மூவரின் மரண தண்டனையை தடுக்க முதல்வரால் முடியாதா?

by **ayyamperumal** Sat Sep 03, 2011 7:07 pm

மூவரின் மரண தண்டனையை தடுக்க முதல்வரால் முடியாதா?

பேரறிவளன், சாந்தன் , முருகன் ஆகிய மூவரின், மரண தண்டனையை தடுக்கும் அதிகாரம்
தனக்கு இல்லை என்று கூறும் , தமிழக முதல் அமைச்சர் அவர்களின் கூற்று ,இந்திய அரசியல் அமைப்பு சட்டத்தின் 161வது பிரிவுக்கூறுக்கு புறம்பானது .1991 இல் மத்திய உள்துறை அமைச்சகம் தமிழக அரசுக்கு எழுதிய கடிதத்தின் அடிப்படையில் முதலமைச்சர் இந்த கருத்தை கூறியுள்ளார். உச்ச நீதிமன்றத்தின் 5 நீதிபதிகள் கொண்ட பேராயம் 11-11-1980 அன்றே மாரூராம் வழக்கில் அரசியல் அமைப்பு சட்டத்தின் பிரிவுக் கூறு 72 மற்றும் 161 இல் குடியரசுத் தலைவருக்கும், மாநில ஆளுனருக்கும் வழங்கப்பட்ட அதிகாரத்தை, வேறு எந்த சட்டத்தாலும் கட்டுபடுத்த முடியாது என்று மிகத் தெளிவாக கூறியிருக்கிறது.

குடியரசுத் தலைவருக்கு இந்த அதிகாரத்தை வழங்கியுள்ள அரசமைப்பு
சட்டத்தின் பிரிவுக்கூறு 72 உட்பிரிவு 3இல் ஒரு முக்கிய குறிப்பு உள்ளது. மரண தண்டனைக்கு எதிராக வரும் கருணை மனுக்களை குடியரசுத் தலைவர் பரிசீலித்தாலும் கூட , குடியரசுத் தலைவருக்கு உள்ள அதே அதிகாரம் மாநில ஆளுனருக்கும் உண்டு என்பதை இந்த உறுப்பு தெளிவு படுத்தியுள்ளது.

மத்திய உள்துறை அமைச்சகத்தின் கடிதம். அரசமைப்பு சட்டத்தின் 257(1) இன் கீழ்
அனுப்பபட்டதாக தெரிகிறது. இத்தகைய கடிதத்தை இந்தப் பிரிவின் கீழ் மாநில அரசுக்கு அனுப்ப மத்திய அரசுக்கு அதிகாரம் இல்லை. இந்த கடிதத்தை ஆணையாக ஏற்றுக்கொண்டு, எந்த ஒரு மாநில ஆளுனரும் இந்திய அரசமைப்பு சட்டத்தின் கூறு 161 இல் தனக்கு கொடுக்கப்பட்ட அதிகாரத்தை பயன்படுத்தி கருணை மனுக்களின் மேல் முடிவெடுக்க மாட்டேன் என்று சொல்லவும் முடியாது.

மத்திய உள்துறை அமைச்சகத்தின் கடிதம், மாநில ஆளுநரின் அதிகாரத்தில்
தலையிடுவதால் அந்த கடிதம் அ.சட்டத்தின் 14 க்கு எதிரானது. எனவே மாநில ஆளுனருக்கும். தமிழக அமைச்சரவைக்கும் அரசமைப்புச் சட்டத்தின் பிரிவுக்கூறு 161 இன்படி கருணை மனுக்களை பரிசீலிக்கும் அதிகாரம் நிச்சயமாக இருக்கிறது.

நன்றி புதிய;
தலைமுறை வார இதழ் !
கட்டுரையாளர் ; M. ராதா கிருஷ்ணன். மூத்த வழக்கறிஞர் ;