முதல்வருக்கு உள்ள அதிகாரங்கள் : கருணாநிதி

by **இளமாறன்** Thu Sep 01, 2011 4:20 pm

சென்னை: "மரண தண்டனையை ரத்து செய்ய முதல்வருக்கு இருக்கும் அதிகாரத்தை உணர்ந்து, மூவரின் தூக்குத் தண்டனையை ரத்து செய்ய ஜெயலலிதா முன்வர வேண்டும்' என, தி.மு.க., தலைவர் கருணாநிதி கூறியுள்ளார்.

இதுகுறித்து, நேற்று அவர் வெளியிட்ட அறிக்கை: அரசியல் அமைப்புச் சட்டம் 161வது பிரிவின் படி, மரண தண்டனையை நிறுத்தி வைக்கும் அதிகாரம், மாநில முதல்வருக்கு உண்டு என, தூக்குத் தண்டனை கைதிகளுக்காக சென்னை ஐகோர்ட்டில் வாதாடிய வழக்கறிஞர் காலின் கன்சால்வஸ் கூறியிருக்கிறார். தமிழ்த் தேசிய விடுதலை இயக்கத்தின் பொதுச் செயலராக இருக்கும் தியாகுவுக்கு, கொலை வழக்கு ஒன்றில், 1972ம் ஆண்டு சென்னை ஐகோர்ட் தூக்குத் தண்டனை விதித்தது. இந்த தண்டனையை குறைக்குமாறு கவர்னருக்கு கருணை மனு அனுப்பினார். அதன் மீது, என் தலைமையிலான அமைச்சரவை கூடி, மரண தண்டனையை ஆயுள் தண்டனையாகக் குறைக்கலாம் என பரிந்துரைத்தோம். அதன்படி, தியாகுவுக்கு விதிக்கப்பட்ட மரண தண்டனை, ஆயுள் தண்டனையாகக் குறைக்கப்பட்டது.
இதேபோல், மார்க்சிஸ்ட் - லெனினிஸ்ட் இயக்கத்தின் மாநிலச் செயலராக இருந்த கலியபெருமாள் என்பவருக்கு, கொலை வழக்கு ஒன்றில் தூக்குத் தண்டனை விதிக்கப்பட்டது. இந்த தண்டனையைக் குறைக்க வேண்டும் என, ஒரு லட்சம் பேரிடம் கையெழுத்து பெற்று கவர்னருக்கு அனுப்பினர். இம்மனு மீது, என் தலைமையிலான அமைச்சரவை 1974ல் கூடி, தூக்குத் தண்டனையை ஆயுள் தண்டனையாகக் குறைக்கலாம் என பரிந்துரைத்தது. அதையேற்று, கலியபெருமாளுக்கு விதிக்கப்பட தண்டனை ஆயுள் தண்டனையாகக் குறைக்கப்பட்டது. எனவே, தூக்குத் தண்டனையை குறைக்கும் அதிகாரம் முதல்வருக்கு இல்லை என, யாரோ சொல்வதைக் கேட்டு காலம் கடத்தாமல், பேரறிவாளன், சாந்தன், முருகன் ஆகியோரின் உயிர்களை காப்பாற்ற, முதல்வர் ஜெயலலிதா முன்வர வேண்டும்.
இவ்வாறு அறிக்கையில் கருணாநிதி கூறியுள்ளார். தினமலர்