செங்கல்பட்டு மருத்துவக் கல்லூரி: எம்.பி.பி.எஸ். இடங்களை 100-ஆக அதிகரிக்க முடிவு

செங்கல்பட்டு மருத்துவக் கல்லூரி: எம்.பி.பி.எஸ். இடங்களை 100-ஆக அதிகரிக்க முடிவு
First Published : 05 Sep 2011 01:27:05 AM IST
சென்னை,
செப்.4: செங்கல்பட்டு அரசு மருத்துவக் கல்லூரியில் இப்போது உள்ள 50
எம்.பி.பி.எஸ். இடங்களின் எண்ணிக்கையை 100-ஆக அதிகரிக்க தமிழக அரசு முடிவு
செய்துள்ளது.தமிழகத்தில் மொத்தம் உள்ள 17 அரசு மருத்துவக்
கல்லூரிகளில் 1965-ல் தொடங்கப்பட்ட செங்கல்பட்டு அரசு மருத்துவக்
கல்லூரியும் ஒன்றாகும். இந்தக் கல்லூரி கடந்த 46 ஆண்டுகளாக 50
எம்.பி.பி.எஸ். இடங்களுடன் செயல்பட்டு வருகிறது. மாணவர்களின் நலன்
கருதி இந்தக் கல்லூரியின் எம்.பி.பி.எஸ். இடங்களை அதிகரிக்க வேண்டும் என்று
மருத்துவக் கல்வியாளர்கள் நீண்ட காலமாக கோரி வருகின்றனர்.இந்தக்
கல்லூரியின் அங்கீகாரத்தை மதிப்பிடுவதற்கு, 5 ஆண்டுக்கு ஒரு முறை வழக்கமான
மதிப்பீட்டு ஆய்வுக்கு இந்திய மருத்துவக் கவுன்சில் அதிகாரிகள் குழுவினர்
வந்திருந்தனர்; செங்கல்பட்டு அரசு மருத்துவக் கல்லூரியின் உள் கட்டமைப்பு
வசதிகளை அவர்கள் கடந்த இரண்டு தினங்கள் ஆய்வு செய்தனர்.இதைத்
தொடர்ந்து செங்கல்பட்டு அரசு மருத்துவக் கல்லூரியின் இப்போது 50
எம்.பி.பி.எஸ். இடங்களை, 100 எம்.பி.பி.எஸ். இடங்களாக அதிகரிக்கக் கோரும்
விண்ணப்பம், இந்திய மருத்துவக் கவுன்சில் அதிகாரிகளிடம்
அளிக்கப்பட்டுள்ளதாக தமிழக சுகாதாரத் துறை அமைச்சர் டாக்டர் வி.எஸ்.விஜய்
கூறினார்.இந்திய மருத்துவக் கவுன்சில் அதிகாரிகள் குழுவினர் இன்னும்
இரண்டு மாதங்களில் மீண்டும் வந்து செங்கல்பட்டு அரசு மருத்துவக் கல்லூரியை
இட அதிகரிப்பு கோரிக்கைக்காக ஆய்வு செய்வார்கள் என்று சுகாதாரத் துறை உயர்
அதிகாரிகள் தெரிவித்தனர்.

தினமணி