லக்னோ - உத்தரப் பிரதேசம்

* உத்திரப் பிரதேசத்தின் தலைநகராக லக்னௌ இருந்தும்கூட, நம் ஊர்கள் மாதிரி நிறைய பஸ்களோ லோக்கல் ரயில்களோ கிடையாது. "டக்' என்று கண்ணில் படுவது நிறைய சைக்கிள் ரிக்ஷாக்கள்தான்.

* சாலை விதிகளை மீறுவதுதான் பொதுவிதியாக உள்ளது. சாலை நடுவே, ஓரத்தில் எங்கே வேண்டுமானாலும் எருமை மாட்டு மந்தை அசையாமல் நின்று வெறுப்பேற்றும்.

* குளிர் காலத்தில் எருமைத் தயிர் கட்டியாக கெட்டியாக இருக்கும். இதை கத்தியால் நறுக்கி விற்பார்கள்.

* ரவை, மைதாவில் செய்த ஜிலேபியைத் தயிருடனோ, பாலுடனோ, காலை உணவாக உண்கிறார்கள். சமோசா, கசோரி, மட்ரீ போன்ற எண்ணெயில் பொரித்த ஸ்நேக்ஸ்தான் உ.பி.காரர்களுக்குப் பிரியமான பிரேக்ஃபாஸ்ட்!

* கல்யாணத்துக்கு அழைப்பிதழ் கொடுக்கும்போதே ஒரு டப்பாவில் மோதி சூர் லட்டு (சிறு பூந்திகளால் செய்யப்பட்ட லட்டு) பர்ஃபி வகைகள், பேடாக்கள் என ஏகப்பட்டது இருக்கும். அதைக் கொடுத்துத்தான் அழைப்பர்.

* மிகுந்த கடவுள் பக்தி கொண்டவர்கள். "ராம சரித மானஸ்', "சுந்தர காண்டம்' இவற்றை டோலக் இசைத்தப்படி பாடும் குழுக்கள் நிறைய உண்டு.

* ஆண்களும் பெண்களும் கல்லூரிச் செல்வதற்கு முன் ஒரு பாத்திரத்தில் தண்ணீர் எடுத்துக் கொண்டு அருகே உள்ள சிவலிங்கத்துக்கு அபிஷேகம் செய்வர். கோயிலுக்குச் செல்வர். ஜெய்சிவசங்கர்!

* சிறுவர்கள் முதல் கல்லூரி மாணவர்கள் வரை பெற்றோர், தாத்தா, பாட்டி, வயதானோர் ஆகியோர்களுக்கு மிகுந்த மரியாதை கொடுக்கின்றனர். அவர்கள் காலைத் தொட்டு தன் இதயத்தைத் தொட்டுக் கொள்வர். மனதார வணங்குவதாக ஐதிகம்! பெண்கள்தாமே ஹோமம், ருத்ர அபிஷேகம் ஆகியவற்றை பட்ஜி என்னும் புரோகிதர் உதவியுடன் செய்கிறார்கள்.

* இங்கே வசந்த நவராத்திரியில் சாதாரண பெண்கள் கூட உபவாசம் இருந்து சிறிய ஹோம குண்டங்களில் அம்பாள் நாமம் சொல்லி நெய் விட்டு ஹோமம் செய்கிறார்கள்.

* உபவாசம் என்றால் சிறு குழந்தைகள் கூட கட்டுப்படுகின்றன. நாக பஞ்சமிக்கு அடுப்பே மூட்டாமல் முந்தைய தின சாப்பாடை எல்லாரும் விரும்பிச் சாப்பிடுவார். நிறைய பூரிகள், சப்ஜி, இனிப்பு வகைகள், கழங்கள், மசாலா பால், தயிர் னெ முந்தைய தினம் சேகரித்து அவற்றை நாக பஞ்சமி அன்று உண்பர்.

* ஆட்டம் பாட்டம் கொண்டாட்டம் எல்லாம் உண்டு. "ஜாகரன்' என்று அம்பாள் பாட்டு பாடி ஆடும் ஆட்டம் இரவு முழுவதும் நடைபெறும்.

* "கல்யாணம்' என்றாலோ நடனத்துக்குக் கேட்கவே வேண்டாம். "மெஹந்தி ரஸம்' என்று மருதாணி வைப்பதற்கு ஆட்டம், பாட்டு, "லேடீஸ் - சங்கீத்' என்று பெண்கள் மட்டும் கூடி பெண்ணைக் கலாட்டா செய்து ஆடும் "ஸ்பெஷல்' பாட்டுகள், ஆட்டங்கள், பாராத் எனும் மாப்பிள்ளை அழைப்பின் ஆட்டம் எல்லாமே உற்சாகமாக இருக்கும்.

