ஆன்மிகக் கல்வியை வளர்க்க கோவிலில் வகுப்புகள்: ராம.கோபாலன் கோரிக்கை

திருப்பூர், செப். 3:
அனைத்து கோவில்களில் சமயக்கல்வி வகுப்புகள் ஏற்படுத்தி தகுதியான
இளைஞர்களைக் கொண்டு ஆன்மிகக் கல்வியை வளர்க்க அரசு நடவடிக்கை எடுக்க
வேண்டும் என்றார், இந்து முன்னணியின் நிறுவன அமைப்பாளர் ராம.கோபாலன்.இந்து
முன்னணி சார்பில் விநாயகர் சதுர்த்தி விசர்ஜன விழா பொதுக்கூட்டம்
திருப்பூரில் சனிக்கிழமை நடந்தது. கூட்டத்தில் ராம.கோபாலன் பேசியது:தமிழக
அரசின் எல்லா செயல்களும் பாராட்டத்தக்கதாக அமைந்துள்ளன. தொலைநோக்குப்
பார்வையுடன் திட்டங்கள் வகுப்பதுடன், அத்திட்டத்தை தகுந்த முறையில்
நிறைவேற்றவும் முனைப்புக் காட்டுகிறது. இத்துடன், வீணாக கடலில் கலக்கும்
மழைநீரை தடுத்து சேகரிக்கவும் தகுந்த திட்டம் வகுக்க வேண்டும். தற்போது
கோவில்களில் தரிசனத்துக்கு கட்டணம் வசூலிக்கும் நடைமுறை உள்ளது. இதை
நிறுத்தும் அறிவிப்பை அரசு மக்களுக்கு பரிசாக அளிக்க வேண்டும்.

கோவில்
சொத்துகளின் வாடகை, குத்தகை பாக்கிகளை முறைப்படுத்தினால் தமிழகத்திலுள்ள
அனைத்து கோவில்களுக்கும் கும்பாபிஷேகம் செய்ய முடியும்; பக்தர்களுக்கு
அன்னதானமும் வழங்க முடியும். இந்து கோயில்களில் சமயக்கல்வி கற்றுக்
கொடுக்கப்பட வேண்டும். கன்னியாகுமரி மாவட்டத்திலுள்ள தர்ம வித்யாபீடம்
சார்பில் 500 இடங்களில் மையங்கள் அமைத்து சமயக்கல்வி கற்றுக்கொடுக்கப்
படுகிறது. அதன்மூலம் ஏராளமான பட்டதாரி இளைஞர்கள் உருவாக்கப்பட்டுள்ளனர். அத்தகைய இளைஞர்களை தமிழகம் முழுவதும் பயன்படுத்தினால் ஆன்மிகக் கல்வி வளர வாய்ப்பு ஏற்படும். தமிழகத்தில்
இந்து அறநிலையத்துறை ஊழல் நிறைந்ததாக மாறியுள்ளது. அத்துறை முழுவதையும்
ஆய்வு செய்து சுத்திகரிக்க அரசு நடவடிக்கை எடுக்க வேண்டும். மத்திய
அரசு கொண்டு வந்துள்ள மதமோதல் தடுப்பு மசோதாவில் எங்கு கலவரம் என்றாலும்
அதற்கு இந்துக்களே பொறுப்பு என்பதாக உள்ளது. அம்மசோதாவை அரசு மறுபரிசீலனை
செய்ய வேண்டும் என்றார்.

தினமணி