மருந்துத் தயாரிப்பில் நேர்மை அவசியம்: குடியரசுத் தலைவர்

மருந்துப் பொருள்கள் தயாரிக்கும் நிறுவனங்கள் நீதிநெறிகளுக்கு உள்பட்டு நேர்மையாக நடந்து கொள்ள வேண்டுமென குடியரசுத் தலைவர் பிரதிபா பாட்டீல் வலியுறுத்தியுள்ளார்.

ஆந்திர தலைநகர் ஹைதராபாதில் ஞாயிற்றுக்கிழமை சர்வதேச மருந்து தயாரிப்பு நிறுவனமும், இந்திய மருந்து தயாரிப்பு நிறுவனங்களின் கூட்டமைப்பும் இணைந்து 71-வது ஆண்டு மாநாட்டை நடத்தியது. இதில் பங்கேற்று பிரதிபா பாட்டீல் பேசியது:

மருந்து தயாரிப்பு தொழில் என்பதும் மருத்துவ தொழில் போல புனிதமானது. மக்களின் உடல்நலன், உயிர் பாதுகாப்பு ஆகியவை மருந்துகளில் அடங்கியுள்ளது. எனவே இதில் பாதுகாப்பும், தரமும் மிகமிக முக்கியம். இவற்றில் அதிக கவனம் செலுத்துவது நிறுவனங்களின் பொறுப்பு.

எனவே மருந்து தயாரிக்கும் நிறுவனங்கள் நீதிநெறிகளுக்குக் கட்டுப்பட்டு, நேர்மையாக நடந்து கொள்ள வேண்டும். போலி மருத்துகளையும், உடல் நலத்துக்கு தீமை விளைவிக்கக் கூடிய மருந்துகளையும் தயாரிப்பது குற்றம். உலக அளவில் 50 சதவீத மருந்துகள் தவறான முறையிலேயே விற்பனை செய்யப்படுகின்றன என்று புள்ளி விவரங்கள் தெரிவிக்கின்றன. இதுவே மருந்துகளை உள்கொள்பவர்களுக்கு பல்வேறு பிரச்னைகளை ஏற்படுத்துகிறது.

இந்திய மருத்துவத் துறையில் இந்த ஆண்டில் ரூ.56,400 கோடி வருமானம் ஈட்டப்பட்டுள்ளது. 2015-ல் இது ரூ.94,000 கோடியாக உயரும் என்று மதிப்பிடப்பட்டுள்ளது.

மருத்துவ அறிவியல், மருந்து தயாரிப்புத் துறை மிகவேகமாக வளர்ந்து வந்தாலும், நாட்டில் பெரும்பாலான மக்கள் சரியாக மருந்து கிடைக்காததால் பல்வேறு நோய்களால் அவதிப்பட்டு வருகின்றனர். முக்கியமாக இந்தியா போன்ற வளரும் நாடுகளில், மக்கள்தொகை பெருக்கத்துக்கு ஏற்ப அனைத்து மக்களுக்கும் மருந்துகள் கிடைப்பது இல்லை. அவ்வாறு கிடைத்தாலும் அவை ஏழை எளிய மக்கள் எளிதில் வாங்கும் விலையில் இல்லை. எனவே அனைவரும் வாங்கக் கூடிய விலைகளில் மருந்துகளை விற்க முன்வர வேண்டும் என்றார்.

ஆந்திர ஆளுநர் நரசிம்மன், முதல்வர் கிரண்குமார் ரெட்டி, மாநில அமைச்சர்கள், உயரதிகாரிகள் பலர் இந்த மாநாட்டில் பங்கேற்றனர். சர்வதேச அளவிலான இந்த மாநாடு 5 நாள்கள் நடைபெறுகிறது. இதில் மருந்தியல் தொடர்பான பல்வேறு விஷயங்கள் ஆலோசிக்கப்படவுள்ளன.

தினமணி