இந்தியா-இங்கிலாந்து மோதல்: நாளை 20 ஓவர் போட்டி

**இளமாறன்** · **இளமாறன்** Tue Aug 30, 2011 10:51 pm

இந்தியா-இங்கிலாந்து அணிகள் மோதும் ஒரே ஒரு 20 ஓவர் போட்டி மாஸ்செஸ்டர் நகரில் நாளை (புதன்கிழமை) நடக்கிறது. இந்திய அணி இங்கிலாந்துக்கு எதிரான 4 டெஸ்டிலும் மோசமாக தோற்று தொடரை 0-4 என்ற கணக்கில் இழந்தது. இதுவரை இல்லாத அளவுக்கு இந்தியாவின் மோசமான தோல்வியாக இது கருதப்படுகிறது.

இதற்கு பதிலடி கொடுக்கும் வகையில் இந்திய அணி நாளை நடைபெறும் 20 ஓவர் போட்டியில் வெற்றி பெறுமா என்று ஆவலுடன் எதிர்பார்க்கப்படுகிறது. இங்கிலாந்து அணி நடப்பு 20 ஓவர் சாம்பியன் என்பது குறிப்பிடத்தக்கது.

டெஸ்டில் ஏற்பட்ட படுதோல்விக்கு பிறகு இந்திய அணி 3 பயிற்சி ஆட்டத்தில் விளையாடி வெற்றி பெற்றது. இதனால் இந்திய வீரர்கள் நாளைய போட்டிக்காக மிகுந்த நம்பிக்கையுடன் உள்ளனர். அதிரடி பேட்ஸ்மேன் ஷேவாக் ஏற்கனவே இந்த தொடரில் இருந்து விலகி இருந்தார். மற்றொரு தொடக்க வீரர் காம்பீரும் நாளைய போட்டியில் ஆட வில்லை.

பயிற்சி ஆட்டத்தில் பார்த்தீவ் பட்டேல் நன்றாக ஆடியதால் தொடக்க வீரராக நாளை ஆடுவார். டெஸ்ட் தொடரில் மோசமாக ஆடிய கேப்டன் டோனி, ரெய்னா ஆகியோர் 20 ஓவர் போட்டியில் திறமையை வெளிப்படுத்த வேண்டிய கட்டாயத்தில் உள்ளனர்.

இங்கிலாந்து அணி தனது சொந்த மண்ணில் விளையாடுவதால் ஆதிக்கம் செலுத்தும். டெஸ்டை போலவே அந்த அணி 20 ஓவர் போட்டியிலும் வெற்றி பெற முயற்சிக்கும். இந்தியா- இங்கிலாந்து அணிகள் மோதும் 20 ஓவர் போட்டி இந்திய நேரப்படி இரவு 10.30 மணிக்கு இந்த ஆட்டம் தொடங்குகிறது. ஸ்டார் கிரிக்கெட் சேனலில் இந்தப்போட்டி நேரடியாக ஒளிபரப்பு செய்யப்படுகிறது.

மாலை மலர்