* பி.ஹெச்டி வாங்கிய பெண்கள்கூட தன் குழந்தைகளிடம் ஹிந்தியில்தான் பேசுவார்கள். தாய் மொழிப் பற்று மிக்க இவர்கள் பேசும் ஹிந்தியில் ஆங்கில வாடை அதிகம் இருக்காது.

* தீபாவளியை விடவும் சிறப்பாக ஹோலிப் பண்டிகையையும் அதற்குப் பின் ஒரு மாதம் வரை "ஹோலி மிலன்' என்று நண்பர்களுடனும் உறவினர்களுடனும் சேர்ந்த கொண்டாடும் விருந்தும் உண்டு. அப்பப்பா! குஜியா, பூரி, சோலே, நிம்கீன், ஸ்வீட், கச்சோரி, உருளைக்கிழங்கு கூட்டு, சமோசா, சர்பத், தேநீர் என்று அமர்க்களப்படும்!

* அஷ்டமி அன்று மூன்றிலிருந்த ஒன்பது குழந்தைகளை அழைத்து, விருந்து வைத்து, ஒரு கர்ச்சீப்பாவது, துப்பட்டாவாவது அல்லது முடிந்தால் சல்வார்-கமீஸ் செட்டே எடுத்துக் கொடுக்கின்றனர். வேலைக்காரியின் குழந்தையின் காலைகூட எஜமானி சொட்டு வணங்குகிறாள் - அந்தஸ்து வித்தியாசம் கிடையாது. எல்லாம் அம்பாள்!

* ஆனால் ஜாதி வித்தியாசம் இன்றைக்கும் உண்டு. தன் வீட்டு அடுப்பைப் பற்ற வைத்து சமைக்கும் சமையல் கார அம்மாவின் ஜாதி பார்த்துத்தான் வேலைக்கு அமர்த்தவர். அவர்களுக்குத் தனிக் கோப்பையும் தட்டும் வைக்கப்பட்டுவிடும்.

* அதிகமாக துலுக்கஜவந்தி எனும் ஆரஞ்சு புஷ்பங்கள், ரோஜா, கொரனேஷன், ஜினியா இவைதான் கிடைக்கும். அனுமன் கோயில்களில் ரூபாய் பத்துக்கும், 100 பூவுக்கும் அதிகமாகக் கிடைக்கும், இந்த ஆரஞ்சுப் புஷ்பங்கள்.

* பெண்கள்தான் உண்மையிலேயே இல்லத்து அரசிகள் - எல்லா முடிவும் அவர்கள் தான் எடுக்கிறார்கள்.

* தங்க நகை ரொம்ப அதிகம் போடுவதில்லை. நிறைய பேர் வெறும் கழுத்துடனே இருக்கிறார்கள்.

* இந்தியாவில் டாப்டென் பள்ளிகளில் ஒன்றான லா மார்டின் பள்ளியும் உலக புகழ் பெற்ற சி.எம்.சி. கல்விக் கூடங்களும் லக்னௌவில் உள்ளன. லக்னௌவின் ஐ.ஐ.எம்.மும், சி.டி.ஆர்.ஐ.யும் மிகவும் தரம் வாய்ந்தது எனக் கூறவும் வேண்டுமோ? மாணவர்களும், விஞ்ஞானிகளும் ததும்பி வழியும் ஊர் இது.

*மிக வேகமாக வளர்ந்து வரும் இந்த ஊர் மக்கள் மிக மரியாதையான ஹிந்தியில் மற்றவரிடம் உரையாடுவர். (தென்னிந்தியாவின் கோவை போல!) லக்னவி ஹிந்தி, லக்னவி எம்பிராய்டரி புடவை, குர்த்தாக்கள், லக்னவி கல்வளையல்கள் ஜகப் பிரசித்தம்.

* அதிக வெயில், அதிகக் குளிர், "ஆந்தி' என்னும் சுழல் காற்று, மண் குவியலை வீட்டினுள் எறியும் சூறாவளிக் காற்று எல்லாவற்றையும் பச்சை மிளகாய், பச்சை வெங்காயம், சுள்ளி எரிப்பு போன்ற எளிய முறைகளில் சமாளிக்கிறார்கள் சாமானிய லக்னவிகள்!

- சாந்தி ராமச்சந்திரன்

லக்னோவை பற்றி புதிதாக தெரிந்து கொண்டேன்