வெளி மாநிலத்தில் இலவச வேட்டி, சேலை உற்பத்தி ---- பாவம் ஈரோடு நெசவாளர்கள்

ஈரோடு: இலவச வேட்டி, சேலை உற்பத்தி செய்யும் பணியினை வெளிமாநிலங்களுக்கு
வழங்கும் அரசின் முடிவால் ஈரோட்டில் ஒரு லட்சம் விசைத்தறி தொழிலாளர்கள்
வேலை இழக்கும் அபாயம் ஏற்பட்டுள்ளது.
தமிழகத்தில் உள்ள வறுமைகோட்டுக்கு
கீழ் வாழும் மக்களுக்கு பொங்கல் பண்டிகையையொட்டி, ஆண்டுதோறும் இலவச வேட்டி,
சேலை வழங்கப்பட்டு வருகிறது. இவை தமிழகத்தில் உள்ள கைத்தறி மற்றும்
விசைத்தறிகள் மூலம் உற்பத்தி செய்யப்படுவது வழக்கம். இவற்றில் 60 சதவீதம்
ஈரோட்டில் இருந்து உற்பத்தி செய்யப்படுகிறது. இதனால் விசைத்தறிகள் மூலம் 8
மாதம் தொடர்ச்சியாக தொழிலாளர்களுக்கு வேலை இருந்து வந்தது.
இந்நிலையில்
இலவச வேட்டி, சேலைகளில் 5 சதவீதம் மட்டுமே தமிழகத்தில் உற்பத்தி
செய்யப்படும் என்றும், மீதமுள்ள 95 சதவீதம் வெளிமாநிலங்களில் உள்ள
விசைத்தறிகள் மூலம் உற்பத்தி செய்யப்பட்டு பெறப்படும் என்று கடந்த சில
நாட்களுக்கு முன்பு கோ ஆப்டெக்ஸ் மேலாண் இயக்குனர் உமாசங்கர் அறிவித்தார்.
இந்த அறிவிப்பு ஈரோடு மற்றும் சுற்றுவட்டார பகுதிகளை சேர்ந்த விசைத்தறி
உரிமையாளர்களுக்கும், தொழிலாளர்களுக்கும் பெரும் அதிர்ச்சியை ஏற்படுத்தி
உள்ளது. மேலும், 1 லட்சத்துக்கும் மேற்பட்ட தொழிலாளர்கள் வேலை இழக்கும்
அபாயமும் ஏற்பட்டுள்ளது.
இது தொடர்பாக ஈரோடு வீரப்பன்சத்திரம்
விசைத்தறி உரிமையாளர்கள் சங்கத்தின் சார்பில் தமிழக முதல்வருக்கு அனுப்பி
உள்ள மனுவில் கூறியிருப்பதாவது: இலவச வேட்டி, சேலைகள் உற்பத்தி
வெளிமாநிலங்களுக்கு வழங்கப்படுவதாக வந்து தகவல் விசைத்தறியாளர்களையும்,
தொழிலாளர்களையும் மிகுந்த அதிர்ச்சியில் ஆழ்த்தி உள்ளது. ஈரோட்டில் ஈரோடு,
லக்காபுரம், சித்தோடு, வீரப்பன்சத்திரம் உள்ளிட்ட பகுதிகளில் உள்ள
ஆயிரக்கணக் கான விசைத்தறிகள் மூலம் ஆண்டுதோறும் இலவச வேட்டி, சேலைகள்
உற்பத்தி செய்யப்பட்டு வந்தது.
இந்நிலையில், அரசின் திடீர்
அறிவிப்பினால் விசைத்தறியாளர்களுக்கு வருமானம் இழப்பு ஏற்பட்டுள்ளதோடு, இதை
நம்பியுள்ள 1 லட்சத்துக்கும் மேற்பட்ட தொழிலாளர்களின் வாழ்வாதாரம்
கேள்விக்குறியாகி உள்ளது. எனவே, வெளிமாநில விசைத்தறிகள் மூலம் இலவச வேட்டி,
சேலை உற்பத்தி செய்வதை தவிர்த்து, தமிழகத்தில் உள்ள விசைத்தறிகள் மூலமாக
உற்பத்தி செய்ய நடவடிக்கை எடுக்க வேண்டும்.
இவ்வாறு அந்த மனுவில் கூறப்பட்டுள்ளது.

தினகரன்