் செய்த இடத்தில் மீண்டும் வலி, காது கேளாமை
5. இஷாந்த் சர்மா இடது கணுக்கால் தசை நார்கள் கிழிந்துள்ளது (விரைவில் ஆப்பரேஷன்).
6. காம்பிர் பின் தலையில் அடிபட்டதால் பார்வைக் கோளாறு
7. ரோகித் சர்மா வலதுகை சுட்டு விரல் எலும்பு முறிவு
8. சச்சின் வலது கால் விரலில், ஆப்பரேஷன் செய்த இடத்தில் வலி, வீக்கம்.

--------

தலா ஒரு வெற்றி, தோல்வி

ரோஸ் பவுல், சவுத்தாம்டன் மைதானத்தில் இந்திய அணி இரு (கென்யா, இங்கிலாந்து) போட்டியில் பங்கேற்று தலா ஒரு வெற்றி, தோல்வி பெற்றுள்ளது. இங்கிலாந்துக்கு எதிராக கடைசியாக (2007) பங்கேற்ற போட்டியில் இந்திய அணி, 104 ரன்கள் வித்தியாசத்தில் தோற்றுள்ளது.

தினமலர்